Doengh bi neix daeuj, Mbanj- dalwzdung youq dangjveij cwngfuz baihgwnz haeujcoengh lajde, coih- cingj ndei ranzgaeuq, ciuq yiengh- gaeuq dauqhwnj coengceiz, bu roen- benjrin, hen ndei gorungz geq bak bi gyaeujmbanj, hwnjguh “Bozvuzgvanj Swnghdai Ranzgaeuq Mulaujcuz Dalwzdung”. Bi 2015 ndwen 5, bouh densigi lizsij 《Yiz Cwngzlungz》 youq Mbanjdalwzdung goepingj aeu gingj seiz guh le Yienhyax Lozcwngz、Miuh Gvanhdi、dousingz、Hagdangz Cinh- yauj、bouqcanghdiet、bouqdajsan daengj 27 aen gingj faenciengz neix, louz aen singz goepingj saedgingj dijbauj ndeu hawj ndaw mbanj, densigi youq Cunghyangh Densidaiz 1 dauq caeuq 8 dauq boqok le, Mbanjdalwzdung mingzdaeuz engq yiengj riuz doh daengx biengz. Bi 2016 Mbanjdalwzdung ndaej dingh guh buek daihngeih “aenmbanj daegsaek minzcuz siujsoq Cungguek”.

Mbanjdalwzdung dwg aen mbanj beixnuengx Mulaujcuz comzyouq ndeu, dieg youq ndaw gyaiq Lungz- dwngz Cunh Siujcangzanh Cin Yienhgagguenj Mulaujcuz Lozcwngz, liz yienhsingz 10 goengleix gyae. Aenmbanj youq Ciuhmingz satbyai Ciuhcingh codaeuz baenz mbanj, seizneix lij louzce miz 60 lai aen ranz gaeuq, dingzlai dwg Ciuhcingh satbyai guh, cungj dwg aenranz ciengzcien vaxhoemq faex dap, gwnz ciengz laj yiemhranz veh miz dozveh roxnaeuz vehdeu gyaqciq, hawj vunzraeuz ndaej yawjngonz gij dinfwngz akmaenh gaekdeu caeuq vwnzva dajcaep seizhaenx; gij ranz baenz benq baijbouh doxdep yinzrwd, louzce ndaej gig ndei, ndaw mbanj fungcingz minzcuz naekgywg, lumj- baenz dinfwngz gaekdeu faex benj、fouq doiq benjfaex gaekdeu、gij veh gwnz ciengz, lij miz coeng- ceiz goengcoj、laeuzdou gaeuqgeq、doendou、giemxdou、roen benjrin nem aen gyanghongh iq naj ranz gaeuq、lozfeizdeih doenghgij neix, cungj daiq miz gij daegsaek ranzyouq Mulaujcuz, louzce gij fungcingz sohswd Mulauj- cuz roengzdaeuj, dwg benq ranz gaeuq Mulaujcuz Lozcwngz seizneix louzce ndaej ceiq ndei ranz gaeuq ceiq lai ndeu, dwg faenh yizcanj vwnzva lizsij Mulaujcuz gig dijbauj ndeu, doiq yenzgiu vwnzva dajcaep Mulaujcuz gig miz yungh, doengzseiz lij dwg gizdieg swnjcienz vwnzva cietyihfan Mulaujcuz youqgaenj ndeu.

Seizneix, Lozcwngz cingq ciuq aen vunqsik “lenzcwngz lijyouz + eiciuq gaeuqgeq lijyouz + fungsug lijyouz + swnghdai lijyouz” bae haifat Mbanjdalwzdung, coicaenh hongsaeh lijyouz dangdieg hwngfat. Moix bi “sam nyied sam”、“seq ndwenngeih”、“cietyihfan” daengj ngoenzciet conz- dungj, vunzlai daengx mbanj cungj aeu gij fuengsik daegbied gag miz de guh gak cungj gak yiengh hozdung, lumj bae ndaw coengceiz caeqbaiq mbaenj fuk, yienj heiq diuq foux ciengq go doiq fwen daengj, nauhyied hoenghhwd, caemh yinx haujlai hekyouz bae yawjngonz cetyouz, angqyangz lairaeuh.