Baez dwen hwnj gienh saeh neix, gawq hawj gou sim diuqbubbub, youh hawj gou siengj riuhaha, vih gijmaz ne? Baihlaj gou daeuj gangj hawj sou dingq ba!

Mwh gou lij iq, geiq ndaej miz haemh ndeu, daxboh daxmeh miz di saehcingz cungj okbae lo, ndaw ranz cij lw gou boux dog, daxmeh yaek okbae seiz daengq sam daengq seiq:“Mwngz dingq vah bw, mbouj ndaej luenh doengh dienh、raemx、feiz roxnaeuz fagcax, miz vunz bongx dou hix mbouj ndaej hai dou bw! Siengj ninz couh gag hwnj congz ninz gonq,daxboh daxmeh banh ndei saehcingz couh dauqma.”Gou bek aek naeuz:“Rox lo, sou cuengqsim okbae ba!”Bohmeh okbae le, gou angq dwk gag gangj gag naeuz: Ndei lai lo, gag gou youq ranz, yienghneix, gou baenz- lawz yawj densi cungj ndaej lo, siengj yawj gijmaz couh yawj gijmaz. Ngamq daengz gyanghaemh 7 diemj 35 faen, “Lij caeux ne.”Gou bek fwngz hwnj- daeuj,“caen dwg ndei lai lo.”

Neix dwg gou baez daih’it gag youq ranz, yienznaeuz gig mizyinx hix gig sim’angq, hoeng, mbwn baez laep caez, ndawsim gou lij dwg miz di lau ne. Hai, yawj densi yaep ndeu ba, yawj dwk yawj dwk, couh daengz gyanghaemh 11 diemj cung lo, vunz ranznden cungj ninz caemrwgrwg lo, lwgda gou hix hai mbouj ndaej lo.Gou gven densi hwnj congz bae ninz,hoeng, baez hwnj congz ninz, gou couh singj lo, fan bae fan dauq cungj ninz mbouj ndaek, rog cueng lumjbaenz miz vunz byaij bae byaij dauq, lij dingqnyi duzmeuz hemqmeumeu lumj sing lwg- nyez daej nei, youh lumj miz vunz bongx dou, gou simvueng dwk siengj:Dwg mbouj dwg vunzvaih rox gou gag youq ranz le daeuj guhcaeg ne? Gou gwq siengj gwq lau, couh aeu denz goemq gyaeuj, hoeng gou lij mbouj onj, lau bouxcaeg rox gou youq gwnz congz, gou youh ndoj ndaw gungxdou bae, yaep ndeu gou youh ndoj laj congz bae, yienghneix roxnyinh ancienz di lo, gou heiq hung hix mbouj gamj ok, itcig ndoj youq laj congz.

“Ngi—— nget”sing dou yiengj lo,daxboh daxmeh dauqma lo, daxmeh yawj gwnz congz mbouj raen gou,simgip dwk hemq:“Genhcaij, mwngz youq gizlawz?”Daxboh hix dauqcawq ra gou, doeklaeng lij dwg daxmeh fatyienh gou ndoj youq laj congz ninzndaek lo, daxmeh riu naeuz:“Gou cungj suenq ra ndaej raen mwngz lo, vaiq di okdaeuj ba!” Gou baez raen daxmeh couh got dawz de, fwt daejnga’nga lo.

Daxboh riu naeuz:“Gaej daej lo, mwngz caeuq daxboh daxmeh gangj- gangj, mwngz dwg caeuq dou guh yahndoj ba? Dou ra haujlai giz cij ra raen mwngz ne!”Daxboh gangj sat, riuhaha lo, daxmeh hix riu lo, gou hix riu lo.

Mwngz gaej yawj gou bingzseiz mbei gig hung, hoeng, baez haenx caen dwg lau ndaej hoenz cungj saet lo.

（指导老师：覃珍团）