Mboengqneix, heiq “moedlaenz” yienghnduj Bouxcuengh 《Suhgi Daeuj Daengz Mbanjrungh Gou》 ndaej Cingsih gaiq daeuz Bouxcuengh “moedlaenz” vwnzyi comzyienj it daengjciengj, neix dwg gij cozbinj saeqsim guhbaenz he, dwg Cingsih Si youq bineix sam nyied sam bangfuz Heiqcuengh 《Gij Gyaez Daxmeh》 youq Guengjsae Yinzminz Gvangjbo Dendaiz boq ok ndaej ndei doeklaeng cauhguh haenx.

Caeuq Heiqcuengh gaxgonq yungh vaiqbanj、 boq、 rag、 danz、 doiq ciengq daengj biujyienj hingzsik mbouj doengz, aen heiq neix cujyau doenggvaq “moedlaenz” yienghnduj Bouxcuengh cienzciengq fuengsik, lwnhgangj gij gojgaeq “suhgi daih’it” youq mbanj daengz mbanj gungzhoj roengzsim guh hong bangfuz, hawj yiengh mbanjbya、 saedceij beksingq fatseng bienqvaq hungloet, ndaej daengz vunzlai ndiep- gyaez. Gij diuh “moedlaenz” sugrox haenx, unqswnh haprwenz. Aen heiq neix baez hwnj daiz biujyienj, couh hawj bouxyawj yienhciengz saenq- daenh liux, ndaej daengz gyoengq vunzlai angqcoux caeuq haenh.

Ciuq cam rox, riengzdwk hong vut gungz gunggeng haeujlaeg doicaenh, Cingsih Siveij、 Si Cwngfuj giethab conzdungj minzcuz vwnzva dangdieg, cujciz buek canghheiq ak he cauhguh baenzdauq cozbinj “heiqdoj” maenhndei, gyalai senh- conz ligdoh, senhconz vut gungz gunggeng cwngcwz、 saehlaeh okhingz daengj, ndaej daengz vunzlai haengj- gyaez, hawj hong vut gungz gunggeng caeuq cwngcwz haeujlaeg simvunz, gyalai hawj vunzlai rox, caenh’itbouh gikfat gij doenghlig gyoengq ranz- gungzhoj buekguh doxhwnj、 cawj- doengh vut gungz, cauxbaenz gij heiqfaenh naekna roengzrengz buet siujgangh.

(Hij Cwngyungj Luz Gyangz)