Vahgonq

Dieglaeg ndaw haij miz cungj bya ndeu heuhguh byadamajhah. Bya neix caenhguenj seng youq ndaw dah gyoetnit, cix aenvih ndaw dah gyoetnit ra mbouj ndaej maz doxgaiq gwn, cijndei riengz diuzdah youz roengzbae ra gwn, itcig youz ya youz, doeklaeng youz daengz ndaw haij. Hoeng, cungj bya neix cix doiq dieg ok gyaeq iugouz gig sang, itdingh aeu youq ndaw dah gyoetnit, byalwg cij ndaej dotbyak okdaeuj. Yaek daengz seiz ok gyaeq, duz byadamajhah couh haidaeuz yiengq diegcoj youz dauq. Diuz roen dauq diegcoj geij cien goengleix, miz raemxdiuqdan, lij miz gak cungj gak yiengh gazgiengh. Hoeng, bya neix baenzbaenz cungj mbouj lau, gien- dingh yiengq diegcoj youz bae. Youz daengz diegcoj, duz byadamajhah sikhaek baenz doih baenz doih ven congh ok gyaeq. Aenvih daj baez youz dauq hwnj, gyoengqde couh mbouj caiq gwn doxgaiq, caj byalwg ok gyaeq, gyoengqde gaenq baeg ndaej naetnaiq raixcaix. Hoeng, couhsuenq baenzneix, gyoengqde vanzlij itcig souj youq bangxhenz gyaeq mbouj deuz, cig daengz bonjfaenh yaeng- yaeng dai bae. Caiq gvaq saek sam seiq ndwen, gyaeq dek byalwg ok, seiq haj cien diuz byalwg dotbyak okdaeuj lo. Gyoengqde saedcaih daiq iq, mbouj miz rengz bae ra gwn, cijndei gwn noh bohmeh daeuj ciengx mingh. Caj gyoengq byalwg majhung lo, miz rengz gag okbae ra gwn, ndang bohmeh gyoengqde gaenq cij lw bo goet ndeu ndwi lo. Byadamajhah, mbouj ok sing dwk lwnh hawj raeuz nyi maz heuhguh bohmeh ceiq hungmbwk youq laj- mbwn.

Duzbya baenzneix, vunz hix baenzneix, ndigah cij miz vunz naeuz, daxboh lumj goengq bya nei, hawj lwg ing hawj lwg baengh, daxmeh lumj diuz dah nei, umj lwg haeuj rungj, mbouj hawj lwg deng rumz boq deng fwn sox.

Daxboh

Dahsiuj 7 bi lo, ndaw ranz de ciengx miz duz vaizcoh ndeu. Aenvih hong ndaw reihnaz daiq lai, mbouj ndaej moix ngoenz dawz duzvaiz okbae langh, hoeng youh mbouj ndaej daengx ngoenz cungj gven vaiz youq ndaw riengh. Yienghneix, moix ngoenz haetromh bohmeh Dahsiuj yaek okbae guh hong seiz, couh sien yien duz vaizcoh bae ndaw naz cug.

Ngoenzneix banhaemh souhong dauq ranz, daxboh siengj bae yien duzvaiz, deng Dahsiuj rox le, nauh dwk yaek caeuq daxboh caez bae.Baeznaengz daxboh bae gizlawz cungj gyaez daiq Dahsiuj riengzlaeng, seizneix yawjraen Dahsiuj siengj caez bae, sikhaek dapwngq lo.

Duz vaizcoh cug youq gyang- doengh nazmbaeklae ngamq gvej haeux sat, liz ranz miz saek song leix gyae. Itloh Dahsiuj gangjbetbet, yinx ndaej daxboh riuhaha, song bohlwg yaep ndeu couh byaij daengz nazmbaeklae cug vaiz. Aenvih dien- heiq hwngq lai, duzvaiz youq ndaw naz gaenq rouh ndaej ndang rim naez caez, daegbied uq. Dahsiuj cix di ndeu hix mbouj yiemz, caj daxboh yien duzvaiz daengz henz naz couh humx duzvaiz cienq gien. Dahsiuj mbouj caengz gwih duzvaiz gvaq, gyoengq dahcej daeggo ndaw mbanj cuengq- hag aeu bae langh vaiz gaeqranz, gyoengqde cungj gwih duzvaiz gvaq, hawj Dahsiuj hozhaenz dangqmaz. Seizneix, ndwn youq henz ndang duzvaiz hawj Dahsiuj angqbuepbuep, lij cam daxboh ndaej mbouj ndaej hawj de gwih duzvaiz. Daxboh gyaez dahlwg lai, yawjyawj duz vaizcoh mbouj suenq sang, youh yawjyawj roen iq dauq ranz, doengzeiq lo.

Daxboh sien yungh fiengz cat seuq ndang duzvaiz, caiq gig siujsim dwk umj dahlwg cuengq youq gwnz laeng duzvaiz, lij mbouj dingz heuh dahlwg gaeuz ndang gaenxmaenx laeng duzvaiz daeuj baujciz bingz- yaenx, yawhbwh ndei le de cij yien duzvaiz yaeng’yaeng yiengq ranz byaij bae. Byaij daengz buenq roen, Dahsiuj ngiengx gyaeuj baez yawj, fatyienh daxmeh couh ndwn youq ndaw mbaek reih mbouj gyae, sikhaek angqfwng- fwng iet fwngz sing hung dwk heuh naeuz: “Meh! Meh! Gou youq gizneix!”

Bouxlawz siengj daengz, Dahsiuj iet fwngz seiz duzvaiz ngamq byaij gvaq duenh roen lingq ndeu, de baez iet fwngz, ndang mbouj miz dingj, couh swnh dwk laeng duzvaiz doek roengzbae, henz roen dwg benq oendomq vunz aeu daeuj humx reih ndeu. Da daxboh yawj Dahsiuj couh yaek doek daengz gwnz oen, couh lumj rengz sien hwnj ndang nei, fwt cung gvaqdaeuj, ciep hwnj Dahsiuj. Dahsiuj deng daxboh umj hwnjdaeuj cij fanjwngq gvaqdaeuj, sikhaek daej- nganga. Daxboh umj Dahsiuj byaij ok benq oendomq haenx, doq yaeuh dahlwg doq beng cag hawj duzvaiz dingz roengzdaeuj. Caj daxmeh buet gyawj ciep dahlwg gvaqbae, daxboh cij ra ndaek rin hung ndeu naengh roengzdaeuj, haeb heuj duet haiz beng ok geij diuz oen raez.

（caengz sat）