“Gijmaz, Siujmeiz, mwngz bae daengz aen singz baihnamz he lo?” Youq ranzhenz ciep daengz aen denva lwgmbwk daeuz dwk daeuj, Aungeih fatmoengx lo——Siujmeiz cingq doeg gauhcungh ngeih nienzgaep, seizlawz deuz bae dajgoeng lune?

“Dwg ha, daxboh, gou mbouj siengj hawj mwngz caiq bae rib gij bwngaeq mbouj dij maz ngaenz, gou aeu bae dajgoeng, hawj mwngz gvaq ndwenngoenz ndei. Doegsaw ne, ranz raeuz miz dahnuengx bae haenqrengz doeg couh ndaej lo.” Siujmeiz nai naeuz.

Ai, cungj gvaiq swhgeij mbouj miz bonjsaeh, hix gvaiq gij bwngaeq haenx—— Aungeih gag ienq hwnj- daeuj.

Aungeih yah gvaqseiq ndaej caeux, Aungeih dang boh youh dang meh, haexhaex nyouhnyouh, donq iek donq imq guenj song dahlwg majhung. Moix ngoenz guh sat hong ndaw reih, ma ranz lij aeu bae gip yakyaeh. Hoeng, gip yakyaeh hix mbouj yungzheih, gij dij ngaenz lai cungj deng vunz gip bae caez, cij lw bwn- gaeq, ndigah Aungeih cijndei ciengz bae gip bwngaeq, gai aeu di ngaenz cawx gyu. Saedceij couh yienghneix hamzhamz citcit gvaq dwk.

Mboujgvaq, Aungeih hix miz yiengh he hawj de ndaenggon ——song dahlwg mboujdan baenzsau, lij coengmingz, cungj gaujhwnj cungdenj yozyau. Dahlwg daeuz Siujmeiz doeg gauhcungh ngeih nienzgaep, dahlwg nyaeq Siujhoz doeg cuhcungh sam nienzgaep, song boux youq yozyau cingzcik cungj mbouj dwg daih’it couhdwg daihngeih.

Hoeng, seizneix Siujmeiz mbouj ndwet mbouj sing, couh caegcaeg bae rog dajgoeng lo, neix baenzlawz hawj Aungeih mbouj siengsim ne? Ai, gangj daeuj cungj dwg gij bwngaeq nyex ok hux！

Haet haenx, dah doengzhag Siuj- meiz riengz de daeuj lajmbanj liuh. Aungeih muengz bae ndaw reih swhgeij mbaet aen sihgvah he ma ranz hawj songde gwn, songde cingq gwn dwk, byawz rox, raq rumz he baet gvaqdaeuj, dawz gij bwngaeq dak youq gyanghongh baet ndaej mbin rim mbwn, hawj Siujmeiz yakfaz dangq- maz, dah doengzhag de daenj gij ndangdaenj mingzbaiz nem rim bwn- gaeq, saetnaj lai lo. Siujmeiz couh hozndat raixcaix, de baez din he dik boek Aungeih aen gei aeu daeuj cang bwngaeq, nengh fwngz doengzhag de da hix mbouj yawj laeng couh lizbae lo. Gvaq mbouj geij ngoenz, Aungeih couh ciep ndaej aen denva Siujmeiz daj aen singz baihnamz dwk daeuj.

Bi he gvaqbae, Aungeih fwt sou ndaej 800 maenz ngaenz, dwg Siuj- meiz geiq daeuj, daj youzgiz lingx ngaenz okdaeuj Aungeih fwngz cungj saenz. Ndaw mbanj vunz cungj haenh Aungeih miz dahlwg ndei he, rox hauqgingq bouxgeq, neix hawj Au- ngeih ndaenggon geij ngoenz.

Song bi le, Aungeih youh sou ndaej bit ngaenz Siujmeiz geiq daeuj he, cukcuk fanh maenz! Daj haenx hwnj, Siujmeiz geiq ngaenz dauq ranz yied daeuj yied lai, seizgan nanz le, gij vah youq raeblaeng lwnh Siujmeiz haenx cienz daengz aenrwz Aungeih: Dajgoeng ndaej baenzlai ngaenz, byawz saenq ne? Doengzyiengh dwg bae dajgoeng, bouxwnq vihmaz mbouj ndaej baenzlai, lauheiq dwg…… Aungeih roxnyinh baihlaeng deng vunz bak coeg fwngz camx, geij boux laux hujgeiq lumj Aufueng yienzlaiz yinx daeuj caeuq de gwn laeuj gangjgoj haenx, menhmenh hix mbouj daeuj lo.

Miz haet ndeu, Aungeih ngamq hai dou, bau bwn gaeq he daj gwnz dou doek roengzdaeuj, mbinfuemfuem, mbin rim gwnz namh, nem rim Aungeih daengx ndang. De baez ngiengxgyaeuj yawj, gwnz dou lij venj miz duzgaeq dai he dem! Seizhaenx, Aungeih ndaw uk baez “um” he, fatmoengx lo, neix dwg maz saeh a?

Aungeih mbouj caiq hawj Siujmeiz geiq ngaenz ma ranz, lij mbouj siengj nyinh dahlwg neix lo!

Ndwenngoenz couh yienghneix youq vunzmbanj bak coeg fwngz camx ndawde gvaqbae. Dahlwg ngeih Siuj- hoz mbouj hawj daxboh vutnaj, gaujhwnj baihbaek aen cungdenj dayoz he, caemhcaiq ndaw yienh lij ciengj hawj de fanh maenz ngaenz dem. Ngoenzhaenx, fwngz bungj mbaw dan dayoz souaeu dunghcih haenx, Aungeih raemxda laeboegboeg. Seiz- haenx, Aungeih caen siengj heuh gyoengq hujgeiq daeuj ranz gwn song cenj laeuj, hoeng, aenvih Suijmeiz, lij miz bouxlawz daeuj riengz de gwn laeuj dem ne?

Cij miz swhgeij gag ndoet lo, haemhhaenx, Aungeih fiz lo……

Ngoenz daihngeih, Aungeih singj gvaqdaeuj, Siujhoz lwnh daxboh naeuz:“Cejmeiz yaek dauq ranz lo.”

“Gaej youq dangnaj gou dwen de, de gamj ma ranz gou couh dub ga de raek bae!” Aungeih rongx naeuz.

“Daxboh, mwngz loengngeiz dahcej lo, gizsaed de mbouj lumj caezgya siengj nei, dahcej dwg riengz vunz hag gisuz, dang ndaw cangj gisuzyenz cij canh ndaej baenzlai ngaenz. Dangh mwngz mbouj saenq? Baezneix de riengz daegyoux de ma mbanj banh aen denswjcangj he bw. Yienghneix gyoengqvunz mbanjranz raeuz couh mbouj yungh okdou hix ndaej guh hong canh ngaenz lai, mbouj caiq hoj ndaej bae gip bwn- gaeq lo.”

“Mwngz gangj caen gangj gyaj?” Aungeih buenq saenq buenz ngeiz.

“Dangyienz caen lo.” Siujhoz angq dap.

Siujmeiz ma ranz lo, lij daiq daegmbauq he riengz dauq dem. Gvaq le song ndwen, aen denswjcangj couh haicieng lo. Ngoenzhaenx, vunz ndaw mbanj geq iq cungj daeuj gwn laeuj, Aufueng boux hujgeiq Aungeih hix daeuj lo. Siujmeiz ndenq ien hawj Aufueng, daegyoux Siujmeiz diemj ien. Aufueng doq cup doq najmong dwk doiq Siujmeiz naeuz:“Siujmeiz ha, gaxgonq cungj gvaiq au mwngz vunz geq da mbouj raeh, loengngeiz mwngz lo……”

“Gvaiq maz ne, au, neix dwg au mwngz cehda nyaenx mbouj ndaej namhsa, muengh gou byaij loh cingq.”

“Dwg ha, dwg ha.” Aufueng danq naeuz.

Gyoengq ranzhenz hix daeuj lo, Aungeih muengz bae roengq gaeq gaeb gaeq, geij boux hauxseng muengz bae bang fwngz.

Gyoengq hauxseng dinfwngz vaiq, yaep he gaeq couh miq hau lo. Yawj gij bwngaeq gwnz namh, Aungeih da youh mbaeq lo.

Haemhhaenx, caeuq gyoengq hujgeiq gwn laeuj caimax, Aungeih fwngz yaengx din hwnj, daengz sat gwn ndaej engq fiz lo……