Bonjbauq siusik (gicej Cau Dwzfeih) 3 nyied 18 hauh banringz- gvaq, aen gyangjco goeng’ik Betgviq gyangjdanz ·“riengz gou hag Saw- cuengh” youz Namzningz Si Minz- cunghveij、 Namzningz Si Minzyijveij caeuq Duzsuhgvanj Guengjsae lienz- hab cawjbanh haenx youq Namzningz banh. Baez gyangjco neix iucingj Guengjsae Gyauyuzdingh Minzgyaucu cucangj、 Minzcuz Song Vah Saw Gyauyuz Guenjleix Bangunghsiz cujyin, fuyenzgiuyenz, Swcigih Minzyijveij Minzcuz Yijvwnz Gunghcoz Conhgyah Swhsinz Veij- yenzvei fucujyin veijyenz, Guengjsae Minzcuz Dayoz caixvaih binqyungh lauxsae sozsw yenzgiuswngh Veiz Lanzmingz dang bouxgangj, lij iucingj Aen Hezvei Hawfwen Guengjsae veicangj Banh Gizsi, Guengjsae Minzcuz Bau Se secangj Banh Cauzyangz, Guengjsae Minzcuz Dayoz Vwnzyozyen Gangh Cunghdwz gyausou、 Luz Yungjbinh fu’gyausou daengj camgya gyangjco. Gyangjco yienhciengz yinx ndaej bak lai vunz mbouj doengz hangznieb daeuj dingq gyangjco.

Daengx aen gyangjco, Veiz Lanzmingz hopheux Cuengh Gun song vah saw 5 duenh ginggvaq: Duenh ngamq caux sawq son Sawcuengh、 duenh sawqdiemj Sawcuengh haeuj hagdangz、 duenh diuzcingj Saw- cuengh haeuj hagdangz、 duenh saedniemh son’gyauq Cuengh Gun song vah saw、 duenh hwngfat son- gyauq Cuengh Gun song vah saw; seizneix hwngfat son’gyauq Cuengh Gun song vah saw miz “seiq hoj”, couhdwg hoj miz rengzgaz roxyiuj、 hoj noix miz baujcang、 hoj noix vunz、 hoj ngaenz mbouj lai; Cuengh Gun song vah saw hwngfat liz mbouj ndaej gij vanzging gwnzbiengz cauxmoq doigvangq yungh Sawcuengh, cenzdiz youqgaenj dwg gyagiengz lai nyinh- doengz vwnzva Bouxcuengh, hot ceiq youqgaenj dwg gaemdawz gij hwngfat gvilwd gyauyuz caeuq vah saw, lohnaemj gihbwnj dwg gohyoz gveihva, faen bouh doicaenh, gaijgwz cauxmoq gihci, gikfat gij rengzhoengh Cuengh Gun song vah saw sonhag daengj caeuq caezgya guh doxgyau.

Gyangjco seiz, Veiz Lanzmingz giethab gij ginggvaq bonjfaenh caeuq gij yawjfap daegbied doiq Cuengh Gun song vah saw sonhag hwngfat haenx vih bouxdingq gangj ciengz gyangjco ndei dingq he, de doenggvaq saeh caen, lwnhgangj baenzlawz guh ndei hong hwngfat Cuengh Gun song vah saw sonhag, coicaenh swnjcienz hwngfat vwnzva minzcuz, demgiengz gagsaenq vwnzva, bang doi minzcuz doxgiet.

Youq gyangjco yienhciengz, bouxguhhong yienhciengz fat cek doz senhconz minzcuz cihsiz Namzningz Si、cek 30 cam cihsiz giekdaej Sawcuengh、 cek banhfap guenjleix gwnzbiengz yungh Sawcuengh Namz- ningz Si、 cek ceijnamz fugsaeh fanhoiz gwnzbiengz yungh Sawcuengh Namzningz Si、 cek Sam Nyied Sam cazci banj Sawcuengh nem daeh cawx doxgaiq yaenq miz Cuengh Gun song cungj saw daengj swhliu senhconz hawj gyoengq bouxdingq mbouj aeu cienz.

Gyangjco sat laeng, Banh Gizsi ciepsouh gicej caijfangj seiz naeuz: “Sawcuengh gyoepyaem daj hainduj caux daengz seizneix gaenq ndaej 60 lai bi, daengz seizneix cugyamq baenz aen dijhi Cuengh Gun song vah saw sonhag(daj siujyoz daengz daihhag), aen ginggvaq neix mbouj ngaih, neix yienh’ok guekgya aeueiq gak minzcuz cungj miz gij swyouz yungh caeuq hwngfat vah saw swhgeij, vihneix, raeuz aeu daezsang gagsaenq vwnzva minzcuz, demgiengz nyinhdoengz vwnzva.”