Roen mbanj sohsangh bingz- bwd, daengroen baenz coij rongh- cangx, laeuz moq aen dem aen dajcang ndaej gyaqciq daegbied, aen huz hopheux daengx mbanj ndeu raemx sawyau laeyaengyaeng, gak cungj gofaex gova heuswdswd va hai hoengh, aendiengz laeuzbam ing bya dep raemx daengjdwt, aen byoqraemx yinhyoz riengz gij sing go byoq diuq ndaej angqyangz yinxvunz…… Byaij haeuj Mbanjneilij, yienghsiengq lajmbanj moq gyaeundei couh okyienh youq dangqnaj vunzraeuz.

Mbanjneilij dieg youq Yinzlij Cunh Dafungh Cin Sanglinz Yen, liz yienhsingz 6.5 goengleix gyae, miz 131 ranz gungh 623 vunz, bi 2013 ndwen 5, ndaej dingh guh Namzningz Si aenmbanj singzmbanj dungjcouz cunghab guhyiengh sawqdiemj. Youq mizgven danhvei gaep baihgwnz bangcoengh sonyinx lajde, aen mbanj neix aeu cungj ginghyingz vunqsik gunghswh+nungzhoh+diegsuen neix, nungzhoh doenggvaq aeu gij reihnaz bau guh haenx haeujguj gunghswh doengzcaez haifat nungzyez yawjgingj caeuq youqndwi lijyouz ciuhneix, doiq daengx mbanj nungzyez swngh- canj caeuq yienghsiengq aenmbanj guh doengjit gaijcoih. Geij bi neix daeuj, daengx mbanj 125 aen ranz gonqlaeng guh bae ciengz、gaij cueng gaij dou, dajcaux gij gingj aenhuz、guh roen mbanj bu suijniz、raemxfwn raemxuq faenlae hidungj caeuq aendaemz cawqleix raemxuq haem lajnamh、an swlaizsuij haeuj ranz、aensuen yawjgingj ndaem faex ndaem va、goenggungh boiqdauq sezsih、hongsaeh hung hwngfat daengj 8 aen hanghmoeg guh ndaej swnhleih, yienghsiengq aenmbanj bienqvaq hungloet. Ciengzranz saek henjoiq、dingjranz lingqleq、yiemhranz ngaeugungj lumj gaeuvaiz、aencueng gaekdeu duzroeg caeuq gij yienghdoz dajcang lumj roeg- daengngoenz haenx, hawj yenzsu vwnzva “Bouxcuengh” doedyienh okdaeuj. Daengx mbanj mienhcik loegvaq dabdaengz 7000 lai bingz- fuengmij, doengzseiz lij guhbaenz le aen vwnzva fuzvu cungsim gvangq 2000 lai bingzfuengmij miz daeg- saek Bouxcuengh ndeu, boiq cawx le dennauj、densi、yingjdezgih、yaem- yiengj daengj doxgaiq dij ngaenz 10 fanh lai maenz ngaenz, daizheiq、giuzcangz ronghdaeng、veiswnghsiz daengj yienghyiengh guh miz caez. Gyoengq vunzmbanj naeuz, seizneix ndaw mbanj saedceij gig cwxcaih gig ansim, gingjsaek seiqhenz mbanj gyaeundei beij hawsingz ak, daihgya cungj gig habhoz!

Mbanjneilij gvihaeuj ndaw gvaengh Rangh Guhyiengh Nungzyez Daegsaek (Haedsim) Ciuhneix Yinz- lijhuz, ranghdieg neix gvaengh daengz Mbanjneilij、Mbanjvailij caeuq Mbanjcailij sam aen mbanj Yinzlij Cunh, hanghmoeg ciemq diegdeih 8000 moux, yaek gonqlaeng roengzngaenz 30 ik maenz, giva guh miz aensuen youqndwi gvaq ngoenz- gyaj ciengxndang、aensuen guh- yiengh nungzyez daegsaek、aensuen ndaemganq doenghgo dijbauj noix miz、aensuen mbaenj fuk minzcuz vwnzva、aensuen youzangq henz hamq Yinzhuz、dieg guhyiengh singz mbanj caemhcomz daengj roek daih dieg goengnaengz cawjdaez neix, cauxguh 5A gaep gingjgih moq swnghdai nungzyez caeuq youqndwi gvaq ngoenzgyaj dox giethab ndeu. Daengz bi 2018 guh sat le, ndaej sou 600 vunz guhhong, lijyouz cunghab souhaeuj ndaej dabdaengz moix bi 1.5 ik maenz, gij nungzhoh haeujguj haenx ndaej daengz seiq cingz faenhoengz; nungzminz lij ndaej youq bakranz hwnjban lingx ngaenzhong, yiengh- neix mboujdan hawj saedceij vunz- mbanj gaijndei haujlai, souhaeuj caemh bi beij bi lai.