Aen ranz cang ndei lo, ronghsagsag. Ndaw sim mehyah gizcangj cungj roxnyinh miz aen nwnj ndeu, gwnz ciengz nem bakdou haenx miz aen congh lumj gaemxgienz hung nei, lumj ndaw dang byaek ndawde miz ceh haexnou ndeu, hawj de gig mbouj cwxcaih. Gij cienz cawx dauq ranz neix dauqdaej cungj dwg de boux dog gag bae banhleix daigvanj. Aen congh neix dwg gizcangj daengq gunghyinz itdingh aeu vat, gizcangj naeuz aen congh haenx dwg hai diuz loh hawj duzmeuz haeuj ranz daeuj gaeb duznou. Aen congh doeklaeng cang ndaej raeuzlili, sanq ok gij ronghgywg saek ngaenz, yienghneix mehyah gizcangj hix mbouj caiq gangj maz lo.

Gyoengqvunz naeuz gizcangj dwg boux hak seuq, buen ranz seiz lienz aen gyahgi baenzyiengh cungj mbouj miz saek aen. Caiqnaeuz gyahgi lij baenzneix gaeuq.

Mehyah gizcangj miz ngoenz ndeu doiq gizcangj naeuz:“Raeuz cawx aen denbinghsiengh moq ndeu ba!” Gizcangj dap naeuz:“Aen gaeuq lij yungh ndaej, ngaenz ndaej mbaet di couh mbaet ba!” Mehyah gizcangj couh haibak ndaq hwnjdaeuj:“Mwngz yawj mwngz dang ndaek gizcangj neix, haeuj ranz moq mbouj gangj mbouj miz saek aen gyahgi baenzyiengh, lienz aen ranz gou buet bae buet dauq ra ngaenz cawx mwngz gawqyienz hai aen congh ndeu, mwngz caeuq vunz caen mbouj doxdoengz lo!” Gizcangj muengz goemq bak mehyah hwnjdaeuj naeuz:“Mwngz sing daemq di ndaej lwi? Hawj bouxwnq dingqnyi mbouj ndei!”

Saedceij couh baenzneix gvaqbae lo. Gojnwngz gizcangj roxnyinh doiq mbouj hwnj mehyah, moix baez banngoenz roengzban cungj beij mehyah ma ndaej caeux, mehyah gizcangj dauq ranz baez hai dou, couh ndaej naengh youq henz daiz gwn ngaiz ndat byaek raeuj. Mehyah gizcangj riu naeuz:“Riengz mwngz baenzlai bi, couh dan gienh saeh neix mwngz guh ndaej haemq ndei.” Gizcangj naeuz:“Cijaeu mehyah muenxeiq, baezlaeng gou ngoenz- ngoenz roengzban liux couh dauq ranz cawj haeux guh byaek deq mwngz.” Mehyah gizcangj ngauz gyaeuj naeuz:“Mbouj yungh baenzneix, geiqndaej dauq ranz caeuq gou gwn haeux couh ndaej lo!” “W! Ndei!” Gizcangj riunyumnyum dwk dapwngq lo.

Mehyah mbouj youq ranz, gizcangj naengh youq gwnz sahfaz, da hix mbouj laep dwk cimyawj aen congh gwnz ciengz, lumj yaek miz duznou ndonj haeujdaeuj, de couh aeu dwg gingjcangj meuzndaem gaemh duznou lo. Duznou mbouj daeuj, hoeng bakdou “dung dung dung” yiengj lo. Gizcangj hwnqndang, mbouj bae haidou, cij dwg byaij daengz naj aen congh. Yaep he, aen byuksaenq ndeu daj aen congh ndienq gvaqdaeuj, gizcangj dawz ndei, byaij haeuj ndaw rug bae.

Mehyah gizcangj ma ranz, gizcangj naeuz:“Ngaiz caeuq byaek gou cawj ndaej lo, mwngz gwn gonq, gou lij miz di saeh bae guh. “Mwngz vaiq bae vaiq ma.” Mehyah gizcangj naeuz. Gizcangj geb aen daehgungh- vwnz saek ndaem byaij roengz laeuz bae lo.

Gizcangj haujlai nanz mbouj caeuq mehyah caez gwn ngaiz lo, mehyah baeznaengz ma ranz, gizcangj couh geb daehgunghvwnz saek ndaem okbae. Mehyah gizcangj hix mbouj miz maz yigen, ndawsim ngeix: Bouxwnq gyanghaemh cungj mbouj ma ranz, hoeng de dwg banngoenz okbae, ndaej miz maz vwndiz ha? Gij saeh bouxgvan itdingh lai, de roengzban sien cawj haeux ndei hawj gou, caiq bae guh saeh, doiq gou caen dwg ndei.

Ngoenz ndeu, mehyah gizcangj baez haeuj ranz couh swenj:“Ngoenzneix gou iek yaek dai lo, ngaiz caeuq byaek cawj ndaej caengz?” Mbouj miz vunz han, de haeuj bakcauq baez yawj, aen rek aen cauq cungj gyoetgyat, hai binghsiengh, byaek hix caengz cawx. Mehyah gizcangj gag gangj gag naeuz:“Ndaek gizcangj neix ha, hainduj baij gyaq lo, baezlaeng lijdwg gou gag doenghfwngz cij miz gwn.”

Gyanghaemh, gizcangj lij caengz ma ranz, mehyah gizcangj miz di gip lo. De sikhaek daj soujgih gizcangj, mbouj miz vunz ciep. Dauqdaej bae guh maz? Gaxgonq mehyah gizcangj lij miz di hozhwnj, yiet deq yiet yousim.

Mehyah gizcangj nyap dwk byaij bae byaij dauq, yawjyawj ndaw ranz seiqhenz, da de cimyawj aen congh gwnz ciengz. Aen congh neix mbouj rox seizlawz gaenj bienq ndaej baenzneix wenj, hoeng mbouj raen saek diuz bwn meuz.

Mehyah gizcangj baez hai densi, miz diuz sinhvwnz ndeu camx haeuj rwz de: Bonjsi moux giz gizcangj aenvih dam cienz gwn oet deng songgvi. De gyad naengh youq gwnz sahfaz, siengj: Baenzlawz gojnwngz ne? Ndaek gizcangj ranz gou mbouj dam faen ngaenz dauq ranz gvaq a, dwg boux hak seuq ha! Gyoengqde itdingh guh loek lo!

Mehyah gizcangj gip dwk bae gungh’anhgiz, raen boux gingjcaz couh naeuz swhgeij dwg mehyah moux gizcangj, de ndaej guhcingq, bouxgvan de itdingh dwg boux hak seuq! Ranz de dwg daigvanj daeuj cawx, mbouj miz maz cienz.

Doeklaeng mehyah gizcangj raen daengz gizcangj, gizcangj mbouj gangj saek coenz vah, lwgda muengh ok rog cueng ngaezngwdngwd.

Mehyah gizcangj naeuz:“Mwngz aeu yiengq cujciz gangj cingcuj ha!” Gizcangj lijdwg mbouj ok sing.

“Mwngz mbouj gangj, gou bae gangj!” Mehyah gizcangj sing hung dwk swenj hwnjdaeuj.

Gizcangj cij menh naeuz:“Gou guh saeh loek lo.”

Mehyah gizcangj cam:“Guh maz?”

Gizcangj naeuz:“Ranz raeuz mbouj miz duznou, hoeng, cijaeu miz aen congh haenx, miz ngoenz ndeu cungj miz duzmeuz haeujdaeuj gaemh.” Mehyah gizcangj baenzlawz cungj mbouj mingzbeg.

Gizcangj gejnaeuz:“Cienz, cungj cuengq youq laj mbonq, cungj mbouj caengz yungh saek faen, mwngz baema dawz bae gyau hawj guekgya, gemjmbaeu gij coih gou.”

Mehyah gizcangj danq naeuz:“Mwngz caen uk huk ha! Gvaiq gou gaxgonq mbouj wnggai doengzeiq hawj mwngz guh aen congh haenx ha!”

Gizcangj naeuz:“Mbouj gvaiq mwngz, dwg ndaw sim gou miz aen congh ndeu.”