Daj Namzningz yiengq baih- saebaek hai ci bae daih’iek 80 goengleix, couh daengz suenva raeblaeng Namzningz funghgingj gyaeundei haenx—ranzcoj Boux- cuengh Yienh Sanglinz.

Ciuhmingz satbyai boux dilij yozgyah、boux youzcet okmingz Ciz Yazgwz, yungh 30 bi seizgan youzcet daengx guek 21 aen swngj gvaq, dawz gij gingj gij saeh de youq gwnz loh youzcet yawjraen dingqnyi haenx sij baenz 《Youzgeiq Ciz Yazgwz》bonj saw gungh 260 fanh cih saw ndeu. Ndawde de youq Sanglinz seizgan ceiq nanz, youq le 54 ngoenz, youq bonj saw《Youzgeiq Ciz Yazgwz》 louzcienz daengz seizneix lw miz 60 fanh cih saw haenx ndawde miz 16000 lai cih cienmonz sij Yienh Sanglinz.

Naengh youq gwnz aen ruz iq ndeu, riengz aen sokraemx geq Ciz Yazgwz bihaenx youzcet gvaq doxhwnj, gij raemx sawdikdik yawjraen daej, seiz mbouj seiz miz bya iq youz bae youz dauq, raemx lae seiz gip seiz menh, song hamq dah ndoeng faexcuk youq daengngoenz banhaemh seizcou ingj baihlaj funghgingj gag miz gij saek ndei de. Diuz dah neix couh dwg Dahcinghsuij, dwg diuz dahmeh Yienh Sanglinz, vang con gvaq daengx yienh Sanglinz. Gwnz Dahcinghsuij “Samleix · Yiengzdoh Gingjgih” soqlaiz miz aen cwngheuh “Gveilinz iq” neix.

Ndaw Yienh Sanglinz, gingj ndei lai yinx hekyouz. Byacwx habngamj lienhndang ciengxndang, Dalungzhuz lumj Gveilinz gwnz raemx, rizgeq Cicwngz “Singzcuengh”, Huzmeh- lungz、Huzyinzlij、Huzginhlenz caeuq Mbanjgujmingz raemx saw gingj gyaeu faex raemh ranz geq ndaej heuhguh “sam huz mbanj ndeu”、 “mbanj canghyienz” Buguh Cunh daengj dieggingj riuzmingz doh gwnzbiengz. Dieg gyaeu ok doxgaiq ndei, gij haeuxndei、oij、reh、batgak、mbawcaz、 yiengzbya’ndaem、 bya Dahcinghsuij Sanglinz hawj vunz dwen daengz myaiz raengh, ndawde haeuxndei、batgak ndaej lied haeuj canjbinj baujhoh deihleix biuceiq guekgya. Dieg gaeuqgeq daejrom vwnzva hix caemh nanwt, vwnzva Mehlungz、vwnzva Dohhozgoeng、vwnzva fanhsouhgoeng、vwnzva heiq- goengsae、vwnzva Ciz Yazgwz、vwnzva sigbei Ciuhdangz Singzdangz doengh gij vwnzva fungsug lizsij neix lai cungj lai yiengh goek laeg riz geq.

Doengh bi neix daeuj, Sanglinz hopheux “swnghdai guh goek、saekloeg hwnghwnj、lijyouz hoengh yienh、caez yiengj siujgangh” muzbyauh dinghvih, guh ndei bien faenzcieng “ranzcoj Bouxcuengh·Sanglinz ciengxndang”, hwnj gingj- gih, vat daegsaek, ca fugsaeh, laeb binjbaiz, comz rengz cauxguh aen- yienh lijyouz daegsaek Guengjsae gag miz daegsaek bonjfaenh haenx, aeundaej cingzyauq yienhda, mboengqneix ndaej bauq hawj Swcigih Yinzminz Cwngfuj baecinj soengq hawj aen cwnghauh “aenyienh mizmingz lijyouz daegsaek Guengj- sae”.