Seizcin daengz lajmbanj,

Ranzranz miz saeh muengz,

Daeggo iu dahnuengx,

Muengh caez bae ndaemnaz.

Bouxcuengh nazmbaeklae,

Gaq bae daengz gwnz mbwn,

Gaxgonq mbouj roengz fwn,

Vunz ngiengx mbwn dai iek.

Seizneix mbouj roengz fwn,

Mbouj baengh mbwn gwn haeux,

Suijgu cuengq raemx daeuj,

Raemx beij laeuj lai rang.

Dangj cwngcwz fouq minz,

Fuzbinz daengz ndaw gya,

Yungh den raemx miz ga,

Bin bya haeuj ndaw naz.

Dangqgonq bae guh naz,

Bin bya youh raih dat,

Aemq lwg caiq dawz rap,

Ga gvez hwet deng gaeuz.

Seizneix gihgi hai,

Caiq mbouj yungh dawz cae,

Gihgi “da da” bae,

Bak moux ngoenz cae caez.

Dohlahgih hai daeuj,

Cae reih caeuq cae naz,

Cae dae ndaw naz gvaq,

Lumj byajraez gwnz mbwn.

Caeraeq gyoengqvunz angq,

Naengh vaizdiet dang youz,

Deqcaj daengz seizcou,

Haeux rim conh doucang.

Dangqgonq raeuz ndaemnaz,

Gumx hwet ga yaek gvih,

Ciemz gyaj baeh daeuj lih,

Lij deng bing daeuj haeb.

Seizneix raeuz ndaemnaz,

Ciemz gyaj fwngz mbouj naenx,

Bau gyaj ndwn gwnz haenz,

Daenj buh moq mbouj uq.

Dangqgonq ndaemnaz gvaq,

Gij bwnh hwnj bya ra,

Ndai naz canj rumhaz,

Dajcae mbouj ndaej yiet.

Seizneix mbouj ndai naz,

Bwnhfoed saj miuz maengh,

Sien bwh ndei lai caengx,

Daengz sou caengh yaek goenq.

Seizneix vunzguhnaz,

Laep da hix canh ngaenz,

Liengzsiz ndaw cang daenz,

Ce faenz bi moq ndaem.

Seizcin ndaemnaz gvaq,

Daihgya bae lijyouz,

Bouxnungz bienq vunzfouq,

Bae youz doh seiqgyaiq.