哑巴

Vunzngoemx ndaej bi ndeu seiz riengz lwgnyez wnq doxdoengz, rox gwn, rox ndoet, rox daej, rox ninz.

Vunzngoemx ndaej song bi seiz，conghhoz de cij rox gangj “a a a”, hoeng gyoengq doengzdoih gaenq rox gangj gij vahgawq genjdanh lo. Daxboh vunzngoemx ngeiz naeuz:“Boux lwgnyez neix dwg mbouj dwg feiq lo? Vihmaz dan rox gangj ‘a a a’ ne?” Daxmeh vunzngoemx naeuz:“Mbouj miz maz saeh, lwgnyez rox gangj ceiz di, majhung le couh ndei lo.”

Doeklaeng daxboh vunzngoemx saedcaih raen mbouj deng, couh caeuq daxmeh vunzngoemx daiq vunzngoemx bae yihyen. Gij ngoemx vunzngoemx dwg mbwnbaenz. Canghyw naeuz seizneix mbouj miz banhfap yw cungj bingh youh ngoemx youh nuk neix. Bohmeh vunzngoemx got gyaeuj daej- nganga. Vunzngoemx dan rox riu, da de lumj manz dwk naeuz:“Nuk lo, ngoemx lo, youh baenzlawz ha?”

Baez yaep da vunzngoemx ndaej 7 bi lo, gyoengq lwgnyez ndaw mbanj cungj aemq daehsaw angqvauvau dwk bae hagdangz, vunzngoemx cijndaej youq ndaw gyanghongh gag baenj duzmoed. Bohmeh vunzngoemx hix siengj hawj vunzngoemx bae hag- dangz, hoeng lauxsae hagdangz doiq bohmeh vunzngoemx naeuz:“Dangh- naeuz vunzngoemx daeuj itdingh hawj gij faenbingzyaenz doekdaemq, sou lij dwg bae ra hagdangz wnq ba!” Daxmeh vunzngoemx mbouj gangj maz lo, gij vah lauxsaeh de rox, hoeng ndaw ranz mbouj miz baenzlai ngaenz soengq vunzngoemx bae cungj hag- dangz boux lauxsae neix gangj.

Gyangngoenz vunzngoemx youq ndaw gyanghongh guhcaemz, mizseiz baenj duznon iq, mizseiz gag guh angq, mizseiz deng vunz sajriu. Raen lwgnyez ranz wnq cungj bae hagdangz ndaej son, hoeng lwgnyez swhgeij cij ndaej youq ndaw gyanghongh guh- caemz, daxmeh vunzngoemx moix baez siengj daengz gizneix couh guhcaeg lae raemxda, doq lae raemxda doq gvaiq swhgeij, dwg de daiq boux lwgnyez mbouj miz maz coih ndeu daeuj aen seiqgyaiq neix lo. Daxboh vunzngoemx cijgoq ngaemgyaeuj ndoet laeuj, ndoet fiz le gaem vanj dawh gveng youq gwnz dieg.

Caj vunzngoemx maj daengz rox najmong seiz, youq ndaw gyanghongh gaenq mbouj raen ngaeuz de lo. De baenzngoenz ngaez youq ndaw rug iq swhgeij, ndaw rug baij rim gij vaih daj ndaw doi nyapnyaj gip ma, miz vanzgi giceh、feihgih、lunzconz, lij miz sienqdoengz、sienqdiet、suliu daengj- daengj. “Mwngz baenj gij nyapnyaj neix ndaej gwn lwi? Ndaej ndoet lwi? Vaiq di bae guh hong!” Daxboh vunzngoemx ciengzseiz dik bakdou sing hung dwk swenj, hoeng vunzngoemx dingq mbouj ndaej nyi, hix mbouj rox han. Daxboh vunz- ngoemx aeu cien haenqrengz “dung dung dung” dwk roq fajciengz, vunzngoemx roxnyinh saenqdoengh le, cij hai dou, ciep dwk couh deng daxboh de hoenx gaemxgienz ndeu, song da yap ronghrib. Daxboh vunz- ngoemx guh aen dungcoz vat namh, vunzngoemx ngaekngaek gyaeuj, gwed faggvak riengz daxmeh bae ndaw naz guh hong lo. Daxboh vunzngoemx daej dwk danqheiq gangj:“Caj dou dai le, bouxlawz daeuj ciengx mwngz ha?”

Miz baez ndeu, mbouj rox vunz- ngoemx gauj maz, laebdaeb song ngoenz song hwnz suk youq ndaw rug youh iq youh ndat, mboujlwnh baenz- lawz roq ciengz, de cungj mbouj hai dou. Daxmeh vunzngoemx cam Daxboh vunzngoemx:“Daxboh vunz- ngoemx, dwg mbouj dwg daegngoemx daj baihrog gip ndaej bingznungzyoz ma ndoet lo?” Daxboh vunzngoemx naeuz:“W, danghnaeuz dwg yiengh- neix, couh mbouj yungh feiq sim lo!” Daxboh vunzngoemx hix cijdwg gangj riu, de rox daeglwg maz saeh cungj mbouj miz, aenvih gyangngoenz dingqnyi miz gij singyaem roq dox- gaiq, gyanghaemh youh dingqnyi sing ndaep daeng. Daxboh vunzngoemx sim ngeix: Hawj vunzngoemx gag guh- caemz ba!

Vunzngoemx dauqdaej okdaeuj lo, de daenj aen mauhnyangj daj ndaw rug byaij okdaeuj. “Mwngz fatbag ha, youq ndaw ranz daenj mauh guhmaz ha?” Daxboh vunzngoemx gaem sauq- baet couh hoenx vunzngoemx. Daxmeh vunzngoemx ciengj sauqbaet gvaq- daeuj, swenj naeuz:“Ndaej lo! Mwngz hoenx de guhmaz? Hoenx sieng le baenzlawz banh?”

Gwnz naj vunzngoemx riu- nyumnyum dwk, de angq yaengx fwngz, vix gij henz mauhnyangj, lij “a a a” dwk heuh. Yenzlaiz gij henz mauhnyangj baihlaj miz aen beizden iq ndeu. Sijsaeq baez yawj, gij suliu daj nyapnyaj gip ma deng raed baenz sam mbaw mbawbeiz, mbawbeiz dauq youq aen dendunggih iq daj vanzgi dendung giceh cek okdaeuj, song diuz densen lienz haeuj giz ndaw mauh cuengq miz song hot denciz. Vunz- ngoemx naenx haigven, mbawbeiz couh baenq hwnjdaeuj, gij rumz ci diuz cag mauhnyangj biufefe.

Vunzngoemx duet aen mauh neix roengz, daenj youq gwnz gyaeuj daxmeh, daxmeh vunzngoemx lumj ndaej gwn dangzrwi nei, ndawsim diemzsisi. Daxmeh vunzngoemx lumh aen beizden iq cang youq mauhnyangj angq naeuz:“Aen uk daeglwg gou caen cinglingz ha!” Daxboh vunzngoemx ngeiz naeuz:“Hw，gangj mbouj dingh beizden iq neix dwg daj gizlawz gip ma caiq cang youq ndaw mauhnyangj ne! Gou couh mbouj saenq de miz cungj bonjsaeh neix!” Daxmeh vunzngoemx fwt naeuz:“Ndaek vunz mwngz, baenzlawz yienghneix gangj daeglwg ha?” Vunzngoemx gojnaengz dingq rox bohmeh de gangj maz, baenqndang haeuj rug, bohmeh de lau de youh haep dou, muengz riengz haeujbae. Vunzngoemx youh gaem aen mauhnyangj miz beizden okdaeuj hawj boh de yawj. Bohmeh vunzngoemx raen ndaw rug daeglwg luenhlablab, maz cungj vut youq gwnz namh, hongdawz caeuq gij nyapnyaj vunz- ngoemx gip dauq gyaux youq itheij, geij aen vanzgi dendung giceh deng cek. Daxboh vunzngoemx gvaengzda dumz lo, aen sim gyoetcaep de sikhaek yungz bae, raeujrub hwnjdaeuj.

Daxboh vunzngoemx haenh naeuz:“Daeglwg dou caen coengmingz! Bang de ra boux saefouh hag gij dinfwngz goj doeklaeng de ndaej ciengx swhgeij!”Daxmeh vunzngoemx ngaek- gyaeuj doengzeiq.

Gvaq geij bi, vunzngoemx youq gwnz gai hai aen diemq cienmonz coih gyahden. Haicieng ngoenzhaenx cuengq bauqrengh haujlai nanz, boh- meh vunzngoemx bungj aen ndoengj cang miz haujlai dangz, bouxlawz byaij gvaq cungj faen hawj, angqvauvau dwk riu, lumj gvaq ndwencieng nei.