“Ndaw biengz seiq nyied va hai caenh, minzsiuj cingq dwg seizcin hoengh!”

Ngoenzlwenz raq fwn hung haenx lumj dawz gij namhfaenx gyaux ndaw hoengheiq swiq seuq bae lo. Haetneix mbwn ronghseuq, ndaw hagdangz hix cw hwnj saekgim ndongq- yamyam, gij hoengheiq beij seizlawz cungj singjsien, gyoengq lwgnyez daeuj daengz hagdangz le sim angqyangz lai lo. Yawj gij najriu doenghvunz couh rox gyoengqde ndawsim beij duzroeg gwnz faex hix sim’angq. Gij mbawfaex gwnz nye deng swiq seuq ndaej lwenqda, naj mbaw youzyubyub, lumj gij raemxieng hix yaek rih roengzdaeuj nei. Ngiengxgyaeuj yawj benq mbwn gwnz dingjgyaeuj, sangngaungau, oatat.

Daihsam ciet hwnj goq meijsuz, lauxsae daiq gij hagseng sam seiq aen ban byaij ok gyausiz, gyoengqde youq ndaw ndit raeujrubrub byaij dwk, mienh byaij mienh cimyawj gij va gij rum ndaw hagdangz. Gyoengq hag- seng lij menhmenh mup gij rang va diemzsisi sanq youq gwnz loh iq ndaw hagdangz, bouxboux song ga diuqliklik, gwnz naj riunyumnyum. Gyoengq vayinghvah maj youq henz loh, hai ndaej hoenghhwdhwd, yawj bae lumj fwj youh lumj mok, gig ndeiyawj. Va’ndokgeng yienznaeuz maj youq laj vayinghvah, hoeng hix hai ndaej gig ronghsien, daj gizgyae yawj bae lumj dwg baenz duz baenz duz mbungqmbaj gvai cingq youq ndaw caz mbinyebyeb nei. Gyoengq hagseng yawj ndaej ngaezngwdngwd.

“Va! Caen ndeiyawj a!” Riengz dah hagseng yawj bae, de cingq yawj gij va’gyangzveih haeuj yinx. Youq laj ndit ronghndei, gij va va- gyangzveih faenfaen daj ndaw mbaw iethoz raezrad, ngiengxgyaeuj hawj ndit dak gij limqva hoengz maeqmwtmwt swhgeij. Raq rumz iq ci daeuj, gyaeuj gyoengqde yat dwk ngaek roengz laj gyaeujciengz bae, lumj dwg naj- mong, youh lumj cingq doxgangj docih gij rumz dawz gij heiq rangfwdfwd sanq doh ndaw hagdangz. Geij byoz maj youq gwnz ciengz haenx mbaw deih va na, mbouj raen gyaeuj hix mbouj raen rieng, cij yienh gij hoengzmaeq mbangmbang bu youq gwnz ciengz. Rumz baez ci daeuj, gij va baenz nyumq baenz nyumq lumj youq baenghmbaq gangjgoj, dep naj gangjriu, gokrwz gangj vah- sebseb……

Geij go yangzvaiz youq baih saenamz va cingq hai ndaej youh lai youh rang, gyoengq rwi mbin bae mbin dauq, cingq youq gwnz go faexvaiz aen daizheiq neix ciengq go. Sijsaeq cimyawj vavaiz, gij va saek haugetget venj youq gwnz nyefaex, baenz roix baenz roix, seiz mbouj seiz riengz rumzcin ngauzngednged, lumj fungh- lingz doxngad yiengjsasa. Lauxsae caeuq gij hagseng yied byaij sim yied sangj.

Youq laj din geij go faexleux laux sangngaungau， gij rang va daeng- ngoenz saek aeuj youq ndaw vabuenz cingq yinx daeuj gyoengq dinz rwi cup gwn ieng va vansubsub. Gyoengq hagseng hix lumj duzrwi vaiqvued nei angqangq yangzyangz youq laj faex buet bae gyaep dauq, yien fwngz diuq hwnj buet roengz, gyoengqde angq hemq dwk, diuqliklik, riuhaha……

Samcib faencung dinjdetdet， hoeng gyoengq hagseng youz ndaej gig simhai, angq ndaej gig habhoz. Lauxsae yawj dwk yawj dwk, ndawsim beij gij va ndaw hagdangz lij rang, beij gij ieng’va lij van: Gyoengq lwgnyez cungjsuenq youq gwnz dangz gaem dawz diuz riengbyai seizcin lo!