Moix bi baez daengz sam nyied sam, yiuhrumz mbin rim mbwn. Bineix sam nyied sam, yienh dou hai le yinzminz daibyauj daihhoih, dou yawjraen gwnzmbwn yiuhrumz engq lai engq gyaeu lo, ndawsim dou van lumj dangzrwi nei.

Bi’gvaq sam nyied sam, gou naengh youq ndaw ranz yawj 《Sam Nyied Sam》 hawfwen diemj boq, gyoengqvunz ciengq go diuq foux ndaet lumj faengx nei, fwen rwenzbwenbwen, hwnjhwnj roengz- roengz. Haenh cwngcwz dangj raeuz ndei, haenh lajmbanj raeuz cinghseuq, gyaranz engq gyaeu, haenh cingcinj duet hoj guh ndaej ndei, haenh sevei cinbu daengjdaengj.

Seizgan gvaq ndaej vaiq lai, baez yaep da sam nyied sam youh daengz lo. Caemhseiz, gij va lingzlaeux dwk hai rim gwnz bya caeuq gyang doengh, angqcoux raeuz, bineix gij va henjrwg engq gyaeundei lo, engq yinx vunz bae yawj, gyoengqraeuz fwngz yien fwngz youq henz va henjrwg haenx eufwen, haenh Cungguek Gungcanjdangj ndei, gyaez ginzcung、vih ginzcung banh saeh caen; haenh Siz cujsiz gaenx guh hong, gyaez lwgminz, you saedceij lwgminz gvaq mbouj ndei, ok cwngcwz vih lwgminz, dazyinx caezgya buet coh siujgangh.

Liggaeuq sam nyied, caen daeuj lo. Gou lij caengz guh ndei maz caepcawq , de couh yaek daeuj daengz henz ndang gou lo. Vahsug gangj ndaej ndei——“Sam nyied mbouj caux goek, loeg nyied bae lawz aeu”.

Bi’gvaq liggaeuq sam nyied ngoenz daih’it, dou lij gaij cozyez hagseng. Ngoenz daihngeih dou couh buet bae daengz lajmbanj ranzgungz guh gij hong duet hoj. Ngoenz daihsam dwg hawfwen sam nyied sam. Dou gaem haeuxcid haj saek, buet bae daengz hawfwen dingq fwen, ngeix- ngeix song ngoenz gonq, muengz hwnj muengz roengz, caen siengj mbouj daengz ngoenzneix dwg ngoenzciet.

Sam nyied sam, dou geijlai maqmuengh neix dwg aen ciet cukgaeuq、 maqmuengh gyaeundei ndeu. Hawj dou daiq go va nyinhcaen bae ra aen maqmuengh swhgeij.

Sam nyied sam, aenvih gwnz- biengz miz aen ciet neix, ndaw sim dou cij ndaej baenzneix angq, fwen Bouxcuengh cij baenzneix rwenz, gij va hai youq gwnz bya gyang doengh cij baenzneix lengj!

Sam nyied sam, dwg gij siengjmuengh ndawsim dou.

Sam nyied sam, daiq miz aen hohfuk dou.

Sam nyied sam, gij va hai ndaej gig gyaeundei.

Sam nyied sam, laeglemx caeu haeuj ndawsim dou.

Sam nyied sam, miz aen riunyumj dou.