De 64 bi coih ok “loh mbwn daxmeh”

Lanz Fungsiu, Bouxguhnaz Mbanjsangcouz Bazduz Cunh Sihyen Cin Sanglinz Yen, boux mehmbwk Yauzcuz neix ndaej 73 bi. Lai bi daeuj, Lanz Fungsiu daiq vunzlai daengx mbanj baengh rengz swhgeij, sinhoj buekguh, haekfuk hojnanz, hai bya hai loh, hawj daengx mbanj ndaej doeng raemx, hwnjbaenz vunz caeuq doenghduz gwnraemx gunghcwngz, saedceij diuzgienh cugyamq ndaej gaijndei. Gij saeh Lanz Fungsiu hawj haujlai vunz gamjdoengh, bi 2008 de ndaej bingz baenz “gamjdoengh Namzningz” cib ndei bouxguhnaz moq. Bi 2014, yen gyauhdunghgiz aeu diuz loh ok mbanj Mbanj- sangcouz Lanz Fungsiu daiqdaeuz coih haenx cingqsik ancoh baenz “loh mbwn daxmeh”, bihaenx ndwen 7, de ndaej Gozvuyen bingz baenz “bouxvunz mozfan minzcuz doxgiet cinbu daengx guek”, caemhcaiq ndaej “gaiq daihsam Namzningz Si mozfan gyaez bang vunz daezmingzciengj”. Bi 2016, de youh ndaej aen cwngheuh “bouxgagnyienh ceiq gyaeu” daengx guek.

Mbanjsangcouz Bazduz Cunh Sihyen Cin dwg aen Mbanjyauz iq cijmiz 16 ranz、 80 lai boux vunz he, liz haw Sihyen Cin ceiq gyawj haenx miz 30 goengleix, haeujok cungj aeu gvaq goengq byahung sang 400 mij he, caeuq baihrog dox lienzhaeh dan miz diuz loh iqet ngamq byaij ndaej boux vunz he, doxgaiq ngoenz yungh、 nungzswh daengx mbanj, couhlienz gij cien faex coih ranz, cungj aeu baengh vunz、 max daeh soengq hwnj bya, aenvih loh lingqlanglang, ciengzseiz miz gij cingzgvang vunz、 doenghduz doek roengz dat bae. Yawjraen gyoengq vunzlai youq gij swyenz vanzging yakrwix、 gij saedceij cingzgvang doeklaeng gungzhoj baenzneix, Lanz Fungsiu dangguh boux duicangj Mbanjsangcouz he, de yousim lailai, seizseiz cungj naemj baenzlawz daiq gyoengq vunzlai vut gungzhoj bae. Aeu vut gungz, couh aeu coih loh gonq, coih diuz loh daj Mbanjsangcouz doeng baihrog he, raez miz 3 goengleix, ceiq noix aeu 30 fanh maenz, ngaenz daj gizlawz daeuj, goengrengz youq gizlawz?

Bi 2006, Lanz Fungsiu baengh gij mingzmuengh swhgeij youq ndaw mbanj haenx, ciucomz vunzlai daengx mbanj hai hoih doxyaeng, daiqdaeuz daezok gij genyi hai bya coih loh, coih diuz loh heux bya he. Lanz Fungsiu iuheuh ndaej gyoengq vunzlai hoizwngq, vunzmbanj hainduj couz ngaenzcienz. Hoeng Mbanjsangcouz hojndoq lai dwg aen saehsaed he, aeu gij ngaenzcienz lai bi comz roengz- daeuj haenx okdaeuj, caezgya sij mbouj ndaej, sim youh gyoet roengzdaeuj lo.

Lanz Fungsiu naemj daengz song daeg lwg swhgeij youq rog dajgoeng lai bi haenx, de lai baez dwk dienhvah, caeuq gyoengqde gangj gij siengj- muengh swhgeij caeuq gij siengj- muengh vunzlai daengx mbanj, caeuq gij vwndiz coih loh giepnoix ngaenzcienz. Daj iq ndaej daxmeh yingjyangj, daeg lwg ityiengh miz yiedsim guh goeng’ik saehnieb haenx mbouj gangj saek coenz vah, sikhaek gietdingh cawz ok faenh ngaenz ranz swhgeij le, lij gien 8 fanh maenz ngaenz hawj ndaw mbanj yungh guh ngaenz coih loh. Geij meh lwg Lanz Fungsiu daiqdaeuz gien ngaenz, gamjdoengh le gyoengq vunzmbanj, caezgya foenfoen gien ngaenzcienz, cobouh gaijgez le gij ngaenz coih loh. Gyoengq vunzmbanj couz ndaej 7 fanh maenz, caiq gyahwnj song daeg lwg Lanz Fungsiu gien 8 fanh maenz, gungh couz ndaej 15 fanh maenz.

Bi 2006 ndwen 2 Mbanjsangcouz hai bya coih loh cingqsik hainduj. Doihcoihloh youz Lanz Fungsiu daiqlingx 9 boux bouxgeq 60 lai bi haenx gapbaenz. Aenvih ngaenzcienz mbouj gaeuq lai, mbouj miz ngaenz cingj vahdujgih、 duihdujgih, vunz Mbanjsangcouz dan baengh gij hongdawz dajndaem caeuq gij saenqniemh giengiengz, yungh song faj fwngz swhgeij baenz di baenz di guh. Mbanjsangcouz youq diegbya rin lai, hai bya coih loh aeu caq rin, Lanz Fungsiu cawjdoengh hag cihsiz caq rin. Vihliux ancienz, de caenndang guenj gij leizguenj caq rin haenx, hwet venj song aen daeh, aen ndeu cang leizguenj, aen ndeu cang yinjbaugi, ngoenznaengz aemq aen daeh cang miz 10 lai aen leizguenj, mbouj liz ndang saek seiz, seizgan nanzni, de gingqyienz yungh vaih le 3 aen daehnaeng. Hai bya coih loh 300 lai ngoenz neix, ywbauq gvaq fwngz Lanz Fungsiu 2000 goenggaen, leiz- guenj 4050 aen.

Mboujguenj ndat nit, Lanz Fungsiu daiqlingx gyoengq bouxgeq baenz ngoenz baenz ngoenz youq gwnz bya sang, fwn rumz cungj bae, mbouj miz ienqhoij. Gij saeh hawj vunz gamjdoengh gyoengq bouxgeq Mbanj- sangcouz hai bya coih loh haenx, youq dangdieg cugyamq riuzcienz. Miz vunzmbanj baihrog geizheih hwnj bya bae yawj, gyoengqvunz bae yawj haenx miz mbangj deng gamjdoengh, cawjdoengh daeuj bang, bouxcoz okrog dajgoeng haenx hix cawjdoengh ok cienz gien cienz. Yawjraen ngaenzcienz coih loh yied daeuj yied noix, Lanz Fungsiu yiengq ndaw mbanj daezok bauq daigvanj, haemq vaiq yungh mingz swhgeij ciq ndaej 3.5 fanh maenz ngaenz coih loh, hoizsoeng gij nanzdaez ngaenzcienz mbouj gaeuq. Yiengh- neix, bi 2006 ndwen 12, Lanz Fungsiu daiqlingx vunz Mbanj- sangcouz guh le diuz loh heux bya doeng baihrog raez 3 goengleix he. Gij saeh Lanz Fungsiu daiq vunzlai coih loh ndaej Cunghyangh Densidaiz ingj baenz ciendaezbenq “loh mbwn daxmeh”.

De 69 bi yinx raemx daengz “ndaw sim” vunzlai

Mbanjsangcouz daengx bi giep raemx, vih cieddaej gaijgez gij vwndiz vunz caeuq doenghduz gwnraemx daengx mbanj, bi 2012 ndwen 5, Lanz Fungsiu gag ok cienz 5.5 fanh maenz, cingj doihgunghcwngz vat cingj daengz Mbanjsangcouz vih vunzmbanj vat cingjraemx. Doihgunghcwngz vat cingj mbongq roengz laeg 130 mij cix caengz miz raemx okdaeuj, baez daih’it vat cingj saetbaih. Lanz Fungsiu saetmuengh haenx baez daihngeih gag ok cienz 1.5 fanh maenz cingj doihgunghcwngz daeuj vat cingj baez moq, gietsat lij dwg mbouj miz saek di raemx okdaeuj.

Bilaeng ndwen 6, Lanz Fungsiu bae daengz Cinhih Yauzcuz Yangh ra goekraemx, raen daj gizhaenx yinx raemxmboq daengz dinbya Mbanj- lahgenj, yienzhaeuh ndoetraemx daengz dapraemx, yienghneix couh ndaej cieddaej gaijgez gij vwndiz gwnraemx hoj vunzlai daengx mbanj. Lanz Fungsiu lai baez daengz yen suijligiz、 minzcuzgiz daengj fanjyingj cingzgvang, ndaej daengz mizgven bumwnz bangcoh haeujcoengh, cungj- suenq daj Mbanjsangsangh cang diuzgyongj 1000 lai mij yinx raemx daengz aen cingjraemx laj dinbya Mbanjsangcouz, yienzhaeuh caiq doenggvaq diuzgyongj ndoetraemx daengz dapraemx. Mwh raemxmboq lae daengz gak ranz gak hoh, Lanz Fungsiu 69 bi haenx angqyangz naeuz: “Aeu raemx yinx daengz gak ranz gak hoh, neix dwg aen siengjmuengh doeksat ciuhvunz neix.”

Ndaej daengz Lanz Fungsiu daiqlingx, Mbanjsangcouz gaxgonq gungzhoj doeklaeng neix hwnjguh le loh suijniz doeng mbanj, ndaej yungh raemxswlaizsuij, hwnjguh baenz ranz- vwnzva、 daizheiq、 biucinj lanzgiuz- cangz daihgeq caengz gamj naemj gvaq haenx. Diuzgienh ndaej gaijndei, gyoengq vunzmbanj okrog dajgoeng haenx foenfoen dauq ranzmbanj hwngfat gak cungj canjnieb, guh canjnieb baenz fouq. Daengx mbanj ranzranz hwnjguh ranzlaeuz moq, doeng densi gvangjbo, miz cimohdoz、 sijyihgih、 binghsiengh yungh, miz mbangj lij cawx gyauceh dem, ndaw mbanj cianh ndei, caengz deng caeg saek gienh doxgaiq gvaq. Vunzmbanj mbanj henzgyawj cungj naeuz, dwg Lanz Fungsiu daiq ok le aen “mbanjguhyiengh” he.

Gij siengjmuengh 15 bi haenx ndaej habhoz

Hai bya coih loh, hawj “loh mbwn daxmeh” doeng daengz baihrog; guh cingj yinx raemx, hawj gyoengq vunzlai ndaej gwnraemx “cuengqsim”; daiqdoengh baenz fouq, hawj aenmbanj gungzhoj gaxgonq bienqbaenz “mbanjguhyiengh”……baenz gienh baenz gienh saeh, gawq bingzciengz、saedcaih youh dwg rengzrwdrwd. Itloh gvaqdaeuj, Lanz Fungsiu menhmenh bienq geq, hoeng gij saenqniemh “bang vunz” de yied daeuj yied giendingh, moegbiu hix yied daeuj yied cingcuj, hix yied daeuj yied ciepgaenh siengjmuengh. Bi 2012, de dawz mbawsaw ciyensuh at youq daej sieng 15 bi haenx gyau daengz cunh dangjcihbu, gagnyienh bauq gyahaeuj Cungguek Gungcanj- dangj.

Bi 2012 ndwen 6 ngoenz 30 banhaet, doiq Lanz Fungsiu ndaej 68 bi haenx daeuj gangj, dwg ngoenz miznaj youh hawj vunz gikdoengh he, ngoenzhaenx, de youq baihlaj mbawgeiz dangj raeuz senhsi, baenz boux yawhbwh dangjyenz Cungguek Gungcanjdangj he, aen siengjmuengh youq ndaw sim de 15 bi haenx ndaej habhoz lo. Fan yawj mbawsaw cingjgouz haeuj dangj Lanz Fungsiu raiz haenx, caixcaix ngwgngwg raiz rim song yieb ceijsaenq haenx, cix yienh’ok aen saenqniemh genjdanh he: Fouzsei bang vunz, cauhfuk beksingq.

(Sanglinz Yen Vwnzmingzban)