Cingmingz ndoengfaex mwn

Gyanghaet mbwn ronghsag

Vunz bae bo dawz gvak

Aeu mbak namh dwkmoh

Hagseng yaengx geiznding

Baizdui sing hwnj rij

Daengz lezsw naj dih(moh)

Youq gizhaenx caeqbaiq

Baihnaj beigeiqniemh

Sien diem vagien soengq

Hawj va nge baenz boengj

Caiq doengzcaez hengzlaex

Caemh comz naj moh deq

Dingq bouxgeq lwnh goj

Lezsw goenglauz doh

Coz iq cungj aeu geiq

Seiz dingjhoenx Yizbwnj

Gyoengqde hwnj cancangz

Dawz bikmax hwnj dangz

Gaj Dunghyangz gyoengqcaeg

Dungj Cunzyui okmingz

Vih gwzming vutmingh

Ywbauq yungh fwngz gingz

Raeuz hoenxhingz vunzdig

Lezsw hoenx couh cung

Gvaq ndoeng cungq fwn cax

Caeuq gyoengq vunzdig gaj

Dinga mbouj rox unq

Naeuz Gang Meij Yenz Cauz

Bauj ranz re guek maenh

Caez dawz lezsw haenh

Vih biengz gaenx gunghawj

Lezsw seiqvunz gouz

Yinzminz raeuz ndaej fuk

Ndawsim raeuz mbouj huk

Aeu fuk bauq sevei

Hawj lezsw dwkmoh

Bouxboux goj caenhsim

Caezgya cingzngeih rim

Naek gvaq gim gvaq ngaenz

Hag lezsw cingsaenz

Aeu gaenx dawz rap naek

Riengz gaijgwz haeuj laeg

Hwnj mbaek sang bae nyaemz