Gaenh dangzcangj miz aen mbanj he heuhguh Mbanjvuengz. Ndaw mbanj miz boux vunz he heuhguh Vangzciz, Vangzciz ndaw ranz sam boux vunz, gvanbaz caeuq daeglwg ndeu. 10 bi gaxgonq, 3 boux de lij youq ranzvax, ndaem 10 moux oij, ndaw ranz hojndoq, cawx it mbouj ndaej ngeih. Hoeng ranz neix cibfaen doxhuz, saedceij gvaq ndaej haemq vuenyungz.

Bihaenx, miz ngoenz he, yah Vangzciz doiq Vangzciz naeuz:“Ndaw mbanj ranzlaeuz daengjcapcap, raeuz lij youq ranzvax, daigvanj hix aeu guh laeuz moq.” Vangzciz naeuz:“Ndei. Gou gag miz banhfap loengh ndaej cienz.” Yah Vangzciz gienq naeuz:“Caeg ciengj famhfap, mwngz gaej guh.” Vangzciz riu naeuz:“Boux mingzbeg mbouj guh saeh amq, boux miz bonjsaeh mbouj bae caegciengj. Mwngz bae ra vunz senj ngoenzndei hawj raeuz, raeuz sikhaek guh laeuz moq caeuq hai aen diemq sou dietvaih ndeu!”

3 ndwen gvaqbae lo, Vangzciz cingj laeuj haeuj ranz moq, nda 30 daiz. Caenyoux daeuj raen laj laeuz moq lij miz dieg dingz ci, haenh mbouj dingz bak. Seiz gwn haeux, caenyoux boux cam boux, siengj rox gij cienz guh laeuz moq Vangzciz daj gyawz daeuj. Saedcaih geizheih, ndaw gyoengqde fouz vunz ciq cienz hawj Vangzciz.

Ngoenz he, yahmaex Vangzciz doiq Vangzciz naeuz:“Miz laeuz moq le, wnggai aeu lwgbawx lobw.” Vangzciz angq naeuz:“Mwngz siengj umj lan la? Ndei, heuh Daegcouj gvaqdaeuj.”

Daegcouj daeuj le, cam:“Bohmeh, miz maz saeh?” Vangzciz naeuz:“Lwg ha, bineix mwngz ndaej 25 bi lo. Mbauq hung aeu yah, sau hung haq vunz. Mwngz siengj sien aeu yah roxnaeuz sien cawx ci?” Daegcouj najhoengz naeuz:“Boh, gvaq 2 bi gou menh baenzgya hix mbouj ceiz. Ndwen gonq gou ngamq lingx ndaej gyasij- cwng. Gou siengj cawx ci gonq. Cij dwg seizneix ranz raeuz mbouj miz baenzlai cienz.” “Lwg ha, mwngz sien aeu yah caiq cawx ci ndei lai, ndwenngoenz lumj raemx lae bae, seiz hauxseng vad gvaqbae vaiq lai bw……” Daegcouj nyinhcaen dwk naeuz:“Boh, miz ranz miz ci gya naengzganq, dahsau cij ganq daeuj doh bw.” Vangzciz dingq le, riu naeuz:“Ndei. Sien cawx gyaq ci yinh huq hawj mwngz guh seng’eiq, baezlaeng miz cienz caiq cawx ci doz hek.”

Gvaq ndaej buenq ndwen, Daegcouj hai ci moq yinh huq baebae dauqdauq. Caenyoux raen le, gig da- nding. Daegcouj ndaej 27 bi seiz, habhoz aeu ndaej dah gyaeu ndeu daeuj guh yah. Doxaeu gaxgonq, Daegcouj hawj laex hawj ranz dahsau 3 fanh maenz, dajcang rug moq caeuq cingj laeuj gungh yungh bae 12 fanh lai maenz. Miz di caenyoux hozhaenz ndaej ngveihda yaek buet okdaeuj bae. Miz boux gyaengj ndeu naeuz:“Ranz de daj gyawz ndaej baenzlai cienz daeuj? Gij cienz de lau dwg daj loh mbouj cingqdangq ndaej daeuj bw.” Miz boux ndeu heuhguh Vangzluz, caegcaeg cazyawj Vangzciz.

Vangz mehbaj Mbanjvuengz miz dahlwg ndeu 16 bi, geij ndwen gonq baenzbingh bae yihyen yw bingh, cienq le geij aen yihyen hung. Gyoengq canghyw cungj duenq naeuz ndaej binghbwzhez, aeu ok 30 fanh maenz cienq bae Swcigih Yihgohda yihyen yw bingh, goulau yw ndaej ndei.

Vangz mehbaj ngoenzngoenz youheiq lae raemxda. Miz ngoenz he, de bae caeuq Vangzciz doxyaeng baenzlawz comz ngaenz yw bingh dahlwg, de danq naeuz:“Ranz dou mbouj miz baenzlai ngaenz, cijndei daeuj cam mwngz……” Vangzciz riu naeuz:“Daxbaj cuengqsim, ngoenzlawz bae yw bingh, gou aemq 30 fanh maenz caeuq sou bae!” “Daxau, neix mbouj dwg gangjriu ba?” Vangzciz cingqging naeuz:“Bouxsai gangj vah suenq vah, couh nyaenx dingh lo!”

Ngoenz daihsam, caen dahraix, Vangzciz aemq 30 fanh maenz caeuq mehbaj daiq dahlwg dap hojceh bae Yihgohda yw bingh lo.

Ngoenz daihseiq lajbyongh- ngoenz, Vangzciz dauqma ndaw mbanj lo. De baez haeuj ranz, raen miz song boux gingjcaz caeuq Vangzluz gaenq youq ranz caj de. De naj mbouj bienq saek aek mbouj diuq, riu coux 3 boux hek. Boux gingjcaz he cam Vangzciz:“Daeggo, miz vunz raen mwngz daj ranz Vangz Laujgouj caeg 30 fanh maenz okdaeuj, dwg caen lwi?” “Dwg caen. Vangz Laujgouj mbouj youq ranz, gou caenda raen Vangzciz caeg cienz okdaeuj.” Vangzluz ciengj dwk naeuz. Vangzciz mbouj vueng mbouj muengz naeuz:“Dwg ha, gou caen daj ndaw ranz de dawz 30 fanh maenz okdaeuj. Hoeng mbouj dwg caeg aeu. Ngoenzneix cingqndei beixnuengx dou angqcomz daeuj doxyaeng aeu banh saehdaih, gou daiq sou bae yawj mbat ndeu, sou couh rox goekgaen lo.”

Vangzciz daiq 3 boux de bae daengz ranz Vangz Laujgouj, caezgya baez yawj, da byaengq lo. Ding hung lumj aen ranz aeu haihoih nei, miz 24 boux beixnuengx gaenq naengh youq gwnz eijnaeng henz daiznduenraez. Vangz Laujgouj 90 bi lo, byoem hau caez, gokda nyaeuq lumj riengbya. Cam gij saeh Vangzciz dawz ngaenz ok, de riunyumnyum naeuz:“Gij vunz naengh youq neix cungj dwg beix- nuengx ndaw fuengzcug dou it meg roengzdaeuj, gungh 25 boux. Guek miz fazliz, dangj miz gijliz, gya miz gyagvi. Cibgeij bi gaxgonq, dou couh doxyaeng gvidingh: Youq 25 ranz baihndaw, ranz lawz miz hojnanz, moix ranz dawz 1 fanh maenz okdaeuj bang, lai dawz mbouj hanh. Danghnaeuz it bi baihndaw miz 2 gya miz hojnanz, moix ranz dawz 2 fanh okdaeuj bang. Gou dang bouxdaeuz, guenj gij cienz. Dou lij ciuq dieg caeuq daegdiemj vunz gak ranz, sonyinx ranz lawz wnggai hai maz diemq guh seng’eiq, gak boux hab guh maz hong daengjdaengj. Lij dingh naeuz gij saeh neix it ranz cij hawj boux cawjranz he rox ndwi, mienxndaej miz vunz gik guh deq gwn. Ranz Vangzciz dwg ndaw fuengzcug dou. Ngoenzlwenz de bae ranz gou dawz 30 fanh maenz okdaeuj, dwg dou daegdingh yienghhaenx guh hawj Vangzluz raen hane. Aenvih seizneix miz saek vunz da’nding lai, mbouj nyinhcaen guh hong, baenzngoenz ngeiz bae ngeiz dauq. Doxgiet couhdwg ligliengh. Gyoengqvunz caezsim, ndaej senj deuz bya. Sou mingzbeg loba?” Sam boux de dingq le, lienzlienz ngaekgyaeuj riu naeuz:“Mingzbeg le, doiq mbouj hwnj, caujfanz sou lo.” Vangzluz yienh ndaej cibfaen saetlaex, roxnyinh fouz naj raen vunz.

Youq gwnz loh dauqma, sam boux hek caez sing naeuz:“Caen dahraix, ndawranz doxhuz fanh saeh hoengh. Gyoengq beixnuengx Boux- cuengh neix geijlai ndei ha!”