Daxmeh laux lo, goujcib lai bi lo. De naeuz de 15 bi haq hawj daxboh gou, 19 bi seng beixlaux gou. Caiq doeklaeng, geij boux lwg gonqlaeng okseng. Bihaenx saedceij gvaq ndaej hojndoq lai, daxmeh vih ciengx dou geij boux beixnuengx haenqrengz guh hong, son dou guh vunz, soengq dou doegsaw. Beixnuengx dou majhung lo, rox baengh gij bonjsaeh swhgeij ra hong guh canh ngaenz baenzranz lo, daengz seizneix ndaw ranz dou lwg baenzbang, lan baenzgyoengq.

Seizneix aen ndang daxmeh mbouj lumj gaxgonq cangq lo. De caiq hix mbouj dwg bihaenx dah lwgsau lengj ndaw mbanj lo, caiq hix mbouj dwg boux yah soh meh soh ndaw mbanj cungj haenh gyaeundei haenx lo. Guh lwglan de, raeuz cawz le danq saedceij fouzcingz, engqlai couhdwg dawz haujlai gyaez hawj vunzlaux.

Vihliux fuengbienh daxmeh swnghhoz, gou lai cang aen daeng ceznwngz ndeu, cijaeu de baez hai gaihgvanh, ndaw rug couh rongh- sagsag. Daxmeh byaij mbouj bienh, gou cawx diuz dwngx daiq miz goengnaengz ciuqrongh ndeu hawj de. Ga daxmeh mbouj lingzbienh, gyaeujhoq indot gaeuz mbouj ndaej, gou cawx aen eij ndaej naengh okhaex ndeu hawj de.

Raeuz guh ndei gij cinjbi sojmiz, danghnaeuz ngoenzlawz daxmeh swnghhoz mbouj ndaej gag leix lo, raeuz lij lumj doenghbaez nei ciuqgoq de, itdingh mbouj hawj de souh saekdi gig, ansim gvaq bigeq, mbouj gangj cienzngaenz rim ranz, hoeng caenhliengh hawj daxmeh gwn ndei daenj ndei, moix ngoenz angqvauvau.