Lienznienz haeux fag lai

Ranz dem caiz fat fouq

Geng reihnaz bouxsouj

Couh aeu rox anbaiz

Seizneix dwg seizdoeng

Sien fan mboeng nazgyaj

Hamj gvaq cieng cibhaj

Caux dieggyaj mbouj lumz

Seizdoeng aeu coih mieng

Yungh raemx bieng cin hah

Raemx vued miuz cij maj

Mbouj yungh caj fwn roengz

Miuz maij dan linz gyaz

Bwnh gung maj ndaej vaiq

Rom bwnh dwg saeh daih

Vaiq hengzdoengh hwnjdaeuj

Mak youzcaz baenz ndoeng

Roengzrengz gip ma dak

Caq youz naednaed fag

Baen youz gak boux faengz

Hohhoh hwnj ranzlaeuz

Cang ndaej gyaeu youh moq

Bakdou ciuq daihloh

Ndaem va goj mwnnoengq

Boux ok rog gai rengz

Deng ndaej ngaenz daeuj bouj

Raen ranzmbanj bienq fouq

Nyienh youq ranz mbefat

Dap bungz ma ndaem byaek

Fwngz bongx aek ciengx bya

Cienzcaiz raeuz gag ra

Fouqmiz ma hwnj mbaek

Nungzyez dwg giekdaej

Baengh de ndaej maj ndi(ndei)

Naz yied gung yied biz

Cax yied diz yied raeh

Haeuj doeng vunz mbouj vangq

Fwngz riengz ndang mbouj dingz

Guh hong raeuz aeu hingz

Dingh byaij haeuj siujgangh