Ciengj Ginjgunh bineix 45 bi, dwg vunzmbanj mbanj daegsaek siujsoq minzcuz ——Bulung Cunh Veijgyangh Yangh Lungzswng Gak Cuz Swciyen, bi 1990 bauqmingz bae dang bing, youq Guengjsae Vujgingj Vuzcouh Si Cihdui dang bing, bi 1993 duivuj. Fuzyenz dauq ranz le, Ciengj Ginjgunh dwg boux dangjyenz he, de gaenxmaenx camgya hongsaeh ndaw mbanj, youq lajmbanj hwngfat, daiq vunzlai ndaw mbanj baenz miz. Lai bi doxdaeuj, de cungj baujmaenh gij simsingq lauxsaed caeuq gij cozfungh gamj roemx gamj guh bouxbing, daiq vunzlai hwngfat dajndaem, hawj vunzlai ra ndaej ngaenzcienz, coicaenh huzndei, gaenx guh baenz miz gvaq saedceij siujgangh, ndaejdaengz vunzlai haenh ndei. Bi 2008 de ndaej senj baenz Veijgyangh Yangh Bulung Cunhveij cujyin, bi 2011 dang cunh dangjcihbu suhgi, bi 2013 ndaej senj dang Daihcibngeih Gaiq Daengx Guek Yinzda daiqbiuj, caemhcaiq lai baez ndaej bingz baenz boux guhhong hongsaeh dangj maenhndei yienh、 yangh gaep.

Doxgiet Banhswj Caez Maeuzsuenq Hwngfat

Dangguh bouxdaeuz cunh “song veij” banhswj, Ciengj Ginjgunh doenggvaq hong ngoenznaengz guh hozdung daengj fuengsik hezdiuz “song veij” cwngzyenz gvanhaeh, guh daengz cunh “song veij” banhswj doxgiet doxgap、 doengzcaez cinbu. Vih daezhawj aen dieg hozdung ndei hawj dangjyenz dungzci, gaem ndei hwnjguh cujciz cindi, de gaenxmaenx caeuq gak bumwnz gaep baihgwnz doxdoeng, ceng’aeu 50 fanh maenz ngaenz hwnjguh laeuzbanhgoeng cunhbu, gveihfan le gak aen funghranz goengnaengz, de yawjnaek gyagiengz son’gyauq siengjngeix dangjyenz duivuj, baeznaengz camgya “song hoih” daengx guek dauqma gienh saeh daih’it couhdwg gangj gij cingsaenz aen hoih hawj dangjyenz daengx cunh, caemhcaiq yungh aen bingzdaiz candenj yenjgyau caeuq dangjyenz dungzci doxdoeng. De lij doenggvaq cujciz dangjyenz dungzci dauq byaij lohhungzginh、 dauq coih lohhungz- ginh caeuq gangj gojgaeq hungzginh daengj hozdung daezsang roxyiuj siengjngeix dangjyenz duivuj, caenh- itbouh giendingh siengjngeix saenq- niemh.

Daiqdaeuz Hwngfat Ginghci

Gaenh bi neix daeuj, Ciengj Ginjgunh cujciz cunh “song veij” banhswj, lai fuengmienh ceng’aeu ngaenzcienz ca mbouj lai 270 fanh lai maenz, hwnjguh Bulung Cunh 6 diuz loh doeng cuj 13 goengleix, saedyienh Bulung Cunh cujcuj doeng ci; hong daengx yienh “goengloh daveican” seiz, de daiqdaeuz haeuj cuj haeuj ranz guh hong dungyenz, iuheuh vunzmbanj comz ngaenz gien ngaenz, caemhcaiq boiqhab cwngfuj hezdiuz rau caeuq bouj diuz loh gvaq reihnaz ciemq dieg haenx, vih swnhleih saedhengz goengloh Bulung daez gaep gaij guh baetseuq gazlaengz, baujmaenh lohsuijniz doeng mbanj dawzseiz guhsat doeng ci. Youq daengx guek gaenxmaenx hwnjguh lajmbanj moq sevei cujyi, gyavaiq gaijndei vanzging vunz youq seiz, Ciengj Ginjgunh fatok gij cozyung “song daiq” dangjcujciz caeuq dangjyenz, doenggvaq “gunghcwngz vuenh moq”“gunghcwngz loegvaq”“gunghcwngz ronghlwenq” daengj sam aen gunghcwngz hung, guhsat hwnjguh lajmbanj moq seiq aen cuj Mbanjhung Bulung, hawj vunzlai dangdieg ndaej leih hwnjguh lajmbanj moq daiq daeuj haenx. Youq canjnieb hwngfat fuengmienh, de gaenxmaenx sonyinx vunzlai yungh ndei diegnamh riuzcienj, daiqlingx vunzmbanj bae dieg fatdad gaujcaz hagsib gij gingniemh diegnamh riuzcienj, gibseiz cienjbienq gvanhnen vunzlai, caemh- caiq iuheuh vunzlai ciuq dieg bae guh hwngfat ndaem byaek mbouj miz goenghaih, caemhcaiq gveihmoz bi hung gvaq bi. Bi 2015, Bulung Cunh ndaem makyungz 250 lai moux, cungjcanjciz daengz 375 fanh maenz, ndaem lwgmanh 350 moux, canjciz daengz 245 fanh maenz, hawj vunzlai cimz daengz diegvan, engq giendingh gij saenqsim caeuq gietsim vut gungz baenz fouq.

Haengj Bang Vunz Yinxlingx Seizhwng

Youq Veijgyangh Bulung Cunh, vunzmbanj cungj naeuz “miz hojnanz ra Ciengj Ginjgunh”, mboujguenj saeh hung saeh iq ndaw cunh ranz lawz, Ciengj Ginjgunh cungj daiqdaeuz okyienh youq yienhciengz, vih vunzlai ok banhfap、 gaijgez hojnanz.

Suh moux vunzmbanj Bulung Cunh, aenvih saeh loeklak baenz ndangcanz, ndaw sim itcig gig doeknaiq, lij ciengzseiz youq cizdij hozdung roxnaeuz hai hoih ndaw cunh seiz “ciengq fanjdiuh”. Ciengj Ginjgunh ciengzsaeq roxyiuj gij cingzgvang de le, hwnj ranz vih Suh moux ciengzsaeq gangj fuengcim cwngcwz gvendaengz bang gungz bang hoj caeuq leih beksingq haenx, gibseiz cienjbienq siengjngeix gvanhnen Suh moux, hoizsoeng gij simcingz doeknaiq de, gujli de gaenxmaenx wngqdoiq gij daemdengj caeuq deuqnyex saedceij, caemhcaiq cungfaen yungh ndei cwngcwz mizgven leih beksingq haenx guh swnghcanj、 ra ndei loh. Seizneix, Suh moux gaenq laebdaeb lai bi ndaem makyungz、 lwgmanh daengj doenghgo, bi souhaeuj daengz 3 fanh lai maenz.

Ciengj Ginjgunh seizseiz geiq gij raeujnit vunzmbanj, baez bungz hwnj rumz fwn doek, roxnaeuz seizdoeng nit lai, de cungj bae ranz bouxgeq gadog caeuq ranzgungzhoj cam raeuj cam nit, yawjyawj ranz lawz fwn laeuh mbouj laeuh, miz mbouj miz buh daenj caeuq haeuxgwn gvaq seizdoeng daengj, ciengzseiz gag ok cienz cawx haeux cawx youz hawj vunzlai gungzhoj, aeu vunzlai henzgyawj dangbaenz vunzranz swhgeij.

Gaenxmaenx Daez Ok Genyi Lajmbanj Gyaeundei

Dangguh yinzda daiqbiuj daengx guek, Ciengj Ginjgunh caeuq sam boux “cunhgvanh” yinzda daiqbiuj wnq youq Aen Hoih Baezdaeuz Cibngeih Gaiq Daengx Guek Yinzda daezok gij yian“aeu hwnjguh lajmbanj gyaeundei, aeu gaijgez gij vwndiz ‘nyapnyaj humx mbanj’ gonq”, caemhcaiq youq Aen Hoih Baez Sam Cibngeih Gaiq Daengx Guek daezok “gij yian baujhoh aenmbanj daegsaek minzcuz”. Daezyiq de ndaej daengz bouxdaeuz gaep baihgwnz yawjnaek, bi 2013 Guengjsae hwng- hwnj “Guengjsae gyaeundei·lajmbanj cinghseuq” hozdung, de daj hawj dangjyenz camgya hainduj, cujciz dangjyenz daengx cunh raiz mbawsaw wngqcingz, iugouz caezgya daj ranz swhgeij hainduj gonq, daiqdoengh vunzlai daengx cunh. Cujciz vunzlai minzcuj doisenj bouxsauqbaet ndaw cuj, rengzrwd bang doi haiguh “Veijgyangh gyaeundei·lajmbanj cinghseuq” hozdung. Seizneix, Bulung Cunh gaenq gihbwnj saed- yienh gij moegbiu hwnjguh “yanghfung vwnzmingz、 yiengh mbanj caezcingj、 guenjleix minzcuj”, caemhcaiq youq bi 2014 ndaej Guekgya Minzveij、 Caizcwngbu ancoh baenz “mbanj daegsaek siujsoq minzcuz Cungguek”.

Fatyiengz Conzdungj Coicaenh Doxgiet

Youq hwnjguh cingsaenz vwnz- mingz lajmbanj fuengmienh, Ciengj Ginjgunh roxyiuj daengz, cingsaenz vwnzva saedceij vunzlai dangdieg dandog, caemhcaiq miz mbangj vunz maez dwkbej、 dojcienz daengj sibgvenq mbouj ndei, yienghneix de gietdingh vatcimh fungsug conzdungj minzcuz dangdieg, cujciz haiguh hozdung gig miz daegsaek minzcuz mbanjranz haenx. Seizneix, gaenq banh baenz sam gaiq “ciet diuq- yieng” hozdung Myauzcuz Veijgyangh Yangh. Binaengz ndwencieng, senj- soengq cezmuz camgya vwnzyi laj- mbanj comzyienj ndaw yienh cujciz haenx, lai baez ndaej itdaengjciengj. Haiguh vwnzva hozdung mboujdan fungfouq gij cingsaenz saedceij vunzlai, vut gij fungsug yaezrwix bae, lij mizyauq coicaenh aenmbanj doxgiet huzndei.

“Guh vunz aeu gangj gienok, mbouj lau gwnvi, guh cunh ganbu engq wnggai guhyiengh daiqdaeuz, fatok cozyung daiqdaeuz, mbouj hawj vunzlai saetmuengh, yungh gij cing- saenz rapdawz doxgiet daiqlingx vunzmbanj gaem swnghcanj、 ra ndei loh, dawz mbanjranz hwnjguh ndaej engqgya gyaeundei, hawj gyoengq vunz mbanjranz vaiqdi saedyienh vut gungz baenz miz.” Neix dwg coenz vah Ciengj Ginjgunh seiqseiz gangj, de engq dwg yungh hengzdoengh saed- saeh swhgeij bae hengzguh coenz vah neix.