5 nyied 20 hauh, youq Liujcouh Si Yungzsuij Myauzcuz Swciyen Miengsonglungz Gingjgih, bak dah lwgsau gyaeundei daenj conzdungj swjcan, baij ok gak cungj yienghceij gyaeundei, langhbaij hauxseng gyaeundei okdaeuj, anghhoh aen gingjgih neix gawjbanh daih’it aen ciet biujbeg“520”.

Ciuq cam rox, diuz giuz bohliz ndaw gingjgih neix dwg Guengjsae diuz giuz daih’it diuqvenj bohliz, giuz raez 199.9 mij, giz ceiq sang 52.0 mij, gij eiqsei de dwg cijaeu daihdamj sing hung dwk biujbeg “gou maij mwngz”, daihdamj byaij gvaq diuz giuz neix, song boux vunz doxmaij couh ndaej dingj nanz baenzseiq（Vahgun 199.9 gij yaem doxluj de）, ndigah diuz giuz neix hix heuhguh “giuz biujbeg”.

（Gungh Siengzyouj/龚祥友）