Moix bi daengz seizhah, gou maij hwnq romh byaij bae gwnz ndoi youz. Miz ngoenz ndeu, ronghndwen lij youq gwnz mbwn, lumj aen ngaeu nei, miz saek aen ndaundeiq ronghyeb, go faexliux caeuq gomiuz gangjsebseb, rumz iq ci daeuj, sangjsag baenzmaz.

Yaep ndeu daengngoenz hai aen naj de okdaeuj le, ndit dak aen seiqgyaiq ndongqradrad. Yawj gwnz mbawfaex miz gyoengq naedraiz iqetet, iengj gij sag- rongh daengngoenz! Lumj ndau- ndeiq gyangmbwn, lumj naed rincawbauj, ndeigyaez dangqmaz!

Naedraiz mingh dinjdetdet, hoeng de mbouj bingzciengz. Seiz yaek laep, de lumj daxmeh cij lwgnyez nei rwed gomiuz; seiz yaek rongh, de youh boux daih’it hai aen lwgda mbouj rox baeg haenx, ganjvaiq ndoj haeuj ndaw hoengheiq bae, hawj hoengheiq nyinhdumz. De laeglemx guh hong mbouj gangj saek coenz vah, dawz mingh dinjdet de baen hawj gomiuz, caemhcaiq mbouj gouz gomiuz hawj de maz.

Gou maij naedraiz, youq ndaw sim gou, de beij lwgcaw lij bengz, beij naed rincawbauj lij rongh, beij ndaundeiq lij lwenq.