Youq Bingzgoj Yen Gojva Cin Gojva Cunh Mbanjswhngan henz Dahyougyangh miz aen Mboqgungq ndeu, liz Bingzgoj yienhsingz miz 28 goengleix.

Gij raemx Mboqgungq daj aen gamj henz Dahyougyangh dengj ok, lae roengz Dahyougyangh bae, gij raemxmboq neix seizdoeng raeuj、 seizhah liengz. Mbouj rox dwg vihmaz, moix haemh haeuj laep seiz, baenz- bang duzgungq couh daj ndaw dah doxcomz daengz giz raemxmboq caeuq raemxdah doxgap, yienzhaeuh ciengj gonq lau laeng dwk benz hwnj song mbiengj datrin.

Gyoengqvunz couh youq gij roen gungq youz daeuj cang rauz, hawj gij gungq neix gag daeq haeuj rauz bae. Baez noix ne, hix ndaej geij gaen, baez lai ne, haemh cang ndaej baenz bak gaen. Daegbied dwg haemh raemxdah hoemz caemhcaiq laepndwen, engq dwg seiz cang gungq demsou. Baenz- baenz it bi seiq geiq, haemhhaemh cungj cang ndaej gungq.

Danghnaeuz aeu dendungz rongh gij gungq, cijraen lwgda gij gungq ndongqndikndik, couh lumj ndaundeiq gwnz mbwn nei ronghsaksak. Geizheih dwg danghnaeuz aeu dendungz rongh nanz, gij gungq gawqyienz rox baenqgyaeuj benz roengz datrin youz dauq ndaw dah bae.

Gij gungq neix ga dinj noh biz, mboujlwnh cien roxnaeuz ceuj cungj heiq hom bak sangj, beij gij gungq gizwnq ndei gwn. Aenvih gij gungq mizmingz neix, ndigah vunz heuh aen mboq neix guh “Mboqgungq”.