Youh yaek daengz cietlwgnyez le, seizneix doiq gou daeuj gangj, aen ciet neix lumjnaeuz liz gou gyaerad lo. Hoeng, aen ciet neix hawj gou ngeix hwnj aen saeh gaxgonq.

Aen saeh gaxgonq lumj fangz- hwnz nei, riengz aen cietlwgnyez ungj haeuj simdaeuz gou, hawj gou ciuhvunz lumz mbouj ndaej.

Geiq ndaej aen cietlwgnyez ndeu, seizhaenx gou ngamq ndaej cib bi, miz lingjdauj yaek daeuj hagdangz dou ngonzyawj genjcaz. Hagdangz lingjdauj dou maqmuengh hagseng doengjit buhvaq, couh heuh moix boux hagseng dingh yaufuz moq, moix dauq buh 65 maenz ngaenz. Seizhaenx ranz gou gungzhoj, dawz mbouj ok baenzlai ngaenz. Gou mbouj roxsoq, couh caeuq daxmeh gou nauh hwnj- daeuj, itdingh yaek aeu cawx. Daxmeh gou heiqhwnj foedfoed, couh dub gaemxgienz ndeu coh baihlaeng mbaq gou. Gou ndatheiq baenz feiz couh buet ok ranz bae ndoj de.

Gou hoz daengjcengceng, byaij gvaq henz dah bae, sawqmwh gou yawjraen baihnaj dah miz hoenz hwnj- daeuj. Gou gipmuengz buet gvaqbae yawj, yenzlaiz dwg aen ciencangj hai moq ndeu.

Seizhaenx, ndaw uk gou couh ngeix daengz youq neix guh hong canh cienz bae cawx yaufuz. Doeklaeng gou gag bae ra lauxbanj, caeuq de dox- yaeng. Lauxbanj yawj gou ndang cangq rengz hung, laihnaeuz gou ndaej cib roek caet bi lo, couh hawj go bae buen cien, moix buen ndaej 400 gonj cien couh ndaej 10 maenz ngaenz.

Gou yungh cuengqhag duenh seizgan neix daeuj guh hong, lauxsae caeuq vunz ranz gou cungj mbouj rox. Guh 5 ngoenz, buen ndaej 4000 gonj cien, couh lingx ndaej bak maenz ngaenz lo, ndaw sim gou angq dangq- maz, goq mbouj hwnj baksieng gwnz fwngz, couh buet dwk dauqma gangj hawj daxmeh gou nyi.

Daxmeh raen gou hanh lae laeng buh dumz, youh raen gwnz fwngz gou deng sieng, gamz raemxda doiq gou gangj:“Lwg ha, neix dwg daxmeh loek lo, gou mbouj wnggai dub mwngz, mwngz lij oiq baenzneix couh deng yienghneix dwgrengz. Gvaiq gou mbouj miz bonjsaeh, ndaw ranz dou saedcaih hojndoq lai, dawz mbouj ok ngaenz hawj mwngz bae cawx yaufuz moq!” Hoeng, seizhaenx gou roxnyinh swhgeij miznaj baenzmaz, couh nai daxmeh gou naeuz:“Daxmeh gaej siengsim, gou ndaej baengh rengz swhgeij canh ndaej ngaenz dwg saeh ndei, youh mbouj guhcaeg famhfap. Daxmeh cijndei danq naeuz:“Yienz- naeuz baenzneix gangj mbouj loeng, hoeng seizneix mwngz aeu dwgrengz doegsaw cij dwg saeh cingq, hag ndei cihsiz byaij ok ranzmbanj, bae yawj- yawj seiqgyaiq baihrog. Gou doeklaeng mboujdan ndaemnaz ndwi, hix guh saeh wnq lumj ciengx lai di gaeqbit bae haw gai canh ngaenz.” Gou got daxmeh naeuz: “Daxmeh ceiq ndei!”

Seizhaenx gvaqlaeng, gou lumj- naeuz mingzbeg haujlai dauhleix nei, bienq ndaej giengiengz hwnjdaeuj, miz maz saeh caiq hix mbouj dwg cij rox daej ndwi, mboujlwnh bungz daengz maz saehcingz hojnanz, gou cungj baengh rengz swhgeij dingj gvaqbae.