Youq Namzningz Si Yungzningz Gih dieg baihnamz 18 goengleix gyae de, miz aen mbanj ndeu sieng youq ndaw bya heu raemx saw, roen haeuj mbanj bingzbwd gvangqyub, vwnzva Bouxcuengh、fwenleuzloh gag miz daegsaek. Vunzmbanj gaenxhong simsoh、gyanghongh caezcingj seuqcingh、seiqhenz caemdingh hawj vunz simniemh mbouj dingz.

Gizneix couh dwg Yungzningz Gih Sinhgyangh Cin Mbanjnazmungz, daengx mbanj 162 ranz gungh 805 vunz. Dangguh mbanj guhyiengh cunghab Namzningz Si ndawde aen ndeu, Mbanjnazmungz yinzvwnz lizsij caeuq gingjyawj swyenz cungj gyaeundei daegbied. Youq gaij guh yiengh mbanj seiz, Mbanjnazmungz youq goekdaej yiengh gaeuq aen- mbanj gwnzde bae dajveh baijbouh, miz cauhmoq louz daegsaek, guh ndei ngaraemx、roenbo、luengqhongh、henz roen ndaem faex va doengh gij hong neix. Daengx mbanj 170 aen ranz guh le rogciengz bae moq, doed ok le daegsaek ranzcaep Bouxcuengh caeuq yiengh“dingjranz lingq”; guh le aen gvangjcangz leuzloh faen miz roqluengq leuzloh caeuq diegdangz hozdung song bouhfaenh gungh miz 1186.73m2 ndeu; Huzcihcingh caeuq Huznanzluz song giz diegraemx gungh 21260m2 neix caemh ginggvaq beuj boengz caeuq lawh raemx, hawj raemxhuz sawyau raen daej, lumj naednyawh sieng ndaw rungh nei. Seizneix byaij haeux Mbanj- nazmungz, couh ndaej yawjraen gij ranz aen dem aen baenz caengz baenz caengz dwk baizlele moq- sagsag, baihnaj bakdou giuziq raemxlae, faex heu raemhrwd, faexcuk ngauznged bibuengq, gova baenz caz hoenghhai; vunzmbanj mbangj sam haj boux humx naengh gangjgoj, mbangj dwkgiuz doxdax, mbangj diuq foux gvangjcangz; youq ndaw daemzdajndaem Huznanzluz、Huzcihcingh, ndaem miz gak cungj gak yiengh doenghgo ndaw raemx maj, variengroeg、 go’ngox、 go- ngaeux daengj, youq ndaw raemx yienh’ok baenz benq baenz benq loegheu; gij roqluengq yawjgingj、aendiengz、giuzgungj caeuq gij ngaeuz dauqdingq ndaw raemx doxdaengh baenz gingj ndei；henz roen ndaw mbanj gek mbouj gyae geijlai couh daengj miz aen daengroen ndatndit ndeu, doengx- haemh ronghcangcang. Youq ndaw aenmbanj gyaeundei lumj veh neix menhmenh youzbyaij, mbouj miz gyukndwt, caenh miz cungj dingh- caem ndeu……

Mbanjnazmungz 500 bi gaxgonq couh miz vunz senj daeuj youq, lizsij gyaenanz, gyoebbaenz le vwnzva Bouxcuengh haemq daegbied, fung- sug sibgvenq eu fwenleuzloh caeuq hawfwen boizgiu, cienzciengq bak bi, gyawjgyae mizmingz. Moix bi youq Aenciet Yunghningz Bouxcuengh Betyaem Vwnzva Lizyouz geizgan, Mbanjnazmungz caemh doengzseiz guh “angq youz lajmbanj”、“gijgwn daegsaek cimzgwn” daengj haujlai hozdung, hawj vunzmbanj seiqhenz caeuq hekyouz ndaej yienhciengz bae camgya guh gaeb byanouq、gyaep mou、mbaet mak、gwn makfeiz daengj doxdax, dingq fwenleuzloh doiq fwen, bae caep yiuzmaenz saz maenz、yaeb byaekcwx、vad bez daengj, hawj gij ndaejgeiq mizyinx ndaw uk dauq yienh okdaeuj, caemh ndaej naengh youq gyanghongh nungzgyahloz ndaw mbanj, cimz gwn gij dang haekfeih gaeqdoj、saejlab gag guh、byaek singjsien ngamq daj ndaw suen mbaet ma haenx, hawj mwngz miz cungj cwxcaih sim’angq ndeu.