Daj cingcinj vut gungz gunggeng hainduj daeuj, vih gaijgez gij vwndiz gungzhoj lajmbanj, siucawz gungzhoj、 gaijndei saedceij beksingq、 saedyienh daengx yienh vut aen mauh gungzhoj bae, ganbu bangfuz gak hangz gak nieb Dwzbauj Yen yungh gij yiedcingz cwngci gig ndei caeuq gij daidu guhhong nyinhcaen fucwz haenx, gaenxmaenx bae guh hong cingcinj bangfuz, okyienh buek youh buek ganbu bangfuz maenhndei, Liengz Leij lauxsae Daih’it Youwzyenz Dwzbauj Yen couhdwg ndawde boux he, de caeuq gyoengq ganbu bangfuz neix, yungh gij daidu guhhong nyinhcaen fucwz、 gij cingsaenz gienok giendingh bae guh, vih daengx yienh vut aen mauh gungzhoj bae gienok gij rongh caeuq ndat swhgeij.

“Hagdangz dou bangcoh 3 aen mbanj Gingdwz: Mudung、 Dozliengz、 Dohcieng, ranzgungzhoj miz 72 ranz, ranzbangfuz gou dwg Vangz Yinghginh Mbanjdohswz Mudung Cunh, daengx ranz miz 5 boux vunz, lwg bawx youq Guengjdoeng dajgoeng, lan youq Gingdwz Siujyoz doeg 3 nienzgaep, gij yienzyinh ranz neix gungzhoj dwg mbouj miz ngaenzcienz, cawjranz miz gauhhezyaz, ciengzseiz gwn yw, hong reih hong naz ndaw ranz cujyau hawj mehbaz guh……” Doiq hong bangfuz swhgeij Liengz Leij lauxsae geiq ndaej liux. De naeuz, aeu guh ndei hong bangfuz couh aeu lai byaij haeuj ranz nungzhoh, lai dingq gij vah vunzlai, roxyiuj gij cingzgvang saedceij vunz- lai, gaemdawz ndei swhliu mbat daeuz.

Hoeng aeu ndaej swhliu mbat daeuz, doiq de daeuj gangj caen mbouj baenzneix ngaih, daj yienhsingz hai ci daengz Mudung Cunh aeu 2 diemj cung baedauq, yienzhaeuh lij aeu byaij 30 faen cung roen bya, cij ndaej daengz ranz Vangz Yinghginh, “aenvih roen mbanj ranz nungzhoh lingq lai, gou cungj dwg ga byaij haeuj mbanj, danghnaeuz bungz ngoenz doek fwn roen raeuz, hix ndaej laemx gvaq, hoeng vih ndaej hawj gyoengqde caeux di vut gungz, gou caiq sinhoj hix aeu laebdaeb bae guh.” Liengz Leij naeuz, de dang lauxsae youwzyenz aeu daiq hagseng, dangz moix aen singhgiz aeu anbaiz rim, aenvih bouxgvan youq Gvangqdoengz Dwzbauj guh hong, ngoenz singhgiz cij ndaej dauq ranz, ngoenznaengz cuengqhag lij aeu ciuqgoq bouxgeq caeuq lwgnyez ndaw ranz, hoeng de mbouj miz saek coenz vah’ienq, lumj ganbu bangfuz wnq nei, dap ci ga byaij, fwn rumz cungj bae, mbouj lau hoj, baez ndaej hoengq couh bae ranzgungzhoj, caeuq gyoengqde gangjgoj, dienz caez gihbwnj cingzgvang. Dienz bonj saw bangfuz seiz vih guh ndaej soq cinj, baugvat aen ranz mienhcik, diegnamh mienhcik, de cungj aeu cik raez bae nyinhcaen rau gak dieg liux; soucomz swhliu guhcingq seiz, aenvih mbaw doz he mbouj hab biucinj, youh aeu bae ranz nungzhoh ingj gvaq moq; doenghgij hojnanz neix de cungj haekfug liux, hoeng youq hangh souhaeuj caeuq ceiok neix, de hainduj simnyap lo.

“Youq souhaeuj caeuq ceiok hangh neix, dou caen nanz dienz lai, dou mbouj ndaej luenh guh luenh dienz, lwg bawx de youq Guengjdoeng dajgoeng, aeu hawj gyoengqde dawz cek romngaenz okdaeuj doiqciuq mingzbeg ciengzsaeq, dou cij ndaej dienz cinj, neix dwg doiq ranzgungzhoj fucwz, hix doiq hong bangfuz fucwz, mbouj ndaej miz saek di cengca, hoeng nungzhoh doiq hong bangfuz roxyiuj mbouj lai, cungj miz di yaemmuenz.” Liengz Leij naeuz.

Vih aeu ndaej soq cinj, Liengz Leij caeuq nungzhoh gangjgoj haujlai baez, yungh ngoenzgyaj gag ok cienz bae cawx youz、 cawx noh、 cawx mienh bae ranzgungzhoj caez guh hong caemh gwn, gangj cingz gangj leix senhconz cwngcwz bangfuz, cungjsuenq aeu ndaej hauhmax soujgih lwg de, de sikhaek lienzhaeh lwg de, muengh lwg de daezhawj mbangj gij souhaeuj caeuq ceiok youq rog dajgoeng haenx. Hoeng ngamq hainduj, lwg de hix miz mbangj mbouj cingznyienh, caemhcaiq mbouj boiq- hab, de dang boux ganbu bangfuz he mbouj miz saek di doeknaiq, aenvih Liengz Leij rox gij goekgaen vwndiz faenh hong neix couhdwg ranzgunghoj doiq cingcinj bangfuz cwngcwz mbouj roxyiuj caeuq mbouj saenq doih guhhong, danghnaeuz ndaej mbekhai aen bak neix, baenzneix vwndiz couh ndaej gaijgez liux lo. De naeuz: “Dou couh caeuq de gangj, dou vihmaz baez youh baez sinhoj buet daeuj caeuq sou baenz dangq baenz dangq dienz haedsaed, couhdwg vih engq ndei roxyiuj gij cingzgvang sou, lumjbaenz sou souhaeuj noix, naemj gyalai guh hong, hoeng naengzlig mbouj gaeuq, yungh ngaenzcienz yungh ndaej mbouj hableix, ceiok lai, neijcienz baenz gungzhoj daengj doenghgij yienzyinh neix, danghnaeuz mwngz mbouj saenq gou, baenzneix gou baenzlawz ndaej bang sou ne? doenggvaq naihsim gejgangj caeuq senhconz bangfuz cwngcwz, lwg de cungjsuenq boiqhab, aeu diuz cienzhong song gvanbaz gyoengqde youq ndaw cangj haenx yaenq okdaeuj, caemhcaiq fat daeuj hawj, yienghneix caizliuh hangh souhaeuj caeuq ceiok neix cij ndaej guhsat.” Hong bangfuz seiz, Liengz Leij couhdwg baenzneix yungh gij naihsim、 saeqsim、 caensim、naeksim lauxsae youwzyenz gagmiz haenx, yiemzgek bae guh ndei hong moix aen najniq, de rox hong bangfuz couhdwg aeu roxyiuj gij goekgaen ranzgungzhoj baenz gungzhoj haenx, yienzhaeuh baenzlawz yungh gij diuzgienh mizleih, miz cimdoiq、 miz bouhloh guh bangfuz, hawj ranzgungzhoj ndaej miz gij canjnieb swhgeij gag ndaej guh swnghcanj, cij ndaej hawj ranz- gungzhoj caencingq vut gungz. “Dou guhsat caizliuh dwg vih engq ndei bangfuz ranzgungzhoj, ranzgungzhoj dieg youq diegbya, ciengzseiz mbwn- rengx giep raemx, gyaudoeng diuz- gienh doeklaeng、 mbouj miz ngaenz- cienz、 mbouj miz vunz guh hong daengj yienzyinh hawj gyoengqde baenz gungzhoj, baenzbingh caeuq lwgnyez doegsaw hawj gyoengqde engqgya gungzhoj, dou guh ndaej haenx couhdwg bang gyoengqde gaenxmaenx vut gungz.” Liengz Leij naeuz.

Rouxyiuj cingzgvang doeklaeng, de ndwennaengz bae daengz ranz- gungzhoj, roxyiuj gij vwndiz nungzhoh gip aeu gaijgez haenx, ciuq cingzgvang saedsaeh dingh banhfap bangfuz, gaenxmaenx soucomz caizliuh nungz- hoh bauq ndaej 3500 maenz ngaenz yungh ciengj lawh bouj, caemhcaiq doiq nungzhoh miz 4 moux reih, Gingdwz Cin dwg dieg ndaem ien cujyau aen yienh neix doenghgij gijndei neix, caeuq nungzhoh caez bae yenhban camcaz, doeklaeng bang de camgya gij vunqsik hwngfat “gungh- swh + hozcozse + nungzhoh”, youz hozcozse anbaiz boux refuengz genjcaz haeuj mbanj haeuj ranz sonyinx guh ndei hong loek rum loek nywj, doengjit ciuq mbaw san mbawien faengaep soucawx, refuengz genjcaz habgek doeklaeng aeu mbawien daeh daengz camh ien hawj conhyezdui guh faengaep dinghgaep gai, yienghneix couh gaijgez gij vwndiz souhaeuj nungzhoh, gyahwnj nungzhoh ciengx 2 duz cwz, lwg bawx ok rog dajgoeng, ginggvaq roengzrengz bi ndeu, ranz Vangz Yinghginh youq bi 2016 gaenq swnhleih vut gungz.