Yaucangj yawj gwnz daiz miz song fung saenq, najbyak cungj nyaeuq hwnjdaeuj.

Haenx dwg hagseng bouxsai sij hawj dah hagseng ndeu, saenq dwg baenzneix sij:“Dahmeij ndiepgyaez, gou seizseiz cungj siengj mwngz, hwnjdangz seiz, ndaw uk gou cungj yienh aen ngaeuz gyaeundei mwngz…… Daeggyangz siengj mwngz.” Fung saenq wnq dwg saenq hoiz, yienghneix sij:“Daeggyangz ndiepgyaez, gou hix siengj mwngz! Docih mwngz siengj gou, aenvih miz mwngz, gou cij gvaq ndaej gig raeujrub……Dahmeij siengj mwngz.”

Yawj saenq sat, yaucangj ndang cungj hwnj naenggaeq. Geij bi neix, hagseng yied daeuj yied nanz guenj, mbouj gangj haenqrengz doegsaw, lienz gihbwnj gijliz cungj mbouj cunhsouj. Ceiqgaenh hagseng guhyoux baenzlai, neix hawj yaucangj gyaeuj in dangqmaz.

Moix aen singhgiz gyoebcomz hagseng seiz, yaucangj cungj giengzdiuh hagseng mbouj ndaej guhyoux, lij diemjmingz bihbingz caeuq heuh boux hagseng guhyoux hwnj gwnz daiz, mizmbangj hagseng lij deng heuh cawjranz daeuj daiq baema ranz youq geij aen singhgiz. Hoeng, gyoengq hagseng lij laeglemx laebdaeb guhyoux.

Daxbaenh, banhcujyin Siujgyangz soengq song fung saenq neix daeuj, hawj yaucangj gamjdaengz cingzgvang gig naek. Yaucangj baenzlawz hix siengj mbouj doeng song boux hagseng neix rox guhyoux. Song boux haenx boux ndeu dwg cuhcungh sam nienzgaep, boux ndeu dwg it nienzgaep, boux ndeu gyausiz youq 5 laeuz, boux ndeu gyausiz youq 1 laeuz, liz ndaej gig gyae. “Baenzlawz bae fuengzre hix mbouj miz yungh ha!” Yaucangj danq dwk naeuz.

Yaucangj gietdingh caeuq gyoengqde gangj baez ndeu, gangj mbouj dingh song boux hagseng neix nyienh dingq gij vah de, doeklaeng mbouj guhyoux yungh sim bae doegsaw. Yaucangj hawj banhcujyin heuh Siujgyangz caeuq Siujmeij daeuj bangunghsiz de.

Yaep he, song boux hagseng ndwn youq dangnaj ngaem gyaeuj. Yaucangj gven dou hwnjdaeuj vix fung saenq naeuz:“Gij sawloih sou caen fungfouq, sij ndaej gig gamjdoengh. Hoeng gij saeh neix wnggai youq sou maj baenzvunz guh cij deng, sou nyinhnaeuz gou gangj ndaej deng lwi?”

Siujgyangz cungj naeuz:“Gou loek lo, yaucangj! Gou itdingh gaij.”

Yaucangj ngaekgyaeuj naeuz:“Ndei, mwngz rox swhgeij loek couh baenz, doeklaeng aeu haeujsim doegsaw.”

Yaucangj youh baenq ndang gvaqbae cam Siujmeij:“Mwngz ne?”

Siujmeij haeb henj naeuz:“Gou mbouj loek. Gou dan sij saenq hawj boux vunz gou maij, miz maz loek?”

Yaucangj dingq gij vah neix, hozndat dangqmaz, naeuz:“Nanzdauh mwngz lij deng? Sikhaek daj denva hawj cawjranz mwngz daeuj yozyau! Gou siengj yawj bohmeh mwngz baenzlawz gangj! Bohmeh mwngz denva hauhmax dwg geijlai?”

“Mbouj rox!” Siujmeij yaek aeu dingj daengz daej bae.

“Ba!” Yaucangj aen gienz ndeu moeb youq gwnz daiz, song fung saenq haenx doek daengz gwnz namh. Boux hagseng neix caen dwg mbouj najmong!

“Lauxsaed hoizdap vwndiz gou, mboujne sik- haek baema ranz!” Yaucangj sing hung naeuz. Siujmeij baez dingq gij vah neix, mbouj gamj guengz lo.

“Doxgyau geijlai nanz la?” Yaucangj cam.

“4 aen singhgiz.” Siujgyangz han.

“Dwg bouxlawz haidaeuz gonq?” Yaucangj cam.

“Dwg gou!” Siujgyangz naeuz.

“Mbouj dwg! Dwg gou! Dwg gou sij saenq hawj de gonq”, Siujmeij lae raemxda dwk naeuz, “Bohmeh gou cungj bae baihnamz guh hong geij bi lo, soqlaiz mbouj ma ranz gvaq, cij lw gou caeuq daxbuz caez gvaq saedceij. Youq ndaw yozyau, doengzhag mbouj gyaez gou, lauxsae hix mbouj swt gou, mbouj miz vunz gvansim gou. Gou baenzbingh seiz, cungj dwg Siujgyangz bang gou cawx yw, lij daj conghciengz soengq yw hawj gou, lij sij gij vah gujli hawj gou.”

“Maz conghciengz?” Yaucangj baez doeksaet, muengz cam.

“Suzse gou caeuq Siujgyangz cij gek faq ciengz ndeu, gwnz ciengz miz aen congh”, Siujmeij naeuz, “Dou couhdwg daj aen congh neix soengq saenq.”

“O，yenzlaiz dwg yienghneix!” Yaucangj rox lo.

Yaucangj doiq song boux haenx naeuz:“Sou baema hwnjdangz gonq ba! Baezlaeng mbouj ndaej caiq guhyoux, yungh sim doegsaw cij dwg saeh youqgaenj!”

Siujgyangz caeuq Siujmeij ngaekngaek gyaeuj, okbae lo.

Yaucangj fwt dwk denva, naeuz:“Vangz cujyin ha, cingj mwngz dunghcih gyoengq lauxsae haemh neix 8 diemj buenq youq veiyisiz haihoih, raeuz aeu saek aen conghciengz ndeu.”

“Saek aen congh ciengz ndeu lij aeu baenzlaiz vunz caez daeuj ha?” Denva baihhaenx cienz daeuj gij singyaem geizheih.

“Neix gaenq mbouj dan dwg aen conghciengz ndeu lo, gij conghloek raeuz lai raixcaix.” Yaucangj naeuz.