Byasang hophumx, diuzrij hot- heux, baenz aen baenz aen ranzlaeuz moq guh miz yiemhranz vax faex caeuq gwnz ciengz veh miz gij doz “aennyenz cibngeih duzseiz”、guenghcueng deugaek vwnzva goep- gvej doengh gij miz daegsaek minzcuz Cuengh、Yauz、Myauz haenx ing bya hwnjguh, dep raemx baijlele; diuzroen ndaw mbanj ngutngeuj bingzbwd, saekseiz raen miz geij bang roeg mbin gvaq gwnz mbanj, nanz mbouj nanz caemh raen miz heiqcihuq gyaq riengz gyaq menh- menh hai dwk haeujok gyang mbanj. Byaij haeuj Duhlungz Cunh Luzbaiz Cin Denhngoz Yen, couh ndaej yawjraen aen mbanj yiengh moq miz gij yiengh gingj gyaeundei doenghnaz caeuq heiqhom ciuhneix haenx.

Duhlungz Cunh dieg youq baihbaek Denhngoz Yen, liz yienhsingz 20 goengleix gyae, sam mbiengj byasang hophumx, swnghdai co’nduj、 swyenz vanzging henlouz ndaej ndei. Daengx cunh 260 ranz 1019 vunz, moix vunz cij miz reihnaz 1.4 moux, gaxgonq ndaw mbanj cungj dwg roennamhnaez、ranzciengznamh, nyapnyaj luenh bok nyabnyad, vunzmbanj mbouj miz maz souhaeuj saedceij gungzhoj, haujlai bouxcoz okrog dajgoeng, ndaw mbanj menh- menh couh baenz le mbanjhoengq, dwg Denhngoz Yen 26 aen mbanj gungzhoj ndawde aen ndeu. Bi 2011 Duhlungz Cunh ndaej lied guh Guengjsae buek daih’it hwnj- guh lajmbanj mizmingz daegsaek swnghdai nungzyez, youq swcigih cugendingh haenqrengz bangcoengh lajde, vunzmbanj bae diegwnq cawx miuzfaen makbakhom dauqma ndaemganq, geij bi gvaqbae, daengx mbanj ndaemganq makbakhom dabdaengz 860 lai moux, baenz le hangh hongsaeh ceiq hung vunz- mbanj demsou baenz fouq ndeu. Daj guh hangh hozdung “seuqcingh lajmbanj” gvaqdaeuj, aen cunh neix comz rengz bae guh yiengh mbanj gaijcoih caeuq mbanj okmingz daegsaek swnghdai nungzyez, haenq- rengz guh ndei vanzging ndaw mbanj, gyarengz guh sezsih goekdaej caeuq fuzbinz gunggeng, ciuq ndaw mbanj saedcaeq bae hwngfat hongsaeh daegsaek, aeundaej cingzyauq ndei. Aenmbanj ginggvaq gaijcoih le, ranzlaeuz yiengh moq ndei yawj, roenmbanj bingzbwd doengrat, mieng baizraemx vangraeh lienzdoeng, raemxuq nyapnyaj cawqleix、daeng- roen ndatndit daengj sezsih boiq ndaej caezcienz, makbakhom、iengangq、conhsinhlenz、biucinjvaq ciengx mou、ndaw ndoengfaex ciengx gaeq daengj hongsaeh guh ndaej hoenghhwd, vanzging dieg vunzyouq caeuq heiqndei vwnzmingz ndaej gaijndei haujlai, yinx le Gunghswh Mizhanh Souginh Sizbinj Guengjsae daengj geij aen giyez daengz ndaw mbanj roengzngaenz hwngfat. Youq gij hongsaeh neix daiqdoengh lajde, daengx mbanj miz 370 lai vunz ndaej youq bakdouranz guhhong lingxngaenz, ndawde miz 100 lai vunz dwg bae baihrog dajgoeng dauqma. Bi 2013, daengx mbanj moix vunz bingzyaenz cinghsouhaeuj 6280 maenz, beij bi 2011 nienzdaej lai le 2400 lai maenz.

Duhlungz Cunh doenggvaq hwnjguh aenmbanj daegsaek swnghdai nungzyez, gaenxmaenx ungganq caeuq guhhoengh gij hong- saeh daegsaek swnghdai nungzyez, hengzguh yiengh mbanj gaijcoih, guh caezcienz ndaw mbanj vanzvei、diuzroen、gvangjcangz daengj boiq- dauq sezsih, hwngfat fungsug vwnzva lajmbanj, coicaenh hwnjguh cing- saenz vwnzmingz, aen mbanj miz daegsaek minzcuz caeuq swnghdai nungzyez gizdieg gyaeundei、vunz- mbanj doxhuz fouqmiz ndeu couh baenzneix okyienh youq dangqnaj vunzlai.