Lozcwngz Mulaujcuz Swciyen aeu hwngfat daegsaek canjnieb dang- guh banhfap youqgaenj gyalai boux- guhnaz souhaeuj、 bang rengz vut gungz gunggeng daeuj guh, ciuq dieg bae guh, haenqrengz hwngfat daeg- saek canjnieb, coicaenh bouxguhnaz laisou, bi 2016 vunz lajmbanj moix vunz bingzyaenz ndaej ceiboiq souhaeuj 6638 maenz, demlai 8.2%.

Youq gwnz canjnieb hwngfat, aen yienh neix ciuq gij yenzcwz hab ndaem couh ndaem、 hab ciengx couh ciengx、 hab ndoeng couh ndoeng, aeu fatdoengh vunzlai、 sonyinx vunzlai caeuq aeueiq gij siengjmuengh vunzlai dox giethab hwnjdaeuj. Bi 2016 daengx yienh ndaem oij mienhcik daengz 12.6 fanh moux, ndaem gonengznuengx mienhcik daengz 6.14 fanh moux, guhsat ndaem byaekheu 16.2 fanh moux、 ndaem makik 3500 moux, guhbaenz dieg ndaem oij “song sang” 5000 moux, hwngfat ndaw ndoeng ginghci mienhcik gyoebsuenq 93.16 fanh moux, canjciz 4.95 ik maenz, gyalai ciengx mou 1.5 fanh duz、 yiengzbya 1.2 fanh duz、 vaiznoh 0.7 fanh duz.

Vih gemjmbaeu gij fungyiemj hawciengz bouxguhnaz hwngfat canj- nieb, aen yienh neix gaenxmaenx gungganq caeuq guhhung giyez gyaeujlungz gyagoeng doxgaiq reih- naz, sonyinx bouxguhnaz gyahaeuj ciennieb hozcozse, caezgya guhdoih guenjleix, gyangqdaemq gij ngaenzgoek ginghyingz guh nungzyez caeuq fungyiemj hawciengz. Seizneix daengx yienh gungh miz oij、 maenz、 gonengznuengx nonsei daengj giyez gyaeujlungz gyagoeng doxgaiq reihnaz 18 aen, nungzyez ciennieb hozcozse 289 aen. Aen Hozcozse Bouxguhnaz Dajndaem Dajciengx Fanh Ranz Miz Lozcwngz, hwngfat veiyenz 580 ranz, ciengx douq meh 500 lai duz, bi gai douqnoh 15000 lai duz, bi canjciz daengz 100 lai fanh maenz.

Haenqrengz gungganq hwngfat denswj sanghvu, gujli caeuq sonyinx giyez densangh youq gwnz muengx haiguh gai doxgaiq reihnaz miz daegsaek hozdung, giyez densangh hwngfat daengz 40 lai aen. Sanghmou vuzliuzyez gyavaiq hwngfat, miz bouhloh doicaenh hong gya’gvangq gaijguh hawciengz nungzmou Siuj- cangzanh Cin, gyalai diemqnungzgyah caeuq diemqbienhleih 150 lai aen, gyalai vuzliuz fuzvu vangjdenj 20 lai aen.

(Veiz Yuzdai)