Geiq ndaej seiz lij iq haenx, vih siengj son dou gyoengqlwg manz neix, noix mbouj ndaej dingq bohmeh naeuz:“Lwg ha, aeu dingqvah bw! Aeu yunghsim bae doegsaw bw! Danghnaeuz son mwngz mbouj nyi, mbouj yungh rengz doegsaw, laux le, couh bae bang vunzbaetgai!”

Seizhaenx, baez dingq bohmeh baenzneix gangj, ndawsim gou couh doiq bouxbaetgai miz cungj moengzloengz siengjfap daeuj: Bouxbaetgai goulau dwg gyoegnqvunz lajmbwn boux ceiq yaez lo.Caiqlix, bouxbaetgai wnggai couhdwg boux vunz mbouj dingqvah cij ngaiz bae bang vunz baetgai ba!

Laux le, gou gaenq daj lajmbanj okdaeuj lo. Youq ndaw singz, gou caenda raen daengz vunz cienzmonz baetgai. Gyoengq boux vunz baetgai haenx, dwg mbouj dwg cungj vunz seiz gou lij iq gyoengq vunzlaux ciengzseiz aeu daeuj son- gyauq gou? Dwg mbouj dwg cungj vunz gou seiz lij iq siengj haenx nei?

Hoeng, gou soj raen bouxbaetgai haenx, gyoengqde dwg baenzhaenx gaenx guh, baenzhaenx lauxsaed.

Mwngz yawj, moix diuz gai ndawsingz seuqsatsat, nanzdauh cungj dwg gag rox seuq la? Ngoenznaengz baenz cien baenz fanh vunz ndaw- singz byaij youq gwnz gai, gyoengqde swnh fwngz vut gij doxgaiq nyapnyaj, caiq lij gij mbawfaex faex song henz gai loenq roengzdaeuj daengj gak cungj gak yiengh nyapnyaj, dwg bouxlawz baet gyoengqde bae ne? Dwg bouxbaetgai baet gyoengqde baenz doi, cang haeuj ndaw doengj, yungh ci rag bae diegnyapnyaj cawqleix.

Danghnaeuz caen lumj vunzlaux baenzhaenx son’gyauq dou, mbouj miz bouxlawz nyienh bae baet gai, gij nyapnyaj gwnz gai ndawsingz daeb baenz bo baenz bya bae. Yienghneix, ndawsingz lij youq ndaej vunz lwi?

Seizneix, ndawsingz raeuz ngoenz beij ngoenz caezcingj hwnjdaeuj, miz faenh goenglauz bouxbaetgai youq ndaw. Mwngz mbouj saenq ha? Danghnaeuz ngoenznaengz mwngz hwnq romh byaij youq gwnz gai, mwngz itdingh yawjraen gaenq miz bouxbaetgai youq gwnz gai baet lo. Gyoengqde mboujlwnh seizcin、seizhah、seizsou、seizdoeng, hopbi 365 ngoenz, haethaet hwnq romh baet gai, caj gyoengqvunz haetromh okdou byaij youq gwnz gai seuqcingh seiz, bouxlawz ngeix daengz bouxbaetgai baenzlai dwgrengz. Gyanghaemh gyoengqvunz gaenq baeg ra ninz lo, gij nyapnyaj gwnz gai baenzngoenz rom haenx, dwg bouxlawz bae baet? Lij dwg bouxbaetgai swnh gyoengqvunz hwnz ninz seiz, nyinhcaen haeujsim dwk baet gai, cij miz lohdaeng itcig buenx gyoengqde.

360 hangz, hangzhangz miz bouxmaenh. Bouxbaetgai ciengzseiz youq gwnz gai guh hong, mboujlwnh ngoenz nit roxnaeuz ngoenz ndat. Aenvih miz gyoengqde, gwnz gai cij baenzneix seuqsat, ndaw singz cij baenzneix gyaeundei. Gyoengqde sinhoj dwgrengz dwk vih sevei guh ok gungyen, raeuz lij maz lijyouz yawjsiuj gyoengqde?

Gij vah vunzlaux hix mbouj dwg coenzcoenz cungj deng bw! Dang bouxbaetgai youh baenzlawz? Gyoengqde baengh song fwngz gaeq gwn haeux, mbouj gouz bouxwnq. Gou aeueiq bouxbaetgai! Gou roxnyinh caezgya cungj wnggai doiq gyoengqde gangj:“Mwngz sinhoj lo, docih!”