Mbwk:

Ngoenz caenh bae gungxgoeg,

Gyangngoenz doek couh ma;

Gohgi dwg gijmaz,

Dahnuengx caen mbouj rox.

Sai:

Nuengx cam coenz yienghneix,

Go mbouj heih deng gaz;

Soujgih naep gyaeujvaq,

Rog bienqvaq cungj rox.

Mbwk:

Gaxgonq gij seizdaih,

Gaiqgaiq mbouj fazdaz;

Aeu gwed liu gwed haz,

Byaij geij goengq bya hung.

Sai:

Seizneix seizdaih moq,

Gohgi caen fazdaz;

Gaiqgaiq yendaiva,

Guh gijmaz cungj heih.

Mbwk:

Ngeix gaxgonq hwnjdaeuj,

Fouz dienh caen dwgrengz;

Fong buh lumj damengz,

Hojyouz bengz dangqmaz.

Sai:

Seizneix yendaiva,

Gijmaz mbouj yungh you;

Cawj byaek caeuq cawj haeux,

Noix yungh cauq caeuq feiz.

Mbwk:

Ngeix gaxgonq hwnjdaeuj,

Gyoengqraeuz caen mbouj dij;

Guh hong mbouj miz ci,

Didi cungj byaij bae.

Sai:

Gwn haeux mbouj yungh ndaem,

Daeng rongh mbouj yungh feiz;

Naenx gaihgvanh couh ndaej,

Swlaizsuij bae ranz.

Mbwk:

Bae guh hong dauqma,

Aeu ra hanz rap doengj;

Doengjmbaq mbouj ndaej hoengq,

Cuengq doengj youh rap gyoi.

Sai:

Seizneix sinhsizdai,

Gaiqgaiq heuh ci daeuj;

Bae cawx gij haeuxcaeux,

Lij aeu ci soengq ma.

Mbwk:

Gohgi yendaiva,

Gijmaz cungj fazdaz;

Seizneix raeuz bae naz,

Ndaemnaz mbouj gungj hwet.

Sai:

Yamq haeuj sinhsizdai,

Gaiqmaz mbouj yungh you;

Denswzluz cawj souh,

Cungj mbouj aeu you caep.

Mbwk:

Yamq haeuj sinhsizdai,

Gaiqgaiq cungj yungzheih;

Bouxguhnaz ndaej leih,

Bouxseng’eiq fatcaiz.

Sai:

Gohgi yendaiva,

Gijmaz cungj fazcanj;

Ngaenz miz gihvei canh,

Lengqlengq cungj fanzyungz.

Mbwk:

Gohgi yendaiva,

Guh gijmaz cungj heih;

Ndaemnaz caeuq ndaemreih,

Noix mbouj ndaej gohgi.

Sai:

Gyoengqraeuz haeuj siujgangh,

Gungcanjdangj aencingz;

Docih Siz Ginbingz,

Suijbingz swnghhoz sang.

Mbwk:

Gohgi caen maenh’ak,

Caezgya cungj doxlwnh;

Veisingh ndaej mbin mbwn,

Laeng doz vunz hwnj riengz.