Rumzcin oiqaem’aem, youq gyae dingqnyi gyoengqvunz heuh, couh guhmuengz buet ok daj baihdoeng daeuj, de seiqcawq cienz siusik seizcin, yungh fajfwngz swhgeij na noek raeujremh haenx dawz gyoengq- vunz daj ndaw nit gej okdaeuj, daihdeih fanhfaed ndaej doekseng boek ngeih haenx gyaenjnaux de, rumzcin ndaej heiq, mbouj lau dwg- rengz youh dawz daihdeih ci ndaej moqyetyet bae.

Seizhah daeuj le, ndit ndongq- loulou, vunzraeuz mbwqmbat sim- fouz, daep doxraen couh cam: Yi, rumz ndot haeuj gizlawz bae liux? Rumz daeuj lo, gaex fwj deuz, ndaw fwj sup raemx, naekyoekyoek bae, rumz mbouj lau baeg, baengh swhgeij rengz hung, gaem fwj youq ndaw fwngz, yungh rengz vaenj bae vaenj dauq, fwn doeklele, namh ro sup raemx gaeuq lo, daihdieg mbaeq lo, doenghgo mbaeq- mbat, ndaej swiq ndang seuq lo.

Seizcou, rumz daengz lo, mbouj dwg rumzcin unqswnh ciencien fanhfanh, hix mbouj dwg rumzhah yiedcingz yienh’ok. Rumzcou baez daeuj, gij mak cungj cug lo, feih hom cuenq youq ndaw heiq. Riengzmienh naek ndaej hwet gungj lo, najriu gyoengqvunz ndaw naz dajsou lwenq- da dangqmaz, diemz daengz ndawsim.

Seizdoeng menhmenh daeuj daengz, rumz ngoenz beij ngoenz nit lo, de hawj gyoengqduz ndaej ninz ndiu raez ndeu, hawj haujlai nonhaih nyaenx mbouj ndaej nit dai bae. Gyoengqvunz gyanghaemh sim’onj youq ndaw ranz humx aen buenz danq byoq feiz、saz lwgmaenz、gangjgoj, raeujrubrub.

Gij gojgaeq rumz bi dem bi cienzriuz, dangh mwngz dingqnyi gij gojgaeq rumz wnq, nyienh daeuj lwnh hawj caezgya dingq lwi?