Daxmeh naeuz, de 29 bi bihaenx, yungh muhrin muh haeux seiz, mbouj siujsim deng gaenzmuh saeg raek bae song diuz heujnaj.

Doeklaeng daxmeh couh mbouj gyaez gangjriu. Daxmeh gag riu naeuz:“Aj bak riu lumj vaizmeh angq rumzbaek nei, gaxgonq gyaeundei, ngamq hwnz ndeu bienqbaenz boux yakyawj lo.”

Gvaq duenh seizgan he, daxmeh yaem daxboh bae ra canghyw, caegcaeg sieng song aen heujgim, vih neix, daxmeh yungh gij ngaenz de gag yo haenx liux lo.

Yienznaeuz gaenq sieng song aen heujgim, hoeng gij heuj daxmeh couh mbouj baenzneix maenh lo, moix gek song sam bi cungj yaek bae ra canghyw coih heuj. Daengz haj roekcib bi, couh hainduj cang cungj heuj ndaej hozdung he.

Daxmeh caeuq gou swnghhoz cibgeij bi, moix baez cungj dwg gou daiq de bae yawj canghyw. Geij bi gonq de ma lajmbanj le, gou gig noix gvaqsim gienh saeh neix. Mboengq saedceij gonq, gou ma yawj de, bang de sousib doxgaiq, sawqmwh fatyienh gij heuj ndaej hozdung haenx gaenq dek baenz song mbiengj lo, couh cam de:“Daxmeh, gij heuj mwngz vaih lo, vihma mbouj naeuz ne? Lij caegcaeg yo hwnjdaeuj, mwngz baenzlawz gwn haeux ne?” Daxmeh gig caemdingh naeuz:“Vaih couh vaih lo, aeu nohheuj menhmenh nyaij, couh ndaej gyan roengzbae lo. Gou laux lo, mbouj siengj sai ngaenz lo……”

Gou miz di sim’in. Gou duk gij heuj dek baenz song mbiengj, daengz ndaw singz bae ra canghyw, sim siengj: Mboujguenj baenzlawz, itdingh aeu bang daxmeh caiq guh song diuz heuj.

Gou buet doh ndaw singz hunghung iqiq geijcib aen ywheuj cinjsoj, gawqyienz mbouj miz saek boux ciep gij hong gou, lijyouz gyoengqde dwg, itdingh hawj daxmeh gou daengz cinjsoj, mboujnex mbouj ndaej guh. Gou gej naeuz, vunzlaux gaenq 90 lai bi lo, naengh ci mbouj ndaej souh, mbouj ndaej daeuj. Gou naihsim dwk gouz canghyw, nyienh lai ok boix ngaenz, muengh gyoengqde daengz ranzcoj gou bae fuzvu. Hoeng mbouj miz boux canghyw lawz nyienh bae.

Gou nyapnyuk geij ngoenz, doeklaeng siengj ok aen banhfap ndeu: Ma ndaw cin ra canghyw.

Ra bae ra dauq, youq gwnz cin iq ra raen boux canghyw nienzgeij lij oiq he. Gou dapwngq haici ciepsoengq, cingj de daengz ranz fuzvu, caemhcaiq youz de dingh gyaq, gou mbouj gangj gyaq. Boux canghyw doengzeiq riengz gou bae lajmbanj. Gou daj ndawsim docih de.

Canghyw daeuj daengz ranz, cingj daxmeh haeb vunq, yienzhaeuh ma ndaw cin guh heuj. Gvaq aen singhgiz ndeu, gou dawz gij heuj gyaj guh ndei haenx, sikhaek haici ma ranzcoj hawj daxmeh.

Daxmeh siujsim sisi dwk cang song diuz heuj haeuj bak, song gemj gumh roengzbae haenx sikhaek bongz hwnjdaeuj lo. Gou cam:“Meh, habcik lwi?” Daxmeh riu naeuz:“Baenz, baenz, beij diuz gonq lij ndei. Lwg a, geijlai ngaenz lo?”

Gou mbouj dawz haeujsim dwk dap:“Meh, ngamq geijcib maenz ndwi.” Daxmeh buenq saenq buenq ngeiz, caengz gou mbat ndeu. Gou mbouj ndaej lwnh de nyi, gou yungh baenz geij cien maenz guh gij heuj de, yienghhaenx de couh sim mbouj onj lo. Cijaeu daxmeh yungh ndaej ndei couh ndaej.