Vangz Siujlungz boux minzbingh Mbanjcuengh 20 sijgi 80 nienzdaih satbyai, daj bae dang minzbingh ngoenzhaenx hainduj, couh ndaej daengz yinzvujbu dangdieg bangfuz, hainduj ndaem byaek diengzhung, youq henz roen Mbanjsizlij Siengcouh Cin Siengcouh Yen guhbaenz suen ndaem byaek fanj geiqciet 500 lai moux, dap diengzhung ndaem byaek 800 lai aen, ndaem gvehoengz caeuq makyungz gai bae daengz hawciengz Yanghgangj, binaengz ndaej ngaenz- cienz 1300 lai fanh maenz, cingj vunz guhhong 30 lai boux, de mboujdan youq Guengjsae boux daih’it dienz bouh daenggeiq ciubaiz gvehoengz, lij haibanh denswj sanghvu bang bouxguhnaz dangdieg gai doxgaiq reihnaz, dieg ndaem byaek de yinx ndaej Cunghyangh Densidaiz、 Sinhvazse nem Yanghgangj meizdij daeuj caijfangj, Vangz Siujlungz lij ndaej Guengjsae haj it lauzdung ciengjcangh gvaq, bouxdaiqdaeuz singhhoj gohgi daengx guek, ndaej dang yinzda daiqbiuj daihsam gaiq Laizbinh Si, baenz boux yinzda daiqbiuj daengx si ceiq coz ndaej doigawj baenz Cungguek Gung- canjdangj Cibgouj Daih daiqbiuj.

Ndaem Gvehoengz Ndaej Baenz Miz

Bi 2003 Vangz Siujlungz bouxcoz Bouxcuengh ranz youq Mbanj- miuhgaeq Daloz Cin Siengcouh Yen haenx hix lumj haujlai bouxcoz nei bae Guengjdoeng dajgoeng, ra ngaenz muengh ndaej baenz miz, yienznaeuz ndwennaengz ndaej cien lai song cien maenz ngaenz souhaeuj, hoeng gij muzdiz Vangz Siujlungz dajgoeng, dwg hagsib dajndaem dajciengx caeuq dinfwngz siugai, aenvih de gaenx guh, lauxbanj saenq de, lauxbanj aen gunghswh siugai ndaem byaek de youq haenx mboujdan son de dinfwngz dajndaem, daiq de bae buet hawciengz，son de baenzlawz doenggvaq gwnz muengx gai doxgaiq reihnaz, baenzlawz dajyiengj ciubaiz doxgaiq swhgeij guh haenx, lij gujli de hag baenz doeklaeng dauq mbanjranz cauhnieb.

Bi 2006, Vangz Siujlungz dauq daengz mbanjranz, de yawjraen vunzmbanj ndaem gvehoengz baenz miz, couh youq song moux lai dieg swhgeij ndaem gvehoengz, vunzmbanj cungj riu de mbouj bae dajgoeng ra ngaenz aeu bawx, cix dauq ranz ndaem gvehoengz, caj daengz ndaem gvehoengz baenz miz, daengngoenz cungj daj baihsae okdaeuj lo! Vangz Siujlungz mbouj fug, de dinghyawj le Namzfueng Gohgi Bauq, caemhcaiq ndaej daengz yinzvujbu dangdieg sonyinx, camgya ban hagsib. De ndaem gvehoengz caeuq bouxwnq mbouj doxdoengz, bouxwnq yungh dieg byaek ganqceh, de cix yungh boiyingzyangj daeuj ganqceh, yiengh- neix senj ndaem seiz mbouj sieng rag, lix ngaih maj vaiq, bouxwnq cawx bwnh dan cawx fuhozfeiz bingzciengz, bau 100 gaen ngamq caet betcib maenz, de cawx fuhozfeiz guekrog ok haenx, fuhozfeiz dan sang gyaz sang bau song bak maenz haenx. Ginggvaq gaenx guh gaenx leix, gvehoengz de bihaenx moix moux sou ndaej fanh lai gaen, sang gvaq bouxwnq 5000 lai gaen, moix moux souhaeuj mauhgvaq fanh maenz. Vunz ndaw mbanj cungj fug de, foenfoen yiengq de hagsib.

Vangz Siujlungz nyinhnaeuz ndaem gvehoengz ndaej canh ngaenz, doengzseiz de hix roxyiuj daengz: Ndaem gvehoengz lai le, haengjdingh gai ndaej hoj, vih guhhung canjnieb gvehoengz, Vangz Siujlungz camgya ban hagsib cauhnieb yen gungh- sanghgiz caeuq lauzdung baujcanggiz daengj bumwnz cujciz haenx, lij bae Guengjdoeng Sengj mbangj giyez hung ndaem byaek hag dinfwngz siugai. Bi 2008, guekgya fat 《Fap Hozcozse Ciennieb Bouxguhnaz》 doeklaeng, Vangz Siujlungz doeg sat le roxyiuj daengz, aeu guhhung canjnieb gvehoengz, dan miz byaij diuz roen ciennieb、 gihdi、 binjbaiz, riengzlaeng gunghsangh bumwnz dangdieg bang de, cujciz 10 ranz bouxguhnaz ndaem gvehoengz dienz bouh daenggeiq laebbaenz aen hozcozse ciennieb riuzdoeng ndaem doxgaiq reihnaz suen loegfung, miz le aen hozcozse neix le, de yinxhaeuj ceh gvehoengz Meijgoz, gvehoengz maj okdaeuj baenz yiengh huqlaex iq, ndaem 150 moux, caemhcaiq senhconz ceh gvehoengz, dwk ok gij ciubaiz hozcozse ciennieb, gvehoengz ndaem okdaeuj haenx gai bae hawciengz Guengjdoeng Sengj liux, bihaenx canh 10 lai fanh maenz. Bi 2011, Vangz Siujlungz youq henz roen ngeih gaep henz Mbanjsizlij Siengcouh Cin, yungh gij fuengsik diegnamh riuzcienj, yungh gyaqcienz moux 1000 maenz co dieg 508 moux, guh diengz suliu 850 aen, caemhcaiq yungh gyaqcienz naed 1.5 maenz cawx ceh gvehoengz ndei daeuj ndaem, de daiqdaeuz youq ndaw diengz suliu yungh daeng yaeuhgaeb、 daeng boujraeuj、 daeng boujrongh、 muengx fuengznon daengj dinfwngz moq guh dajndaem, hawj gij gvehoengz caeuq byaek ndaem okdaeuj mbouj miz goenghaih.

Bi 2013 hainduj, Vangz Siujlungz laebbaenz suen ndaem byaek ndaem ok byaek 1300 lai fanh dun, ndaej ngaenzcienz 800 lai fanh maenz, veiyenz hozcozse de hix daengz 100 lai ranz, de lij dienz bouh daenggeiq “suen siengcwz” aen ciubaiz neix, gij byaek de ndaem okdaeuj lij ndaej Guekgya Nungzyezbu nyinh baenz doxgaiq reihnaz mbouj miz goenghaih.

Ndaem gvehoengz caeuq byaek ndaej baenz, ndaej ginghci yauqik yienhda le, Vangz Siujlungz ok cienz, laebbaenz le aen canggyoet 80 bingzfuengmij caeuq aen ranz baucang doxgaiq, doenghgij doxgaiq mbouj ndaej gibseiz gai ok couh aeu bae baucang yo haeuj canggyoet bae, an hwnj aen ciubaiz “suen siengcwz” neix, hawj gij doxgaiq reihnaz ndaem okdaeuj haenx ndaej bienq bengz. Bi 2015 daeuj, Vangz Siujlungz engq dwg yungh dieg ndaem byaek swhgeij, guh yawjngonz nungzyez, hawj bouxhek gag mbaet makdumh、 gvehoengz, cungj fuengsik siugai neix hawj haujlai vunz angqyangz bae, habhoz dauq, gij doxgaiq reihnaz de ndaem okdaeuj haenx hix gai ndaej gyaqcienz ndei. Bi 2016 ndwen 7, de lij guh ciet gvehoengz hozdung, hawj 3000 lai boux bouxhek daeuj doxdax gwn gvehoengz, doidoengh siugai doxgaiq doengzseiz, lij hawj lijyouz dangdieg ndaej hwngfat.

Vangz Siujlungz Maij Bang Gungz Bang Hoj

Vangz Siujlungz baenz miz le, mbouj lumz ranzgungzhoj henzgyawj, de doenggvaq gij fuengsik ciu vunz- hong, ndwennaengz cungj ciusou 30 lai boux vunz ranzgungzhoj daengz dieg ndaem byaek de daeuj guh hong, hawj gyoengqde hag dinfwngz moq ndaem gvehoengz doengzseiz, ndwennaengz cungj ndaej song daengz sam cien maenz ngaenz souhaeuj, Yinz Siujvah mehmbwk daj yanghcin wnq haq daengz Mbanjsizlij, aenvih ndaw ranz miz lwgnyez doegsaw, saedceij ndaw ranz gvaq ndaej hoj, Vangz Siujlungz aeu de guh boux bangfuz, cingj de daeuj dieg suen ndaem byaek swhgeij dajgoeng, fwngz gaem fwngz son de hag ndaem byaek fanj geiqciet, hag baenzlawz baucang doxgaiq reihnaz, aeu doxgaiq reihnaz yo haeuj canggyoet, Yinz Siujvah ndwennaengz mboujdan lingx ndaej song cien lai maenz ngaenz, gaijgez gij cienz lwgnyez doegsaw, lij hag ndaej dinfwngz moq ndaem byaek dem. 5 boux ranzgungzhoj Mbanjsizlij youq dieg ndaem byaek Vangz Siujlungz hag ndaej dinfwngz dajndaem le, gyoengqde hix dauq ranz guh diengzhung ndaem byaek, gij gvehoengz gyoengqde ndaem ok haenx, Vangz Siujlungz couh yungh diuz roen gai swhgeij, bang gyoengqde gai, hawj gyoengqde mbouj miz youheiq baihlaeng, doenggvaq ndaem gvehoengz vut gungz baenz miz.

Ciuq mbouj cienzbouh doengj- geiq, Vangz Siujlungz binaengz bang nungzhoh bonjdieg gai doxgaiq reihnaz 50 lai dun, hawj gvehoengz ranzgungzhoj gai ndaej gyaqcienz ndei. Bi’gvaq ndwen 11, Vangz Siujlungz laebbaenz aen gunghswh denswj sanghvu, youq gwnz muengx bang nungzhoh gai doxgaiq reihnaz, aenvih Vangz Siujlungz guh daj- ndaem、 siugai ndaej ndei, bouxdaeuz Siengcouh Yen lij cienmonz cingj de bae daengz 11 aen yanghcin daengx yienh hawj ranzgungzhoj hwnj dangz son dinfwngz gvaq, son’gyauq gij gingniemh ndaem gvehoengz caeuq byaek diengzhung hawj ranzgungzhoj, bi’gvaq ndwen 1 daengz 11, Vangz Siujlungz couh son’gyauq gij ging- niemh moq ndaem byaek diengzhung、 gvehoengz hawj 3000 lai boux ranzgungzhoj daengx yienh. Doengz- seiz, de yawjnaek lijlun caeuq saed- saeh doxlienz, iucingj ranzgungzhoj bae daengz suen ndaem doxgaiq swhgeij yawjngonz hagsib, bi’gvaq dieg dajndaem de yinx ndaej 3000 lai boux bae yawjngonz hagsib, miz mbangj vunz doiq de naeuz, “baenz lai vunz daeuj hag gij gingniemh dajndaem mwngz, mwngz mbouj lau bouxwnq ciengj seng’eiq mwngz ha?” De naeuz: “Duj va dog hai mbouj dwg seizcin, daengx suen va hai cij dwg seizcin, gag baenz miz mbouj dwg miz, caezgya miz cij suenq miz”, gij cingsaenz fouzsei okrengz de ndaej haujlai sinhvwnz meizdij cunghyangh bae caijfangj, caemhcaiq aeu saehsaed de lwnh daengz daengx guek, lienz sinhvwnz danhvei Yangjgangj、 Aumwnz hix daeuj caijfangj de gvaq, de baenz boux nduj daengx yienh ndaej bauqceij ganhvuz daegbied hingzcwnggih daengh ok.