5 nyied 25 daengz 26 hauh, Bi 2017 Daengx Gih Cuengh Gun Song Vah Saw Sonhag Yienhciengz Yawjhag Hozdung youq Vujsenh Yen banh. Baez hozdung neix youz Swcigih Gyauyuzdingh cawjbanh, Vujsenh Yen Gyauyuz Caeuq Gohgigiz bangbanh. Swcigih Gyauyuzdingh Minzcuz Gyauyuzcu cucangj、 Minzcuz Song Vah Saw Guenjleix Bangunghsiz cujyin Veiz Lanzmingz, Vujsenh Yen Gyauyuz Caeuq Gohgigiz gizcangj Cangh Hingyenz daengj bouxdaeuz caeuq lauxhangz camgya hozdung. 175 boux gyauyenzyenz Cuengh Gun song vah saw、 lauxsae Sawcuengh Vahcuengh camgya le baez hozdung neix. Hozdung youz yienhciengz yawjhag、 raiz gij doxgaiq hag ndaej、 faen cuj bingz goqdangz sonhag、 yenzgiu daujlun cungjgez daengj bouhfaenh gapbaenz.

5 nyied 25 hauh, yienhciengz yawjhag hozdung youq Dungzlingj Cin Cungsim Hagdangz guh, Danz Meijvah lauxsae aen hagdangz neix langhbaij le yibeibanh Sawcuengh gyoepyaem guhyiengh sonhag hozdung, Veiz Feihfeih lauxsae langhbaij le dangzgoq guhyiengh sonhag Sawcuengh Vahcuengh it nienzgaep.

Youq mwh yibeibanh Sawcuengh gyoepyaem guhyiengh sonhag hozdung, Danz lauxsae yungh gij hozdung hingzsik lai cungj lai yiengh, ciuq gij daegdiemj bi’ndwen caeuq simleix lwgnyez, cauhlaeb guh’angq, daiq gyoengq lwgnyez hag doeg yinhmeh Sawcuengh; yungh yaem’wenq fwen、 vaiqbanj daengj soujduenh caeuq gaiqdawz bangbouj, dawz gij neiyungz hagsib Sawcuengh ndaw saw yungh gij hingzsik fwen son’gyauq hawj lwgnyez, dawz gyauyuz sonhag caeuq swnjcienz minzcuz vwnzva hozdung ndeindiq giethab hwnjdaeuj. Daengx dangzgoq neiyungz caeuq hingzsik lai, gikfat le gij yinxdaeuz hagsib gyoengq lwg- nyez, ndaej daengz gyoengq lauxsae yawjhag bekfwngz haenhndei.

Youq mwh dangzgoq guhyiengh sonhag Cuengh Gun song vah saw, Veiz lauxsae hwnjdangz seiz, doenggvaq gij hingzsik gangj gojgaeq gejgangj faenzcieng ndaw saw, yungh gij sonhag fuengfap gikleihsik, gikfat gij yinxdaeuz hagsib gyoengq hagseng. Ndaw dangzgoq, hawj hagseng cang gij giek ndaw saw, mboujdan hawj gyoengq hagseng engqgya haeujlaeg roxyiuj faenzcieng ndaw saw, doengzseiz hix hawj gyoengq hagseng gyalaeg gyamaenh gij cihsiz hag ndaej haenx.

26 hauh banringzgvaq, Veiz Lanzmingz youq gwnz hoih cungjgez naeuz, neix dwg baez yawjhag hozdung “guhyiengh miz souhaeuj, ngeizvaeg miz dapanq, sonhag miz fuengyiengq, guhhong miz saenqsim, song vah saw miz cingzyauq” he, rengzrwd cwngmingz le gij cingzcik Vujsenh Yen haiguh hong sonhag son’gyauq Cuengh Gun song vah saw aeundaej haenx. Aeundaej doenghgij cingzcik neix, caeuq aen yienh neix roengzrengz “bouxdaeuz yawjnaek、 lauxsae genhciz、 hagdangz miz daegsaek、 son’gyauq miz caetliengh、 cauh singqheiq miz heiqfaenh” liz mbouj hai. Doiq gij cingzgvang hwngfat Cuengh Gun song vah saw gyauyuz seizneix, de naeuz, Cuengh Gun song vah saw gyauyuz hwngfat seiqdaeuz ndei, gvendaengz cwngcwz banhfap mboujduenh laebndei, Cuengh Gun song vah saw hwngfat cienjhingz. Doiq gij hong gvaqlaeng, Veiz Lanzmingz daezok geij diemj iugouz: It dwg daezsang roxyiuj, aeu daj gizsang swnjcienz minzcuz vwnzva daeuj roxyiuj gij yiyi youqgaenj guh ndei Cuengh Gun song vah saw gyauyuz. Ngeih dwg guh daengz gagsaenq caeuq genhciz, aeu daj gizsang gyagiengz vwnzva gagsaenq daeuj giendingh song vah saw gyauyuz gagsaenq. Sam dwg hangznieb dinfwngz aeu ciennieb, aeu mboujduenh daezsang gyauyuz sonhag suijbingz.

Cangh Hingyenz gangjvah naeuz, hengzguh Cuengh Gun song vah saw gyauyuz dwg gij bouhfaenh youqgaenj minzcuz gyauyuz Vujsenh Yen. Gaenh bi neix daeuj, ndaej daengz Swcigih Gyauyuzdingh haeujcoengh, Vujsenh Yen Cuengh Gun song vah saw gyauyuz aeundaej le 3 aen fuengmienh cingzcik: Cuengh Gun song vah saw gyauyuz lingjdauj caeuq guenjleix ndaej gyagiengz; gohyoz hengzguh Cuengh Gun song vah saw gyauyuz; genhciz dawz minzcuz doxgiet gyauyuz yungzhaeuj minzcuz vwnzva swnj- cienz hozdung bae.

Gwnz hoih cungjgez, lij guh le faen cuj baij daiqbiuj bauq bingz goqdangz sonhag; Denhdwngj Yen、 Vujsenh Yen guh hong Cuengh Gun song vah saw gyauyuz gingniemh doxgyau; lauxhangz diemjbingz dangzgoq sonhag Cuengh Gun song vah saw vanzcez dem.