Yienh Dasinh youq baih saenamz Guengjsae, liz gyangsingz Namzningz 143 goengleix. Miz Bouxcuengh Bouxyauz Bouxmyauz daengj saujsu minzcuz gungh 37 fanh lai vunz, dwg aen mbanj souhgyaeu Cungguek, daengx guek maknganx roek daih ndaemganq dieggoek ndawde aen ndeu, aen mbanj dieggoek cazgujdingh dajndaem. Liglaiz miz aen mingzdaeuz ndei “mbanjranz maknganx”、 “mbanjranz cazgujdingh”.

Yienh Dasinh lizsij gyaenanz, swhyenz fungfouq, yinzvwnz yenzsu cungj miz caez, miz vunzgaeng vaqrin seizdaih sinhsizgi okmingz, guenq- meng sam ga rekmeng daengj. 1953 nienz youq ndaw yienh Lanjhih Yangh Mbanjnazlungz ndaw gamj Byavaizninz raen miz sam diuz heuj vunzgaeng vaqrin, neix dwg gwnz seiqgyaiq baez daih’it raen miz. Yienh Dasinh miz fouxdwklangh ciet roengzdoengh daengj lai cungj lai yiengh minzcuz fungcingz, engq yienh’ok Yienh Dasinh yinzvwnz yenzsu dieg Bouxcuengh comzyouq neix. Ranzyouq daegsaek yienhda, gijgwn haekfeih daegbied, minzsuz vwnzva lai yiengh gag miz caeuq gij fwen daegbied haenx, moix bi cungj yinx bouxhek seiq fueng bet baih bae yawjngonz youzcet.

Vwnzva dwg aen hoenz lijyouz. Gyawj geij bi daeuj, Yienh Dasinh baengh ciet lijyouz gozci vwnzva henzguek Cungzcoj Cungguek, “sam nyied sam”、cietroengzdoengh、ciet- suenggyangq Yaleiz、 cietmaknganx daengj, gawjbanh le lai cungj lai yiengh minzsuz vwnzva hozdung. Mboujdan yienghneix, vanzlij daih- lig dawz Mbanjcuengh minzsuz vwnzva buen daengz gingjgih lijyouz, baijyienj conzdungj minzsuz doxdax, lumjbaenz dwkcik, daenj haizgieg raez beij vaiq, gaeq doxdoj, rag vaiz doxdax, Fwencuengh doiq ciengq daengj, hawj bouxhekyouz yawj daengz dangdieg minzsuz vwnz- va.

2016 nienz Cunghyangh Den- sidaiz Dasinh “sam nyied sam” cigboq caeuq Guengjsae Densidaiz “Betgveiq Minzcuz Fungh—2016 “sam nyied sam” daihcigboq, youq Yienh Dasinh yienhciengz cigboq, engq hawj Yienh Dasinh baiq coj hozdung, ngaizfukgyaeu, fouxbetcih daengj minzsuz vwnzva hozdung hawj bouxyawj daengx guek roxyiuj daengx guek okmingz, gaiq baiz minzcuz vwnzva lijyouz ciengq yiengj hwnjdaeuj.

Bya heu raemx saw funghgingj gyaeundei, hawj Yienh Dasinh lij- youz swhyenz fungfouq lairaeuh, liglaiz miz aen cwngheuh “Gveilinz Iq”. Gij gingjdenj lijyouz okmingz, lumj Raemxdiuqdat Dwzdenh, Naz- nganz Suijgu, Doenghnaz Mingzsw, Conghgamj Lungzgungh daengj. Ndawde, funghgvangh Mingzsw, Cawrongh Naznganz, Raemxdiuqdat Dwzdenh gaenq ndaej lied guh aen diemj Guengjsae Nanzgoz henzguek funghcingz lijyouz sienqloh ndawde aen ndeu. Daegbied dwg Raemx- diuqgat Dwzdenh, riuzmingz ndaw guek rog guek, heiqseiq gaeuq hung, hawj bouxhekyouz ngonz le mbouj sij ndaej baema. Linghvaih, moix daengz singhgiz roek caeuq ngoenz singhgiz, youq doenghnaz gingjgih Mingzsw, bouxhekyouz mboujdan ndaej yawj aen daiz- heiqhung Mingzsw yienjheiq, lij ndaej camgya vanjvei feizdong、 dwkdomq、 nyingznaq、 buengqyed、diuq fouxfaexsaux daengj minzcuz vwnzva hozdung miz minzcuz daegsaek. Youq Bouxcuengh sam nyied sam Yienh Dasinh ciet- roengzdoengh ndawde, hix ndaej gwn gijgwn ngaizbakranz miz daegsaek Mbanjcuengh, doengzseiz ndaej ngonz Fwencuengh doxdax、 doiqciengq daengj conzdungj minz- suz vwnzva, hawj mwngz gamjsouh daengz guh bouxvunz Bouxcuengh ndeu caen angqyangz vuenyungz.