Aen haggeiz neix, Gunghcwngz Yauzcuz Swciyen Gvanhyinh Siujyoz daeuj le dah lauxsae Dwzgoz he, de hauxseng youh gyaeu youh sang, bineix ndaej 20 bi，sang miz 1.76 mij, gangj Yinghyij cix raeuzredred, sikhaek gik hwnj gij yinx gyoengq hagseng haengj hagsib.

Ciuq camrox, dah lauxsae neix seng youq Dwzgoz Hanbauj Si, mingzcoh“Aili”dwg de daeuj Cungguek le cij gag an. De bi’gvaq buenq bi laeng gauhcungh bizyez, youq aen guek gyoengqde, gauhcungh daengz dayoz duenh cungqgyang neix, miz bi seizgan he dwg goq sizcenj, iugouz youq guekrog sizciz sizcenj le, cij ndaej haeuj aen hagdangz dayoz. Yienghneix Aili couh daeuj daengz Gvanhyinh Siujyoz guh bouxciyen gozci, son goq Yinghyij 3 nienzgaep daengz 5 nienzgaep.

Aili gunghcoz nyinhcaen fucwz, moix ngonz de cungj daezgonq bwh goq, de hwnjdangz le cungj haengj caeuq gyoengq hagseng guh hudung, hagseng cungj gig lingzlaeux, gij fwnveiz gouzhag cihsiz ndaw hagdangz rimrad. Gyoengq doengzhag bouxboux cungj maij dah lauxsae guekrog neix, baez daengz hozdung seiz roengzdangz, gyoengq doengzhag cungj humx youq henz ndang Aili, miz seiz son de diuq Fouxgyong’yauz, mizseiz son de gangj vah Cuengguek, seizneix de gaenq rox sij 300 lai cij Sawgun, rox gangj di Vahgun he, caen dwg hawj vunz baiqfug ha.

(Cwng Ciminj/郑智敏）