Vih gaenxmaenx han’wngq doicaenh hagsib yungh Cuengh Gun song vah saw、 ceng caux aen yienh senhcin Cuengh Gun song vah saw huzndei、 bang doi vwnzva Byaraiz hwngfat moq、 coicaenh minzcuz doxgiet cinbu, youq 3 nyied 30 hauh “sam nyied sam·aen denjlij caeqbaiq cojgoek Loegvet” hozdung seiz, Ningzmingz Yen Minzyijban caensaed guh ndei hong Cuengh Gun song vah saw.

Ningzmingz Yen Minzyijban bang guh hong fanhoiz fuk baengzhoengz miz Cuengh Gun song cungj saw、 senhconz banjbau、 baiz dazroen、 mbawdan cezmuz、 cek saw fugsaeh daengj. Doengzseiz, youq aen denjlij caeqbaiq seiz yungh LED baengzmuq beigingj guh byauhyij Cuengh Gun song cungj saw dox doiqciuq. Yienznaeuz hong lai, saenqsik lai, fanhoiz gya hoj, hoeng daengxcungq boux guhhong caez roengzrengz, ciuq seiz miz caetliengh guhsat hong fanhoiz.

Ningzmingz Yenveij、 Yen Cwng- fuj gig yawjnaek caeuq haeujcoengh hong vah saw minzcuz、 doed ok Cuengh Gun song vah saw huzndei、 coicaenh minzcuz doxgiet cinbu saehnieb, doenggvaq gak bumwnz doxgap guh hong, caenh’itbouh youq “cibsam haj” geizgan daengx yienh doengzcaez doidoengh haiguh hong Cuengh Gun song vah saw huzndei, hwnjguh aen yienh guhyiengh hong Cuengh Gun song vah saw huzndei.

(Liuz Yencuh Liu Hihfangh Liengz Funghgwz)