Byalozdoz youq dieg gapgyaiq Sanhyouj Cunh caeuq Bazdwz Cunh Vadung Cin Cingsih Si, youq henz goengloh ngeih gaep Cingsih daengz Namzningz, aenvih yiengh bya lumj duzlozdoz nei, ndigah ndaej aen mingzcoh neix. Dinbya, raemx Dahlungzdanz gvinx bae gvax dauq lumj diuz sai nei. Doenghnaz, aenmbanj, roennaz, dahrij doxdak, baenz gij gingjsaek doenghnaz hawj vunz maez. Aen gihdi guhyiengh makit dozfungh Vadung Cin Cingsih couh youq gizneix.

Byaij haeuj ndaw gihdi, raq heiq nungzyez daihneix coemjnaj gvaq- daeuj. Ndaw baenz baiz baenz baiz diengzhung caezcingj, mbaw makit heuoiq maj ndaej hawj vunz gyaez, bouxcawj gihdi Fungz Gveicinh cingq dawz gaeu makit ngamq maj okdaeuj haenx geujheux hwnj gwnz gyaq bae, buhvaq yindung saeknding youq ndaw diengz makit loegheu neix caen dwg yienhda lai, boux mehmbwk ak bisoq gvaq 60 bi neix youq gyang mbaw makit heuswgswg neix hix mbouj raen geq saekdi.

Boux mehmbwk ak mbouj geq neix couhdwg Fungz Gveicinh boux ndaej daengx guek “sam bet” hungzgizsouj bi 2017. De lij ndaej bouxvunz senhcin geiqseng daengx guek, Guengjsae “sam bet” hungz- gizsouj, Baksaek Si “sam bet” hungzgizsouj, Baksaek Si hwnjguh lajmbanj moq gaiq daeuz cib daih cauhnieb mingzsinghciengj, Cingsih Si gungcanjdangjyenz maenhndei gvaq. Fungz Gveicinh miz lai loh mingzdaeuz neix dwg gij yienghndei mehmbwk Vadung Cin, engq dwg gij yienghndei vunzlai cauhnieb Cing- sih.

Fungz Gveicinh, daengx ranz 4 boux vunz, song gvanbaz youq Gaivadung hai bouq gai cehfaen、 bouq gai denzriep, hai bouq ingjsiengq gvaq. Fungz Gveicinh bonjfaenh lij dang geiqseng conhgan gvaq, dahlwg youq daegbied gyauyuz hagdangz dang lauxsae, daeglwg bang guh seng’eiq, saedceij gvaq ndaej ndei vuenyungz.

Bi 2013, rox Cingsih Yiznungz Nungzyez Gunghswh aeu youq Vadung haifat makit canjnieb, Fungz Gveicinh sim naemj: Dangdieg diegcuengq- hoengq lai, hoeng ndaem makit noix, gyaqcienz youh bengz, vihmaz mbouj youq makit canjnieb guh bien faenzcieng hung ndeu ne?

Ceiqheiq caengz daengx bi geq gvaq bi. Bi 2013 ndwen 11, Fungz Gveicinh caeuq canghhaifat doxgap yiznungz gunghswh ciem habdoengz, yungh gij hingzsik diegnamh haeujguj, cauhlaeb aen hozcozse gihdi makit dozfungh Cingsih, dawz gij diegnamh lingzsanq Gaivadung 3 aen siujcuj 83 ranz nungzhoh cingjhab hwnjdaeuj, supnab 33 boux seyenz hwnjguh aen suen makit lijyouz yawjngonz swnghdai daihneix 200 moux comz dajndaem、 mbaetsou、 yawjngonz、 youqndwi、 gwnngaiz、 dozninz guh itheij.

“Mwh gihdi comz dajndaem、 buenz namh、 guh diengz dap gyaq, ngoenznaengz yungh vunzhong mauh- gvaq 100 boux. Bingzciengz ganq golwg、 dwk bwnh、 daet golwg、 coih nye daengj aeu ciengzseiz yungh vunzhong mehmbwk daih’iek 30 boux, gyoengq vunzhong mehmbwk cienzhong ndwen 2000 maenz baedauq.” Fungz Gveicinh gaisau naeuz. Gaenh bi neix daeuj, Aen Hozcozse Ciennieb Makit Dozfungh Vadung Cin doenggvaq gij fuengsik “diegnamh + ngaenzcienz + goeng- rengz haeujguj”, mboujduenh supnab hozcozse seyenz. Bi 2016, aen cin neix gungh miz 220 ranz 680 boux gyahaeuj daengz hangznieb ndaem makit, saedyienh le vut gungz baenz miz.

“Gou gig gyo’mbaiq Cejfungz, danghnaeuz de mbouj soulouz gou bouxguhnaz ndang bingh neix, lwg gou couh mbouj ndaej hwnjhag lo.” Sanhyouj Cunh Mbanjfwj ranz- gungzhoj Vangz Yaufeih naeuz. Vangz Yaufeih miz song boux lwg, bi 2016, dahlwg hung gauj hwnj cunghconh daengz Namzningz doegsaw, daeglwg iq youq Cingsih Samcung doegsaw. Hoeng, gaiq ga de miz fungheiq, laemzmboujseiz couh fat bingh, guh hong mbouj cingqciengz, souhaeuj noix baenzlawz gung ndaej hawj lwg doegsaw? Fungz Gveicinh rox gienh saeh neix le dangseiz sikhaek bae daengz ranz de, youq baihnaj song boux lwg de naeuz: “Siujvangz, gvanbaz sou ngoenzcog hainduj bae suen makit gou guh hong ba, cienzsaw lwg gou bang sou ok gonq.” Dingqnyi coenz vah neix, daengx ranz gig gamjdoengh. Daj neix gvaqlaeng, gvanbaz Vangz Yaufeih ngoenznaengz cungj daengz suen makit Fungz Gveicinh guh hong, moix vunz cienzhong ndwen 2100 maenz. Bi- gvaq cienzhong gungh souhaeuj 4 fanh lai maenz, gyahwnj gij souhaeuj bingzciengz ndaem byaek, Vangz Yaufeih swnhleih hawj lwg hwnjhag, lij ndaej vut gungz lo.

Fungz Gveicinh cimz daengz diemzvan haenx itcig dawz gij raeuj nit gyoengq vunzlai cuengq ndaw sim. Bi 2016, aen si neix hainduj “canjnieb ma ranz, louz roengz daxmeh” gunghcwngz, Fungz Gveicinh sim naemj: “Gaenh bi neix daeuj, vihliux geiqseng, haujlai daxmeh bouxcoz mbouj ndaej mbouj vut lwgnyez youq ranz, byaij hwnj diuz roen okrog guh hong, danghnaeuz louz doenghgij daxmeh bouxcoz neix roengzdaeuj, supnab bae makit canjnieb gihdi guh hong, yienghneix suen makit mbouj dwg mbouj giepnoix goengrengz ha? Lwgnyez louz mbanj mbouj dwg noix la?”

Bineix ndwencieng, domh seiz ndei gyoengq daxmeh bouxcoz ma ranz gvaq cieng, Fungz Gveicinh baengh mehmbwk siujngeg danbauj boujdiep daigvanj leih beksingq cwngcwz, haeuj ranz haeuj hoh, dungyenz gyoengq daxmeh bouxcoz henzgyawj, camgya boujdiep daigvanj haeujguj faen- hoengz. Ndwen lai seizgan, aen cin neix gungh miz 33 boux mehmbwk gyahaeuj hozcozse. Doengzseiz, Fungz Gveicinh lij doenggvaq aen bingzdaiz yungzswh Cingsih ndaej siujngeg saenqyungh daigvanj 150 fanh maenz, faenhoengz hawj 30 ranz ranzgungzhoj moix ranz 5000 maenz.

“Lwgnyez ngamq ndaej bi ndeu hainduj, gou couh itcig youq Sinhcin dajgoeng, lwgnyez hwnj daengz sam nienzgaep gou caengz ndaej bae ciep de saek baez gvaq, ndaw sim caen gvaq mbouj ndaej bae. Bineix ndaej youq suen makit Cejfungz guh hong, lingx ndaej cienzhong cingqciengz, doengzseiz lij ndaej goq vunzranz, gou roxnyinh gig habhoz!” Youq douhung hagdangz, Hij Mujlanz yien fwngz lwgnyez angqyangz naeuz.

“Gaxgonq mwh gihdi comz dajndaem、 buenz namh、 guh diengz dap gyaq dwg seiz ceiq giep vunzhong yungh, seizneix, louz roengz doenghgij daxmeh bouxcoz neix, dou couh mbouj giep vunzhong yungh lo. Bineix, gou itdingh aeu caeuq gyoengq cejnuengx guh mbat hung ndeu, ceng’aeu hawj engq lai vunz vut gungz.” Fungz Gveicinh gagsaenq naeuz.

“Bi’gvaq, makit gig ndeigai, makit doenggvaq densangh siugai daengz 15000 gaen, soqcienz gai ndaej 15 fanh maenz.” Guengjsae Cingsih Ganjhaw Denswj Sanghvu Youjhan Gunghswh cungjginghlij Liu Ciyoz naeuz. Ndaej ik densangh bang gai, makit gihdi ndeigai lo, ndaw suen gak hangh lijyouz yawjngonz hanghmoeg hix ndaej haengjgyaez lai. Bi 2016, suen makit lijyouz yawjngonz swnghdai Fungz Gveicinh 540 moux haenx, miz 450 moux makit dawz mak, moix moux canjliengh daih’iek 3500 gaen, ciuq gaen 15 maenz suenq, cungjcanjciz daengz 2300 lai fanh maenz, daiqdoengh 39 ranz ranz- gungzhoj vut gungz.

“Bineix, youq gij giekdaej ndaem makit、 mbaetsou、 yawjngonz、 youq- ndwi、 gwnngaiz、 dozninz guh itheij, dou yaek doi ok faengxhom、 ceiz daengj baenzdauq gijgwn ndei yenz- swnghdai, dajcauh ‘aen gihdi yawjngonz youqndwi hawsingz miz daegsaek’ binjbaiz daejniemh nungz- yez、 yawjngonz nungzyez、 daegsaek nungzyez dox giethab.”Fungz Gvei- cinh naeuz.

Raq rumz raeujrubrub ci gvaq- daeuj, mbawdoz gviveh suen makit Dozfungh ndaw fwngz Fungz Gveicinh menhmenh mbehai, ndaw doz dwg aen mbanj doenghnaz yawjngonz makit gaiq dieg he ciemq dieg mienhcik 1368 moux faen baenz yaenqsiengq makit、 cin iq makit、 suen makit、 doenghnaz swnghdai、 roenloeg swnghdai、 aen gihdi goh- yenz makit daengj goengnaengz faen gih yienh youq baihnaj dou, doiqneix, Fungz Gveicinh gig miz rengznyangq caeuq maqmuengh.