Ndoeng faexcuk heuswdswd, raemx yaeng’yaeng lae bae, ranz moq baenz baiz baenz coij, gofaex henz roen iq raemhrwd, aendiengz caemdingh liengzsaux……Ngamq byaij haeuj Mbanjsuijli Liuzcunh Cunhveij Gujlaz Cin Binhyangz Yen, raq heiq singjsien homvan swhyienz ndeu couh roemxrub hwnj gwnz naj daeuj.

Mbanjsuijli dwg aen mbanj iq ngamq miz 63 ranz 264 vunz ndeu, dieg youq henz Huzsuijli baihdoengnamz Gujlaz Cin, gizdieg gingj gyaeundei heiq singjsien, miz raemx lai, henz mbanj miz aen Huzsuijli mienhcik iek 450 moux caeuq daemzbya iek 40 moux ndeu, daengx mbanj miz reihnaz 570 moux, ndawde miz 350 moux ndaem gosangh daeuj ciengx nonsei, lij miz Binhyangz Yen aen giyez gyagoeng baengzcouzsei ceiq hung ndeu——Namzningz Gveihoz Swhyez Youjhan Cwzyinz Gunghswh neix, aen gingjgih lijyouz ranz geq hom saw singq Cai okmingz (AAA gaep) neix caemh youq gizneix. Bi 2013 ndwen 10, Mbanjsuijli ndaej si、yienh dingh guh mbanj guhyiengh cunghab dungjcouz singz mbanj cingjdaejvaq, riengzlaeng ndaej daengz yienh caizcwng caeuq giyez ok ngaenz 3600 lai fanh maenz hwnjguh mbanj guhyiengh cunghab, vunzmbanj hopheux hwngfat dinghvih, gyavaiq guh ndei gij hongsaeh aeu ndaem gosangh ciengx nonsei、seireh gyagoeng、lajmbanj lijyouz、nungzgyahloz guhcawj neix; caemhcaiq ciuq gij funggek baihnamz gaij coih gij ranz ndaw mbanj, hawj yiengh mbanj yienj gaeuqgeq caem- dingh; aeu ndoeng faexcuk、najraemx aenhuz guh goekdaej, dawz guekgya 3A gaep lijyouz gingjgih ranz gaeuq singq Cai gyonjgyoeb hwnjdaeuj haifat baenz gvaengh lijyouz, haenq- rengz hwngfat gij lijyouz lajmbanj aeu “lajmbanj youqndwi、ndaemndai daejniemh、sangh non vwnzva、yawjngonz faexcuk mizmingz、ranz gaeuq lajmbanj” guh cawjdaez haenx, cauxguh aenmbanj guhyiengh cunghab swcigih gaep “raemx cuk doxdaengh、sangh non baenz sei、hom haeux biuyeg、ranz gaeuq lajmbanj” ndeu. Seizneix, ndaw mbanj gaenq buh roen suijniz moq, daengroen ronghndit ronghcangcang, guh miz raemxuq cawqceq sezsih caeuq goenggungh hozdung gvangjcangz; seiqhenz daemz caemh guh le roen yawjngonz caeuq dieg yietbaeg youqndwi、luengqhongh gyaq gova、dieg yietbaeg laj gorungz geq daengj lijyouz boiqdauq sezsih, gij ranz ndaw mbanj 100% cang lengj, ndaem gofaex gova hoemqcwlwd 45% doxhwnj.

Ndaem gosangh ciengx nonsei dwg donghsaeu cengjdaemx ginghci Mbanjsuijli. Ndaw mbanj caeuq giyez gyaeujlungz nungzyez doxgap, aeu “gunghswh+gihdi+nungzhoh” aen vunqsik neix gyahung hong ndaem gohsangh ciengx nonsei, doenggvaq gisuz cauhmoq gaijndei rehsei caetliengh; doengzseiz doiq ndaw mbanj 220 moux haeuxnaz guh binjcungj gaijliengz caeuq namhnaz gaijliengz ok haeux ndei ndaej fungsou, lij hwnjguh le aen ranzgangqreh gvangq 2000 lai bingzfanghmij、aen nonsei iq caemh’ung 1000 lai bingzfanghmij nemh aen ranz nonsei hung mbaet rengz ciengx miz 200 lai bingzfanghnij ndeu, hawj daengx mbanj bi gyagoeng ndaej reh moq 75 fanh goenggaen. Seizneix daengx mbanj 90% nungzhoh ndaem miz gosangh, ciengx miz nonsei, caemhcaiq laebbaenz le lajmbanj hozcozse, doxbang doxcoengh, doengzcaez demcanj demsou. Gyoengq vunzmbanj lij yungh mbawsangh caeuq maksangh daeuj cimqcaz caeuq oemqlaeuj, guh gij cazmbawsangh caeuq laeujmaksangh haenx feihdauh daegbied; lij yungh nyesangh guh yenzliu nienj baenz mba daeuj ung goraet, hawj yauqik gosangh ndaej demlai. Ndaw mbanj seizneix cingq hwng guh nungzgyahloz, ranzranz cungj dajsuenq guh nungzgyahloz, aeu daegsaek daeuj yinx gyoengq hek ndaw singz daengz ndaw mbanj youqndwi gvaq ngoenzgyaj, hawj souhaeuj bi beij bi lai. Bi 2015, Mbanjsuijli moix vunz cinghsouhaeuj dabdaengz le 11500 lai maenz.