Dingqnaeuz, Denhcinh gaxgonq miz gij dieg deng ep guh co’gyaiq, seizneix lij miz haujlai gij ranz gak guek guh louzce roengzdaeuj, vunz cungj heuh dieg neix guh “Aen Bozlanjvei Gyoengq Gencuz Fanh Guek”. Gou youq Baekging ngoenz- ngoenz raen gij ranz ciuhgeq Cung- guek, caen siengj bae Denhcinh yawjyawj. Mboengqneix gou cungj- suenq loq ndaej baenzcaen, caenx ndaej seizgan bae Denhcinh cet mbat ndeu.

Ngoenz gou bae Denhcinh mbouj dwg ngoenzsinghgiz, gyoengqvunz boux hwnjban bae hwnjban, boux bae hagdangz bae hagdangz, gwnz gai mbouj raen miz maz vunz lumj gou yienghneix fouz saeh soeng’yungz byaijcet. Mbwn sangj, gai hoengq, rumz swnh, gizneix yienznaeuz liz Baekging gyawj, hoeng cungj yawj mbouj daengz gij ciengzmienh nauh- yied. Gizneix caemnengneng, couh lumj seiziq youq laj goreiz ndaw mbanj gangjgoj youqliengz nei cwxcaih.

Daj camhhojceh Denhcinh roengz ci, gou it loh doq byaij doq cimngonz gij ranzlaeuz gak cungj gak yiengh, ndawsim angqfwngfwng. Doeklaeng daeuj daengz Cinhvanh Gvangjcangz. Cinhvanh Gvangjcangz couh youq henz dah Haijhoz, daj gwnz sang yawj, daengx aen gvangjcangz vax nding ciengz hau, daiq miz gij funggek Fazgoz Mansaiwj. Gij saeh mizyinx dwg, youq gizdieg sang daemq mbouj doxdoengz ndaej yawj ok gij yienghceij mbouj doxdoengz. Aenvih mbouj dwg ngoenzsinghgiz, seizneix vunzhek gig noix, cij miz di bouxlaux daiq bouxlan naengh youq henz dah guhcaemz.

Byaij ok Cinhvanh Gvangjcangz, gou ndij henz Haijhoz byaij, duzroeg gwnz faex henz dah cici cetcet ciuz mbouj dingz, rumz ci gvaqdaeuj liengzsisi, roxnyinh sim sangj dangq- maz. Yaepyet gou daeuj daengz dieggyaiq Fungcingz Yidali. Ranz gizneix dwg gij funggek ciuhgeq Yidali, byaij haeuj ndawde bae, couh lumj byaij youq dieg Yidali nei. Gizneix haujlai ranz gaeuq co hawj vunz guh dajgai lo. Gou nyinhnaeuz gij ranz neix ndaej co okbae caen ndei, gyoengqvunz bingzciengz cij menh- menh roxnyinh gij ranz neix miz gyaciz, cij nyienh bae baujhoh gyoengqde, caemhcaiq vunz diegrog youh ndaej daeuj cet.

Byaij ok dieggyaiq Fungcingz Yidali, gou yamq hwnj gij giuz gak miz daegsaek gwnz Haijhoz. Diuz daih’it dwg Giuzgaijfang. Neix dwg bi 1902 vunz Fazgoz yauhgiuz Cingciuz cwngfuj hwnjguh. Miz aen giuz heuh- guh Giuzfanhguek, aenvih seizhaenx Denhcinh deng ep co dieg hawj 9 aen guekgya, diuz giuz neix couh baenz- neix ndaej coh. Denhcinh lij miz Giuzdaguh、 Giuzcinbu, gwnz giuz miz haujlai rindeu, ndeiyawj raixcaix. Baihlaeng dwg Giuzgimdang, aeu baenz diuz baenz diuz faex laebbaenz, byaij hwnjbae lij ndaej nyi gij sing faex “guglug guglug” cienz okdaeuj.

Byaij gvaq gwnz giuz neix, gou daeuj daengz diuz Gai Laux Vwnzva Denhcinh. Gij ranz gwnz haw dwg ranz gaeuq guek raeuz, youq baihndaw gai gij doxgaiq miz daegsaek Denhcinh, nienzveh、bauswj ma mbouj leix、vunz aeu namh nyaenj daengjdaengj. Youq gwnz laeuz, lij miz haujlai dieg dingq singqsing. Vunz naeuz daeuj daengz Denhcinh mbouj dingqdingq singqsing couh lumj caengz daeuj nei, vih coenz vah neix gou couh cawx biuq bae dingq mbat ndeu. Ndawde vunz haemq noix, hoeng gij yenjyenz yienj ndaej gig nyinhcaen. Gaxgonq youq gwnz densi yawj seiz, mbouj raen miz maz dawzyinx, hoeng youq dangqnaj yawj couh hawj vunz cungj roxnyinh simmaengx dangqmaz. Gou ngeix: Doenghbaez mbouj miz densi denyingj yawj, gizneix itdingh vunz lai vunz daih, caenxnyubnyub.

Dingq sat singqsing, gou cet bae daengz Ranzmeng, aen ranz neix yungh 4000 lai gienh meng gaeuq、400 lai gienh hanbwzyi、40 lai dun suijcingh caeuq majnauj guhbaenz. Dingqnyi naeuz geij cien bi daeuj mbouj doengz lizsij seizgeiz gak loih meng haemq mizmingz cungj miz yo youq ndaw ranz neix, gyaciz daemx mbwn.

Doeklaeng gou youh byaij bae Vujdadau, gizneix caeuq Dieg Fung- cingz Yidali doxdoengz miz haujlai ranz funggek Ouhcouh, gij mbouj doengz dwg gizneix ranz engqgya lai, funggek hix engqgya lai cungj lai yiengh, soqlaiz vunz cungj heuh de guh “Fanhguek Gencuz Boz- lanjyenz”.

Gyanghaemh naengh hwnj aen mozdenhlunz “Lwgda Denhcinh” couh ndaej yawj doh daengx aen singz Denhcinh, ronghdaeng lumj ndau- ndeiq gwnz mbwn deihndwtndwt, raemx dah lumj diuz Yinzhoz hausaksak，baihgyae dwg ranz gaeuq caemrwgrwg, baihgyawj dwg ranz moq lengj, seizgan nem lizsij couh yienghneix gyauxheuz, gyonj doxcaeuq cek mbouj hai.

Denhcinh roenloh gvangqlangh, diegyouz doxgyawj, mbouj yungh mwngz sien aeu siengj ndei baenzlawz byaij baenzlawz cet, youq ndaw singz seizbienh cetcet hix roxnyinh gig mizyinx. Ngoenz lawz mwngz ndaej- hoengq hix daeuj yawjyawj, cijaeu miz sim cim, gizgiz cungj dwg dieg gyaeu ha!