Bouxvunz coengmingz ndeu bae baiq sien, gouz bouxsien baujyouh aen mbanj de it bi 365 ngoenz bouxboux ndang cangq mbouj baenzbingh. Bouxsien naeuz:“Mwngz yauhgiuz baenzlai, ceiq lai ndaej 4 ngoenz, mwngz gag senj ba!” Bouxvunz coengmingz naeuz:“Yienghneix gou couh senj ngoenz seizcin、 ngoenz seizhah、ngoenz seizcou caeuq ngoenz seizdoeng.”

Bouxsien naeuz:“Baezneix mbouj suenq, ceiq lai ndaej 3 ngoenz, mwngz senj 3 ngoenz lawz?” Bouxvunz coeng- mingz naeuz:“Yienghneix gou senj ngoenzlwenz、ngoenzneix caeuq ngoenz- cog.”

Bouxsien youh naeuz:“Baezneix hix mbouj suenq, ceiq lai ndaej 2 ngoenz, mwngz senj ba!” Bouxvunz coengmingz naeuz: “Yienghneix gou senj ngoenzrongh caeuq ngoenzhaemh neix.”

Bouxsien ienq naeuz:“Baezneix hix mbouj suenq, ceiq lai ndaej ngoenz ndeu, mwngz vaiq senj!” Bouxvunz coengmingz naeuz:“Bouxsien mwngz byonj bae byonj dauq, baezneix gou senj liux, mwngz itdingh aeu doengzeiq.” Bouxsien mbouj miz banhfap, cijndei ngaekgyaeuj. Doeklaeng bouxvunz coengmingz senj moix it ngoenz. Bouxsien cijndei dapwngq lo.