Mungz Gojcang 1985 nienz seng, cunghconh bizyez, de gaenq dwg boux“hozlingx hau” youq ndaw singz hung bi lingx geijcib fanh maenz ngaenz haenx, de seizneix ma ranzmbanj guh densangh, gag laebguh gij binjbaiz bonjfaenh “beigyanghcunh”. Bineix geiq daih’it, de doenggvaq vangjloz gai“hab daihlaex cieng moq”(gaeqlab、bitlab、nohlab、gyaeqsaek daengj) 6000 lai dauq（moix dauq 68 maenz daengz 268 maenz）. Riengz ngux nyied co’ngux yaek daengz, de seizneix gaenq ndaej dinghdan haeux- faengx saek 1 fanh aen（moix aen 8 maenz）, guj bineix yaek ndaej gai haeuxfaengx saek 5 fanh aen.

Ho Siujvaz 1985 nienz seng, Gvangjsih Gvangjbo Densi Dayoz hanzsou bizyez. De youq 2014 nienz 5 nyied, laeb Yungzyungz Lizcanj Dajciengx Conhyez Hozcozse, 2016 nienz 6 nyied laeb guh Ginhbenhlij Swnghdai Nungzyez Youjhan Gunghswh. Daengz seizneix, de gaenq gai ndaej byaceh 1400 lai fanh duz（gyaqcienz 350 lai fanh）, linghvaih lij miz 1500 lai fanh duz byaceh gaenq miz vunz dingh lo. De dwg aen yienh neix boux daih’it yungh ndatndit ma diuz raemxraeuj ciengx bya, gij byaceh de gai daengz seiqhenz 3 aen swngj 16 aen yienh.

Siz Ciuhyangh 1987 nienz seng, Gvangjsih Cunghyihyoz Dayoz bizyez. De youq 2014 nienz 7 nyied laebbaenz aen gunghswh “ciuhyejgyah huqbya”, bi’gvaq de doenggvaq densangh gai lingzcih cibgeij dun(moix dun 18 fanh maenz), de lij gai mbamaenz caeuq maenzsauj daengj lai cungj lai yiengh ndaw rungh dwzcanj. Bineix de doenggvaq doengjit gai ceh、bwnh caeuq gisuz cijdauj daengj, fatdoengh 640 lai hoh（ndawde hoh gungzhoj 450 hoh）ndaem maenz 1500 moux, lij cingqcaih guh aen gunghcangj gyagoeng dujdwzcanj he.

（Gungh Siengzyouj/龚祥友）