Daxmeh

Dahliz sang 160 lizmij, cix cij miz 80 lai gaen, de gaenq miz boux daeglwg iq ndeu. Daeglwg de maj ndaej gig cangq, ngamq rim 3 bi couh miz 30 geij gaen naek lo, bouxsai fwngz ndeu hix nanz umj hwnjdaeuj. Aenvih ndang Dahliz mbouj daiq ndei, riuj saek 10 gaen doxgaiq hix roxnyinh dwgrengz, ndigah, daiq daeglwg hwnjroengz laeuz roxnaeuz ok rog bae guhcaemz, cungj dwg bouxgvan umj daeglwg.

Geij ngoenz neix dienheiq yaep ndeu nit yaep ndeu raeuj, daeglwg haemh ninz gyaez dik denz, mbouj siujsim couh deng dwgliengz lo, youh ae youh raengh mug. Daeglwg lij iq, mbouj caengz roxyiuj baenzlawz saengq mug, ndigah gyanghwnz cungj aenvih aen conghndaeng sup heiq mbouj hwnj, daejngenge mbouj dingz. Dahliz banhaemh cungj mbouj ndaej ninz ndei, gvaq yaep ndeu couh aeu hwnqdaeuj, mbouj dwg yaeuh daeglwg, couhdwg yawj denz daeglwg hoemq ndei caengz. Yienghneix gvaq ndaej geij ngoenz, bingh daeglwg ngamq miz di ndei, Dahliz cix mbouj cwxcaih lo. Hoz de bienq ndaej youh sauj youh humz, aiq dwg geij ngoenz neix sinhoj lai, ndangdaej deng binghdoeg ciemqhaeuj lo. Dahliz lau binghdoeg baez daihngeih cienzlah hawj daeglwg, ndigah ngoenz daengz haemh de cungj daenj aen goujcou ndeu.

Dahliz moix ngoenz cungj aeu gwn cibgeij cenj raemx, mbouj gwn yw. Hoeng, hoz de cix yied daeuj yied in, seizneix vah hix gangj mbouj ok geijlai lo. Vunz ndawranz gienq Dahliz gwn di yw dwgliengz, de mbouj nyienh, naeuz gwn yw dwgliengz yungzheih ngah ninz, danghnaeuz gyanghwnz daeglwg dik denz roxnaeuz youh fatndat moq, swhgeij cix singj mbouj gvaqdaeuj couh mazfanz lo. Mbouj miz banhfap, vunz ndawranz cijndei heuh Dahliz lai gwn di raemx.

Ginggvaq Dahliz yunghsim ciuq- goq, daeglwg de dauqdaej mbouj ae lo, cij lij miz di raengh mug. Ngoenzneix banhaemh, bouxgvan Dahliz aenvih hong guh mbouj caengz sat, youq gunghswh gyaban, Dahliz roengzban dauq ranz, buenx daeglwg gwn haeuxcaeuz le, song mehlwg couh youq ndaw rug mwngz coenz gou coenz gangj hwnj gojsaeh. Cingq gangj ndaej angqvauvau seiz, Dahliz fat- yienh saeknaj daeglwg mbouj caeuq baeznaengz miz di mbouj doxdoengz, dinfwngz hix gyoetgat, de gipmuengz aeu cenj raemx daeuj hawj daeglwg gwn, lij bang daeglwg lai daenj geu buh ndeu dem. Hoeng, cingzgvang daeglwg cix yied daeuj yied ca, daengz gouj diemjcung seiz, naengnoh daeg- lwg bienq ndaej hoengzfwgfwg, Dahliz lumhlumh najbyak daeglwg, gaenq ndatfofo, aenvih fatndat, lwgda daeglwg hix byaengq mbouj hai lo.

Dahliz ukgyaeuj yiengjung’ung, maz siengjfap hix mbouj miz, umj hwnj daeglwg daj 8 laeuz buet roengzbae, gaemz heiq ndeu buet daengz laj laeuz, hix mbouj yietnaiq, youh laebdaeb buet 200 lai mij, buet daengz bak gexhongh vad fwngz heuh dingz gyaq cuzcuhceh ndeu. Itloh Dahliz umj daeglwg cungj mbouj langh fwngz, cuzcuhceh ngamq dingz youq naj dou yihyen, de vit 50 maenz ngaenz hawj bouxhaici couh umj daeglwg roengz ci, buet haeuj ndaw yihyen bae. Caj bouxcanghyw genjcaz sat bang daeglwg dajcim, Dahliz cij daengx roengzdaeuj, naengh youq gwnz daengq, nanznanz ndwn mbouj hwnjdaeuj.

Ngoenzdaihngeih Dahliz hwnq mbonq seiz, hwet in raixcaix, iet hix iet mbouj ndaej, lij roxnyinh geizheih, sijsaeq ngeixngeix, cij mingzbeg dwg haemhlwenz umj daeglwg buet ndaej dwgrengz lai, deng sieng daengz hwet lo.

Lajmbwn bohmeh aiq cungj doxdoengz bw, aen sim ndeu cungj cij rox vih lwg ndei, ciuqgoq lwg daenj ndei gwn ndei, miz saek seiz hix mbouj geiq ndaej swhgeij hix aeu haeujsim ciengx ndang. Muengh caezgya wng ndaejgeiq faenh cingz bohmeh, hauqswnh gyoengqde.

（sat）