2017 nienz 3 nyied 3 hauh, Cunghgoz Yinzminz Cwngci Hezsangh Veiyi Daih Cibngeih Gaiq Daengx Guek Veijyenzvei Daihhaj Baez Veiyi youq ndaw Baekging Yinzminz Davei- dangz hoenghhum ciuhai lo. Gou caijsoq gig ndei, ndaej caeuq Cunghgoz Minzcuz Yijvwnz Fanhyiz Giz gyoengq lingjdauj caeuq doengz- saeh itheij haeuj Yinzminz Davei- dangz bae dingqhoih, gig gikdoengh, siengj daengz haujlai haujlai.

Gizsaed, gou youq 2 hauh gyanghaemh couh sim’angq dwk fouzfap ninz ndaek, foek bae fan dauq, ndaw uk siengj: Seizneix Yinzminz Daveidangz caeuq gaxgonq siujyoz govwnz gou hag haenx doxbeij, bienqvaq lai lwi? Ngoenzcog gou yaek daenj maz buh bae? Dwg mbouj dwg yaek yawjraen haujlai vunzak vunzmaenh …… Moengz- moengz loengzloengz ninz ndaek lo, byonghhwnz singj hwnqdaeuj geij baez yawj cung, simgaenj muenghdeq ranzrongh. Ai! Baenzlawz lij caengz ranzrongh ne?

Ngoenz daihngeih, gou caeux- caeux couh cagaenj seizgan guh ndei gij hong ndaw fwngz. Gwn haeuxringz le, gou ganjgaenj aeu buh Boux- cuengh yaek daenj okdaeuj, angq- vauvau buet bae hawj gyoengq lauxsae、doengzsaeh yawj. Daihgya deng gij cingzangq gou yingjyangj, cungj doxciengj daeuj bang gou, bouxneix bang gou dangq buh, bouxhaenx ciq vacanghbinj hawj gou…… Sim gou raeujrubrub. Riengzlaeng, gou roengz laeuz、 dap ci, itloh bae vunzlai cungj haenh buh gou ndeiyawj, ndawsim gou gaej gangj miz geijlai angq lo!

Gou youq gwnz ci bouj ninz yaep ndeu, singj daeuj seiz, cingqngamj daeuj daengz Denh’anhmwnz Gvangj- cangz. Mwhhaenx, mbwn gvengq- cagcag, rumz liengzsisi, geizhoengz mbinyagyag, sojmiz cungj yiemzrwd youh miz cizsi. Dou ngamq roengz ci, couh miz gicej buet gvaqdaeuj yaek caijfangj gou, vanzlij gig mizsim iucingj geij baez dem. Ciuq mizgven gvidingh, gou vah’unq doi bae lo. Doeklaeng, gou caeuq gyoengq lingjdauj、lauxsae youq gij gingjsaek gyaeundei neix itheij ingj siengq. Ngoenzneix gvangjcangz vunz lai vunz daih, gyonjcomz le haujlai vunzak vunzmaenh. Ndit raeuj cik youq gwnz naj vunzlai, engqgya ingjok gyoengq- vunz naj ronghsagsag, cingsaenz gvaekgvaek. Gou ndang daenj buh Bouxcuengh, itloh byaij gvaqbae, vunzlai yawj gvaqdaeuj cungj haenh- cupcup, gicej、boux veijyenz Yangh- gangj、 boux baengzyoux guekrog、boux doengzyieng Guengjsae daengj haujlai vunz cungj caeuq gou ingj siengq louzniemh, gijneix cungj hawj gou sim diemzswdswd, caencingq roxnyinh buh Bouxcuengh raeuz miznaj dangqmaz. Gou engqgya najriu najrongh, ndawsim siengj: Deng ha! Neix couh dwg gij yienghndei Boux- cuengh raeuz!

Baizdoih、genjcaz le, dou dauq- daej byaij haeuj Daveidangz it laeuz daihding, yienghyiengh cungj caez- cingj, migda ronghsag. Seizneix gou miz di gaenjcieng, hoeng miz gyoengq lingjdauj caeuq lauxsae youq henz ndang, aensim dabsaed haujlai. Liz haimuq lij miz di seizgan, dou ingj siengq、cawx byuksaenq geiqniemh le, couh daezgonq bae hoihciengz naengh roengzdaeuj. Naengh youq gwnz diegnaengh yiemzrwd sangrad neix, gou roengzrengz baujciz caemdingh, hoeng ndawsim senq lumj raemxlangh fanfoenfoen. Dingqnaeuz, ginggvaq saekdi cingjcoih le, Daveidangz mwhneix engqgya miz heiqseiq lo. Aen diegnaengh dou youq it laeuz, dingjgyaeuj dou daeng ronghlwenq, baihnaj dou dwg gyoengq veijyenz, liz dou loq gyae di dwg boux guekgya lingjdauj, gwnz ngeih、sam laeuz dwg gicej、 gunghcoz yinzyenz daengj vunz naengh, caencingq dwg comz- gyonj gij vunz maenh’ak daengx guek gak dieg. Gou dwg lwgmbwk vunzguhnaz bingzciengz ndeu, ndaej caeuqfaenh dingqhoih, gamjgik dangqmaz!

Mbouj geij nanz, mwh ceiq gikdoengh simvunz daengz lo! Cienz- daej ndwn hwnjdaeuj ciengq goguek! Geijlai baez, diuz go neix hawj gou raemxda rim gvaengzda, hoeng gij raemxda gaxgonq cungj mboujyawx baezneix ndat. Lumjbaenz caenndang ginglig, gij lizsij hoenx vunzdig gouq guekgya haenx mboujduenh youq ndaw uk gou yienh okdaeuj, geijlai lezsw lae lwed vutmingh, cij vih raeuz ceng’aeu ndaej benq diegdeih daihndei neix. Gaenlaeng baenghgauq aen dangj raeuz cingqdeng daiqlingx、ikfanh beixnuengx caezsim buekguh, guekcoj cij miz gij cingzcik hungmbwk ngoenzneix, gou cij ndaej ndwn youq aen dienh saenzsingq neix dingq diuz go gig gamjdoengh vunz neix. Ndawsim gou hix itcig yienghneix nyinhnaeuz, couhcinj aen guekcoj hungmbwk raeuz youq gwnz roen baenaj lij bungz daengz gak cungj hojnanz, lumjbaenz gij Vwnconh daih deihsaenq gig youqgaenj haenx; hix miz haujlai vwndiz beijlumj yawjbingh hoj、yawjbingh bengz daengj vwndiz, hoeng mbouj yungh miz saek di hozngeiz, mboujlwnh ginggvaq le geijlai hojnanz, guekcoj raeuz lij dwg aen guekgya hungmbwk ndeu, cibsam ik lai beksingq cingqcaih vihliux gensez aen yendaiva guekgya ndeu haenqrengz buekguh. Ngoenzneix daengx guek yinzda daiqbiuj、cwnghez veijyenz, vihliux gyaepgouz gij saedceij engqgya gyaeundei gvihaeuj daengx guek yinzminz de, gyonjcomz youq aen dienh saenzsingq neix, doengzcaez damqyaeng guekgya daihsaeh. Neix dwg aen saedceij hawj gou sim’angq fouzbeij ndeu! Gou giensaenq, guekcoj raeuz ngoenzlaeng itdingh engqgya fouqmiz giengzdaih!

Ngoenzneix, gou youq gizneix yawjraen duenh ginghdenj lizsij neix, roxnyinh gig miznaj. Youq ndaw Yinzminz Daveidangz gikcingz fanfwd- fwd. Gou dwg vunz Bouxcuengh, Bouxcuengh dwg guekcoj aen siujsoq minzcuz vunz ceiq lai ndeu, dwg gyoengqvunz gensez guekcoj ndawde bouhfaenh youqgaenj ndeu, couh wngdang gaenhwnj gij yamqdin seiz- daih, gamj roemx baenaj, caeuq guekcoj gak minzcuz yinzminz doengz- caez roemx baenaj. Biengzhoengh diuz go gyaeundei neix, itdingh miz gij sing’yaem ndeidingq Bouxcuengh!

Seizgan gvaq ndaej gig vaiq, haihoih sat lo, gou caeuq daihgya lizhai Daveidangz lo, hoeng gijneix cix mbouj caengz gietsat. Daih’it baez haeuj Yinzminz Daveidangz bae, gou youq mwh gaenjcieng youh gikdoengh de lumjbaenz ndaej daj ndaw daengz rog swiq baez ndeu. Dangguh bouxcoz aen seizdaih hungmbwk seizneix, wngdang aeu engqgya roengzrengz bae rap hwnj gij rapnaek lizsij, mbouj ndaej doiswz. Gou ngoenzlaeng yaek baenzlawz guh hix gaenq cingcuj, couhdwg baez yamq baez yamq byaij, moix gienh saeh cungj roengzrengz guh ndei，mboujduenh sij ok biencieng moq!