Ranz miz lwgnyez caen lumj vuengzdaeq, daengx ranz vunz cungj ndaej cungh de.

Ngoenzciet, lox lwgnyez gwn, dwg gienh saeh hawj vunzlaux gyaeuj in.

Daxbuz gyaez lwgnyez lai, rex gouh dawh hwnj, yaengx coh ndaw deb noh gaeq bae, vix diuz gagaeq, doiq lwgnyez naeuz:“Lan ndei, aeu gaiq neix ba, diuz gagaeq noh lai! Ndei gwn baenzmaz bae!” Lwgnyez bibi gyaeuj, mbouj aeu.

Daxgoeng raen lwgnyez mbouj aeu, da cez daxbuz baez ndeu, swnj vah naeuz:“Mwngz rox maz, gyoengq lwgnyez seizneix, byawz lij gyaez gwn gagaeq ne. Lijdwg gou daeuj bang de nip ba.”

Daxgoeng yo gouh dawh hwnj- daeuj, yaengx coh ndaw deb noh gaeq bae, vix gaiq nohfwed, doiq lwgnyez naeuz:“Lan ndei, aeu gaiq neix ba, noh fwedgaeq soiq, mbouj geng, bak geux ndaej hom bw!”

Lwgnyez mbeuj gyaeuj baihhenz bae, yawj hix mbouj yawj daxgoeng.

Daxmeh youq henz raen hawj daeglwg gaiq neix de mbouj maij, hawj gaiq haenx youh cumh, hix simgip lo. Baez siengj daengz daeglwg aiq siengj gwn dawgaeq ba. Couh rex dawh hawjdaeuj, yaengx coh ndaw deb noh gaeq bae, vix gaiq dawgaeq, doiq daeglwg naeuz:“Gaiq neix lw? Bingz- ciengz mwngz ceiq gyaez gwn lo.”

Daeglwg da caengz daxmeh, mbouj ok sing.

Daxboh raen daengz seizneix daeglwg gaiq noh he caengz gwn hix simgip lo. Haenq coenz vah ndeu okdaeuj: “Gaej dam de, siengj gwn maz, gag aeu, gaej baenzneix guh, loengh ndaej vunz daengx daiz cungj gwn mbouj onj.”

Daeglwg baez nyi daxboh baenz- neix haenq naeuz, bak baez cumh, couh daejnganga hwnjdaeuj. Daengx ranz vunz cungj ngaezngwdngwd, mbouj rox baenzlawz guh cijndei.

Daeglwg baez daej, dauq hawj gou siengj hwnj gij saeh seiz gou lij iq.

Gou okseng youq 60 nienzdaih, seizhaenx ndwenngoenz cingqngamj gvaq ndaej gig gungzhoj, gwn ndaej dungx imq lijdwg aen vwndiz hung ndeu, engq mbouj yungh gangj ndaej gwn noh lo. Hopbi ndaej gwn saek baez noh, dwg daihsaengq lo. Ceiq hawj gou nanz lumz dwg gienh saeh “caj gwn noh”.

Saehcingz dwg yienghneix, hopbi cawz ndwencieng ndaej gwn noh imq, bingzseiz lij miz cungj cingzgvang ndeu hix miz di noh gwn, couhdwg ndaw mbanj miz vunz guh hong daih. Ngoenz guh hong daih, ranz bouxcawj cungj yaek gaj bit gaeq roxnaeuz cawx noh daeuj dak boux guh hong. Guh baenzngoenz hong le, banhaemh gwn haeux seiz, boux guh hong ndaej gwn geij gaiq noh.

Hoeng gyoengqde dwgrengz baenzngoenz, cix mbouj sij ndaej gwn noh, ceiq lai dwg gwn saek gaiq guhyiengh, couh gwn byaekheu roxnaeuz duh ceuj soengq laeuj. Faen ndaej geij gaiq noh haenx, ce roengzdaeuj, caj daengz gwn imq le, gak boux gag ra diuz faex iq roix noh, roxnaeuz mbaw rong heu ndeu duk noh dawz ma ranz hawj gyoengq lwg gwn.

Bohmeh bae bang vunz guh hong haemhhaenx, hix dwg haemh lwgnyez ninz mbouj ndaek. Dou cungj rox, danghnaeuz baez ninzndaek, bohmeh ndaej noh ma, dingh deng beixnuengx gwn gaiq ndei bae. Yienznaeuz haetlaeng hwnqdaeuj hix ndaej gwn di, hoeng, ndawsim couh mbouj miz faenh nauhyied gyoengq beixnuengx bae doxceng gwn noh. Nyengh caj daengz bohmeh gwn haeux ma, ndaej gwn gaiq noh lo, cij hwnj congz bae ninz, ninzndaek fofo, dauqdaej ndaej gwn baez noh lo.

Ai, caen siengj mbouj daengz, sevei fazcanj vaiq baenzneix. Seizneix, gyoengqvunz fouqmiz lo, gijgwn laicuk lo, siengj gwn maz ndaej gwn maz. Neix yienzbonj dwg swnghhoz daez- sang, dwg cungj yiengjsouh ndeu. Hoeng, daj daengx ranz vunz lox lwgnyez gwn noh yawj daeuj, dauq hawj gou ndawsim miz di youswdswd.

Seizneix vuzciz laicuk lo, dangh- naeuz raeuz aenvih fouqmiz, couh caih gyoengq lwgnyez euqsingq, gou lau gvaq mbouj geij nanz, gij conzdungj binjdwz hauqswnh caeuq mbaet gwn mbaet yungh couh swnj mbouj roengzbae lo. Doeklaeng, raeuz siengj caiq ra gijhaenx dauq, caen dwg hoj lumj bin coh gwnzmbwn bae nei.