Ngamq gvaq cieng cibhaj, doenghboux okrog bae dajgoeng haenx cungj dauqbae guh hong lo. Gou caemh haeuj suenmak bae mbit di lwgmak, sousib doenghyiengh dap ci bae hagdangz lo.

Gou youq Baekging doegsaw, hagdangz dou liz Guengjsae raeuz gyae’gyanggyang. Itbuen vunzhek daj Namzningz bae Baekging, cungj dwg cawx biuq diegninz. Seineix hagdangz couh yaek haihag lo, gwnz hojceh hagseng lai dangqmaz, ngamq miz geij boux vunzgeq, dingq gyoengqde gangjvah mbouj lumj dwg vunz Guengjsae.

Boux ninz youq henz ndang gou dwg boux daxbuz ndeu, de gangjvah mbouj lumj vunz Bouxcuengh. Lij miz haujlai nanz dem cij daengz Baekging, youq gwnz roen mbwqmbatmbat, gou couh caeuq daxbuz gangjgoj hwnj- daeuj.

“Daxbuz, dingq mwngz gangjvah mbouj lumj dwg vunz Guengqsae, mwngz daeuj gizneix guh maz ne?” Gou cam naeuz.

“Ranz gou youq Hah’wjbinh, gou miz baengzyoux youq gizneix, geij ngoenz neix daeuj caeuq gyoengqde caemhdoih bae guhcaemz.” Daxbuz han naeuz.

“Yienghneix mwngz roxnyinh Guengjsae baenzlawz?” Gou gig ceuq- leuz, siengj rox de baenzlawz ngeix.

“Guengjsae gig ndei ha, aen geiqciet seizneix gwnz faex lwgmak lij hoij rim go, ndaw naz ndaw suen go- byaek mwncupcup、heuswdswd. Baih gou seizneix seiqlengq caenh raen miz gij nae hausaksak, mbouj raen saek di faex nywj heuloeg ha. Mwh youq Bwzhaij guhcaemz, nditndat gig ndei, daengngoenz raeujrub, dou youq henz haij doq cimzgwn byahaij、gungq- haij caeuq lwgmak, doq ngonzyawj raemxlangh gwnz haij goenjhumhum, sim’angq raixcaix. Mwngz yawj, ndaw daeh neix miz geij roi lwggyoij, dwg vunz Guengjsae soengq hawj gou, neix dwg gyoengqde gag ndaem ndaej, gig ndeigwn ne.” Daxbuz fwngz vix aen daeh laj mbonq lwnh gou naeuz.

Gou baez yawj coh laj mbonq de, caen miz aen daeh bongzbwd ndeu dahraix. De hai bakdaeh hawj gou yawj, baihndaw miz geij roi gyoij- saegungq .

“Cungj lwggyoij neix ceiq ndei- gwn, gyaqcienz hix ceiq bengz, youq Guengjsae miz gig lai. Cungj lwggyoij neix yenzlaiz maj youq baih Saegungq Yeznamz, ndigah heuhguh gyoijsaegungq, hoeng de deng senj- haeuj Guengjsae daeuj ndaem lizsij gyaenanz, caeux senqsi baenz gij dwzcanj Guengjsae lo.” Gou lumj boux daujyouz bonjdieg nei angq- vauvau dwk naeuz de nyi.

“Dwg ha, cungj lwggyoij baih dou gai haenx, unqnemnem, mbouj ndei gwn, gai ndaej youh bengz. Guengjsae cingqcaen dwg gizdieg ndei, seizneix lij miz baenzlai lwgmak. Danghnaeuz youq baih dou, daengz gouj nyied, gwnzgo couh mbouj miz lwgmak lo. Gizneix makgyaeqgaeq caeuq lwgbug hix ndei gwn, gou cawx le haujlai dawz bae ranz, cunjbei hawj lwg gou gwn. Yienznaeuz baih gou hix miz cungj lwgmak gai, hoeng gyaqcienz bengz hwnj mbwn bae, feihdauh hix citcangcang, mbouj ndei gwn saek di.” Daxbuz danqhaenh naeuz.

“Seizneix mak lij mbouj suenq lai, danghnaeuz dwg seizhah, lwgmak cij miz daihbaj, maklaehcei、mak- nganx、makgaivaiz、makleiz…… Geq cungj geq mbouj caenh ha! Mboujgvaq sou youq baihbaek seiznit ndaw ranz miz heiqraeuj, youq ndaej cwxcaih dangqmaz, mbouj lumj Guengjsae seiznit doengxhaemh nitsisi.” Gou naeuz.

“Hoeng youq Guengjsae geij ngoenz neix, gou roxnyinh mbouj nit saek di, givwnh cungj dwg 20 doh hwnjroengz.” Daxbuz naeuz.

“Givwnh Guengjsae bienq ndaej gig vaiq, geij ngoenz gonq lij nit dai nit lix, geij ngoenz neix fwt bienq ndaej raeujrubrub. Caemhcaiq gizneix ndaw hoengheiq miz raemx baenzlai, cungj dwg dumzcatcat, couhcinj givwnh yawj hwnjdaeuj mbouj beij baihbaek daemq, hoeng doengxhaemh hix roxnyinh beij baihbaek nit ha. Caiqgangj gizneix mbouj miz heiq- raeuj dem.” Gou gejnaeuz hawj dax- buz nyi.

“Laxlawz yienghneix ha. Hoeng mehmbwn hix hawj sou baenzlai byaekheu baenzlai lwgmak, sou caemh dij lo!” Daxbuz gangjriu naeuz.

“Mwngz gangj ndaej caemh deng bw. Gak dieg gag miz gak dieg ndeicawq.”Gou gag ngaekgyaeuj naeuz.

Seizneix gou sawqmwh ngeix hwnj gij vah daxboh gangj, guh hot fwen neix:

Ndaej gwn lij ienq mbwn,

Bouxvunz mbouj miz uk,

Yiengjfuk mbouj rox fuk,

Mbouj huk couh dwg bamz.