Ndwen 3 ngoenz 28, Bi 2017 Gveigangj Si Cinzdangz Gih “Sam Nyied Sam Bouxcuengh” Hozdung Mungzgungh Minzcungh Faenhoih- ciengz youq ndaw hagdangz Mungzgungh Yangh Minzcuz Cuh- cungh hoenghbanh. Baez hozdung neix dwg youz Cinzdangz Gih Gyauyuzgiz cawjbanh, Cinzdangz Gih Minzcunghgiz、Vwnzlenz、ranghhag Mungzgungh bang banh, Mungz- gungh Minzcungh guhbanh. Hozdung guh miz baijyienj laex couxhek Bouxcuengh (fwen couxhek、gingq laeujndwq haeuxcid)、sibgvenq fug- sug vwnzva Bouxcuengh senhconz、baijlangh son’gyauq cwngzgoj vwnz- va minzcuz hagdangz、baijyienj yisuz vwnzva Bouxcuengh、baijyienj hanghmoeg dijyuz minzcuz、cimz gwn gijgwn haekfeih Bouxcuengh caeuq aen gyangjco lauxhangz gangj cihsiz vwnzva Bouxcuengh daengj. Cinz Gvanghcin yanghcangj daengj 15 boux beixnuengx Daizvanh daj Vahlenz Yen Suisui Yangh daeuj haenx caemh youq Gveigangj Si Minzcunghveij cujyin Cinz Hungz、Gveigangj Sih Daizban cujyin Cwng Cujveij、Cinzdangz Gih gihcangj Cangh Gingjlenz daengj bouxdaeuz- hung guhbuenx lajde caez caeuq gyoengq lauxsae hagseng Cinzdangz Gih 8 aen Cuengh Gun song saw vah sonhag saedniemh hagdangz camgya le baez hozdung neix.

Haet haenx 8 diemj cung hainduj, ndaw hagdangz Mungzgungh Minzcungh geiz lai saek mbinyagyag、sing go sing fwen goksasa. Gyoengq hagseng ndwn youq song mbiengj douhung hagdangz, ndang daenj buhvaq minzcuz, bak eu fwen couxhek dangdieg, fwngz gaem laeujndwq haeuxcid gag siu, angqcoux gyoengq hek daj gak dieg daeuj haenx. Riengzlaeng couh miz lauxsae hagseng hagdangz daiq gyoengq hek bae yawjngonz le aen cienlanz senhconz sibggvenq fung- sug vwnzva Bouxcuengh、ranzsaw minzcuz、bozvuzgvanj naz ndaw hag caeuq gij baijlangh son’gyauq cwngzgoj vwnzva minzcuz hagdangz 8 aen hagdangz guh Cuengh Gun song saw vah sonhag sawqniemh haenx, hawj bouxhek yawj le haenhdanq guh ndaej ndei. Banhaet 10 diemj cung, ciengz heiq comzyienj vwnzyi “swnjcienz vwnzva maenh- ndei minzcuz, baijyienj gijndei homsaw ndawhag” couh hoenghhwd yienjok. Gwnz daizheiq, bouxcujciz aeu Cuengh Gun song cungj vah cujciz bauqmuq. Gyoengq hagseng daenj ndangdaenj Bouxcuengh cix youq gwnz daizheiq angqyangz ciengq go diuq foux nauqhoengh ngoenzciet, diuz youh diuz go fwen vunzraeuz sugsed haenx, aeu Vahcuengh ma yienjciengq, engq miz gij yinx daegbied de; doiq fwen haenqnaemq、Heiqcuengh、foux Gyongcuengh、foux Mancuengh、fouxfaexsaux、ndangdaenj minzcuz baijlengj daengj biujyienj ndeiyawj mizyinx daegsaek naekgywggywg, hawj bouxyawj bek fwngz haenh mbouj dingz; riengzlaeng vwnzyi comzyienj, gyoengq hagseng youq gwnz cauhcangz caez guh dijyuz minzcuz hozdung, bau aendomq, daenj haizgieg sam vunz byaij vaiq、gingj gyongxdiet、dwkcik、dwk- gyangq、dwkgingq doenghgij hozdung dijyuz minzcuz neix doengzseiz haiguh, sing hemq sing riu youq ndaw hag haprwenz, nauhyied hoenghhwd, hawj gyoengq hek yaep he humx gizneix yawjyawj, yaep he buet bae gizhaenx ngonzngonz, fwngz humznywgnywg caen siengj camgya haeujbae caez guh ne. Doeklaeng, daengxgyoengq lauxsae hagseng caeuq bouxhek caez cimz gwn haeuxnaengj haj saek、gyaeqnding、nohgoemj daengj gijgwn haekfeih neix, daihgya doq gwn doq haenh, caenndang gamjsouh daengz gij goek laeg riz geq vwnzva gijgwn minzcuz.

Banringzgvaq, daengxgyoengq lauxsae hagseng comz naengh caez dingq aen gyangjco ciendaez gven- daengz vwnzva hauq Bouxcuengh caeuq vwnzva sibgvenq fungsug ngoenzciet Bouxcuengh youz Daih- hag Minzcuz Guengjsae Mungz Yenzyau、Luz Yaujginz song boux gyausou guhgangj haenx, hawj lauxsae hagseng engq roxyiuj vwnzva Bouxcuengh raeuz lai di, engq ndiepgyaez vwnzva Bouxcuengh, miz sim caez roengzrengz, caenhrengz bae hwngfat caeuq swnjcienz vwnzva Bouxcuengh, hawj vwnzva Boux- cuengh raeuz riuz doh gwnzbiengz.