Loegnyied doenghva rang

Miuz maj sang youh soh

Bibi hai va moq

Mak youh oq youh diemz

“Roek it” cietlwgnyez

Gyoengqde angqfwngfwng

Daihgya fwngz yien fwngz

De caeuq mwngz diuqfoux

Dou hwnj daiz ciengq go

Vunzlai goj caemh haenh

Caez hawj dou daj faen

Bak faen ndaej goujgouj

Lwgnyez maj ndaej vaiq

Yaek aeu sai hwnzngoenz

Hag rox byaij gwnz roen

Mbouj lau oen bae nyaemz

Haeuj hagdangz doegsaw

Dingq coenzgawq bouxgyauq

Aeu ndiepgyaez bouxlaux

Rox dauhleix guh vunz

Sou ngoenzngoenz maj hung

Yunghsim diz ndangdaej

Ndang cangq miz bonjsaeh

Ciepban daez rapnaek

Aeu hagsib Leiz Fungh

Yunghsim vih yinzminz

Roeg fwed maengh rox mbin

Daeh daek mbin bwnq meh

Hagsib aeu haeuj laeg

Eiq naek aeu hag doeng

Vunz cingsaenz aeu hoengh

Doengzseiz maedsaed guh

Lwgnyez hag dennauj

Gauj vangjloz gisuz

Bae onj lumj naengh ruz

Fuzvu yendaiva

Guekgya raeuz hungmbwk

Gizgiz dwg suenva

Sou riengz seizdaih maj

Caj sou guh saeuranz

Saedyienh Loqcunghgoz

Caezgya goj okrengz

Bouxcoz lai ndaemgeng

Saedceij engq vuenyungz

Angqhoh cietlwgnyez

Sim mbe lumj va langh

Byaij riengz gungcanjdangj

Baihnaj gvangqgumgum