4 nyied 11 hauh, ciet minzcuz gai ndwensam bi 2017 Yinznanz Swngj Dalij Bwzcuz Swcicouh youq Dalij haimuq, gaihmusiz yienhciengz yinx ndaej vunzlai dangdieg caeuq bouxhek ndaw guek rog guek baenz fanh vunz doxhwnj daeuj yawjngonz. Ciet minzcuz gai ndwensam Dalij bineix hopheux aen cawjdaez conz- dungj “max doxdax、 ciengq go、 guh gaicawx、 cimz gijgwn ndei”, ciuq minzsuz conzdungj, haiguh minzcuz vwnzyi biujyienj、 minzcuz max doxdax、 siujsoq minzcuz dijyuz yindungvei、 cien vunz heux Wjhaij doxdax gwih danci、 vunzlai vwnz dij hozdung, banh baij gai doxgaiq ndei doxgaiq moq 12 yienh si、 baij gai doxgaiq lijyouz “Dalij laex ndei” nem baij gai gak cungj daegsaek doxgaiq daengj ginghci doxgyau hozdung.

Gai ndwensam yienhciengz, vunz lai vunz daih, vunzlai daj seiq mienh bet fueng daeuj haenx nem bouxhek ndaw guek rog guek, baenz bang baenz gyoengq, ndaej yawjngonz gij buhvaq minzcuz loeg henj hoengz daengj lai cungj lai yiengh saek haenx, yawjngonz gij ndangdaenj mbouj doxdoengz minzcuz.

“Hawciengz gai ywdoj”, dwg aen diemjrongh he, hawciengz gai ywdoj gai ndwensam, yw lai, soqmoeg lai, hawj vunz haenh mbouj dingz.

Daiz doiq fwen ndeiyawj raix- caix, saimbwk faen mbiengj, mwngz cam gou dap, gij diuh Bwzcuz ndei riuz haenx haprwenz youq gwnzmbwn gai ndwensam Dalij, engq gyalai gij vwnzva heiqfaenh ngoenzciet minzcuz.

Max doxdax dwg gai ndwensam dieg ceiq ndeiyawj he. Baez max doxdax gai ndwensam neix comz doihmax bouxgwihmax daj Baek- ging、 Sinjyangz、 Guengjdoeng、 Gveicouh、 Neimungz caeuq Gunh- mingz、 Yanghgwzlijlah、 Dalij Couh、 Wjyenz Yen、 Genconh Yen、Yangbiz Yen、 Siengzyinz Yen daengj dieg, gungh 16 aen doih camgya doxdax, 118 duz max. Doxdax gig haenq.

Gai ndwensam ndaej haenh baenz aen haw ndawbiengz ceiq hung、 ceiq miz minzcuz vwnzva daegsaek、 ceiq gaeuqgeq Yinznanz Swngj. De mboujdan miz gij gaengawq cienzgangj ndawbiengz, hix miz gij lizsij swhliu geiq, Dangz、 Sung、 Yenz、 Mingz、 Cingh, gij ginggvaq ligdaih gai ndwensam yienjbienq cungj miz lizsij swhliu caz ndaej. Ciuhdangz Nanzcaugoz seizgeiz, fatseng gienh saeh lizsij youqgaenj he, neix couhdwg Nanzcau daihroek daih vuengz Yi Mouzsinz youq Dangzdwzcungh Cinhyenz cib bi (gunghyenz 794 bi) caeuq Dangzcauz sijcinz Cuih Cojsiz youq aen coengceiz Denjcanghsanh dox raennaj gietmungz, laeb sawdiet yiengh ndeu seiq faenh, mieng caeuq Dangzcauz ciengxlwenx doxndei doxhuz. Gietmungz le, Yi Mouzsinz hawj beksingq Dalij rox, baez daengz ndwensam ngoenz cibhaj aeu youq gvangjcangz baihnaj aen coengceiz doxcomz, mbouj ndaej lumz bae, dajneix couh miz le gai ndwensam. Yienghneix, gai ndwen- sam hix dwg gij guhcingq guekcoj doengjit caeuq minzcuz doxgiet.

Bi 1991, Dalij Couh Yinzda Cangzveijvei dawz gai ndwensam dingh baenz “ciet minzcuz Dalij Bwzcuz Swcicouh”, binaengz lig- gaeuq ndwensam ngoenz cibhaj youq rog dou baihsae Singzgaeuq banh, guh 7 daengz 10 ngoenz. Seizneix, de mboujdan dwg aen haw gaicawx hoenghvuengh nem ceiq gaeuqgeq Yinznanz baihsae, hix dwg ngoenzciet hoenghhwd ndawbiengz vwnzyi dijyuz doxgyau gak cuz beksingq Dalij Couh bi gvaq mbat haenx, gaenq baenz dieg gaicawx doxgaiq nangqdaengz 20 lai aen swngj si, lij dwg aen haw youqgaenj doiqrog haicuengq Dalij gak minzcuz guh vwnzva yisuz doxgyau、 ciu canghseng’eiq yinx ngaenzcienz、 dinfwngz doxgap daengj.

“Cien bi ok haw he, haw he ok cien bi”. Ciuq gaisau, lai bi daeuj, Dalij Couh gaenq ndaej aen cwngheuh seiqgyaiq diciz gungh- yenz、 gizdieg gingjsaek okmingz guekgya gaep、 gizdieg swyenz baujhoh guekgya gaep、 aen singz okmingz lizsij vwnzva daengx guek、 aen hawsingz lijyouz maenhndei Cungguek、 aen hawsingz ceiq miz yinx Cungguek、 aen hawsingz youqndwi lijyouz cib ndei Cungguek daengj.