Mboengqneix, gicej daj Namz- ningz Si Liengzging Gih roxyiuj daengz, aen gih neix dingh ok le gij saedhengz fueng’anq doicaenh daengx aen dieg lijyouz, yaek haenq- rengz hwngfat daegsaek lijyouz, dawz Nazmax Cin Danzbanjboh dajcauh baenz diemjguhyiengh lijyouz daengx aen dieg Liengzging Gih.

Aen singzgih neix diegyouq ndei, lij miz gij giekdaej vwnzva ndaw- biengz naekna、 gij minzsuz fungcingz cinghseuq lauxsaed caeuq gij swhyenz lijyouz daegsaek lai. Vihneix, aen singzgih neix cietsaed gviveh lijyouz swhyenz, lai gakdoh、 cienz fuengvih dajcauh daengx aen dieg lijyouz: Yaek baengh gij swhyenz raemx lai, dawz Nazmax Cin Davangzdanh、 Cuzcenz- dauj daengj gingjgih hwnjguh baenz gizdieg ciengxndang swnghdai lai caengz、 neiyungz fungfouq; youq Nanzyauj Cin dajcauh “aen mbanj roegcaeuq”……saedyienh moix aen cin miz lijyouz gingjdiemj.

3 bi ndawde, aen singzgih neix dajveh aeu gij hwngfat lohnaemj “nungzlij+”, dawz Nazmax Cin Danzbanjboh dajcauh baenz diemj- guhyiengh daengx aen dieg gonq. Gaenxmaenx yinxhaeuj vwnzva caeuq dijyuz yenzsu, daezsang gij yinxdaeuz caeuq daejniemh lijyouz, cienzmienh swnggaep nungzlij giethab canjnieb vunqsik, cungdenj dajcauh rangh canjnieb youqndwi swnghdai Binhsuij aeu cangqheiq ciengxndang、 yindung youqndwi、 yawjngonz byadah、 vwnz- va cauxeiq guhcawj haenx, hwngfat guhhung lijyouz canjnieb, gya’gvangq diuz roen vunzlai laisou.

(Danz Haijmingz Couh Swhyij)